كورمەنىڭ سالتاناتتى اشىلۋىنا قازاقستاننىڭ مادەنيەت جانە اقپارات ۆيتسە-ءمينيسترى ەۆگەني كوچەتوۆ پەن ساحا رەسپۋبليكاسىنىڭ مادەنيەت جانە رۋحاني دامۋ ءمينيسترى افاناسي نوەۆ قاتىستى.
ەكسپوزيتسيا «ساحا رەسپۋبليكاسىنىڭ كەستەلەنگەن كارتاسى», «ەۋرازيا حالىقتارىنىڭ مادەنيەتىندەگى جىلقى كۋلتى», «ياكۋتيانىڭ قازىنا قورى» جانە «ياكۋتيانىڭ ۇستالىق ونەرى» اتتى ءتورت بولىمنەن تۇرادى. جالپى سانى 130-عا جۋىق ساندىك-قولدانبالى ونەر ۇلگىسى, سونىمەن قاتار زەرگەرلىك بۇيىمدار مەن باعالى تاستار قويىلىپ وتىر. ودان بولەك كورمەگە كەلۋشىلەر ياكۋتيانىڭ ساندىك-قولدانبالى ونەر شەبەرلەرىنىڭ ەكسكليۋزيۆتى اۆتورلىق جۇمىستارىن تاماشالاپ, اسىل تاستارمەن كومكەرىلگەن سيرەك ماتەريالداردان جاسالعان ءداستۇرلى پىشاقتاردىڭ الۋان تۇرىمەن تانىسا الادى.
ساحا رەسپۋبليكاسىنىڭ كەستەلەنگەن كارتاسىندا ەلدىڭ ەكونوميكالىق دامۋىنىڭ نەگىزگى نىساندارى, حالىقتىڭ كوپۇلتتى قۇرامى, ءداستۇرلى ءومىر ءسۇرۋ سالتى بەينەلەنگەن. ال ساندىك-قولدانبالى ونەرگە ارنالعان بولىگىندە تۇرمىستىق قاجەتتىلىكتەر مەن اڭ اۋلاۋعا ارنالعان ءداستۇرلى ياكۋت پىشاقتارى, مۋزىكالىق اسپاپتار, مامونت ازۋى مەن اسىل تاستارمەن كومكەرىلگەن سيرەك ماتەريالداردان جاسالعان كادەسىي ونىمدەرى جانە شەبەرلەردىڭ باسقا دا ەكسكليۋزيۆتى, اۆتورلىق جۇمىستارى ۇسىنىلعان.
كورمەدەگى باستى ەكسپونات – «گاۋھار تاستاردىڭ جارقىراۋى» دەپ اتالاتىن كۇمىس تاباققا 2 مىڭنان استام گاۋھارتاستىڭ شاشىراندى كەندەرى سالىنعان كومپوزيتسيا.
سونداي-اق كەلۋشىلەر ساحا حالقىنىڭ ۇلتتىق كيىم ۇلگىلەرىنەن دەفيلە تاماشالاپ, ءداستۇرلى انشىلەر ونەر كورسەتتى.
«مادەنيەتىمىز بەن سالت-ءداستۇرىمىزدى ساقتاۋ ءۇشىن ءبىز تامىرىمىزعا جۇگىنەمىز. بۇل – ۇلتتىق كودىمىز, حالىقتى ءتۇسىنۋدىڭ كىلتى. سوندىقتان قازاقستانداعى ياكۋتيانىڭ مادەني كۇندەرى اياسىندا كورمەمەن قاتار, ياكۋت فيلمدەرىنىڭ كورسەتىلىمى, ولونحو تەاترىنىڭ قويىلىمدارى, «ۆيرتۋوزدار» سكريپكا ءانسامبلىنىڭ كونتسەرتتەرى سياقتى بىرقاتار شارا جوسپارلانعان. مۇنىڭ ءبارى ءبىر-ءبىرىمىزدى جاقىنىراق تانۋعا, باۋىرلاس حالىقتىڭ مادەنيەتىن تۇسىنۋگە مۇمكىندىك بەرەدى», دەپ اتاپ ءوتتى مادەنيەت جانە اقپارات ۆيتسە-ءمينيسترى ەۆگەني كوچەتوۆ.
كورمە 2 مامىرعا دەيىن جالعاسادى. ەكسپوزيتسيانى ۇلتتىق مۋزەيدىڭ 6-قاباتىندا ورنالاسقان ۋاقىتشا كورمە وتكىزۋ زالىندا تاماشالاۋعا بولادى.
ايتا كەتەيىك, ەلىمىزدە ساحا رەسپۋبليكاسىنىڭ مادەني كۇندەرىنە ارنالعان ءىس-شارالار استانا مەن الماتى قالالارىندا وتەدى.
اتاپ ايتساق, قاليبەك قۋانىشباەۆ اتىنداعى مەملەكەتتىك ۇلتتىق قازاق مۋزىكالىق دراما تەاترىنىڭ كامەرالىق زالىندا «ياكۋتيا ۆيرتۋوزدارى» سكريپكاشىلار ءانسامبلىنىڭ كونتسەرتى, «نۋرگۋن بووتۋر» ولونحو وپەراسى, م.گوركي اتىنداعى ورىس دراما تەاترىنىڭ زالىندا «كىىس دەبيليە» ولونحو سپەكتاكلى قويىلادى.
الماتىنىڭ مەملەكەتتىك تەاتر زالدارىندا كونتسەرتتەر مەن سپەكتاكلدەر ۇيىمداستىرىلادى. اتاپ ايتساق, ىقىلاس اتىنداعى حالىق مۋزىكالىق اسپاپتار مۋزەيىندە بىرقاتار مادەني-رۋحاني ءىس-شارا وتەدى. 21 ساۋىردە ياكۋتيا حالىقتارىنىڭ مۋزىكاسى جانە فولكلورى مۋزەيى قورىنان جاساقتالعان «عاسىرلار ءۇنى» جىلجىمالى كورمەسى اشىلىپ, سر حالىق شەبەرى, ياكۋتيانىڭ «كىل ساحا» ەتنوستىق مۋزىكا ءانسامبلىنىڭ ءسوليسى رۋسلان گابىشەۆپەن ارت-كەزدەسۋ بولادى.
ال 22 ساۋىردە ياكۋت ەرتەگىلەرىنىڭ جەلىسى بويىنشا قىسقامەترلى مۋلتيپليكاتسيالىق فيلمدەر, «نيۋرگۋن بووتۋر سترەميتەلنىي» تولىقمەترلى مۋلتيپليكاتسيالىق ءفيلمى كورسەتىلەدى. ودان بولەك سر ەڭبەك سىڭىرگەن ارتىستەرى, «كىل ساحا» ەتنوستىق مۋزىكا ءانسامبلىنىڭ جانە س.زۆەرەۆ-كىىل ۋولا اتىنداعى سر ۇلتتىق بي تەاترى ۇلتتىق اسپاپتار وركەسترىنىڭ سوليستەرى اننا جانە افاناسي تومسكيلەرمەن ارت-كەزدەسۋ, «كوشپەلى مۋزەي» دەرەكتى ءفيلمىنىڭ كورسەتىلىمى, «كىل ساحا» ەتنوتوبىنىڭ كونتسەرتى جوسپارلانىپ وتىر.
