تۇرمىستىق زورلىق-زومبىلىق – قوعامنىڭ الەۋمەتتىك-ەكونوميكالىق جانە الەۋمەتتىك-مادەني پروبلەماسى. زاڭنىڭ قابىلدانۋى قوعامدى سىلكىندىرىپ, زورلىق-زومبىلىققا توزبەۋشىلىكتى ىنتالاندىرۋعا ءتيىس. بۇل زاڭناما جازالاۋ عانا ەمەس, اقپاراتتىق-اعارتۋشىلىق فۋنكتسيالاردى دا اتقارادى.
قۇجاتتا كامەلەتكە تولماعاندارعا قارسى قىلمىستار ءۇشىن جازا قاتاڭداتىلعان. ادام ءولتىرۋ, زورلاۋ, جىنىستىق سيپاتتاعى زورلىق-زومبىلىق, كامەلەتكە تولماعاندارعا قاتىستى جىنىستىق قولسۇعۋشىلىق, جەكە ادامعا قارسى اۋىر قىلمىستار ءۇشىن ءومىر بويى باس بوستاندىعىنان ايىرۋ جازاسى ەنگىزىلگەن. قابىلدانعان زاڭدا دەنساۋلىققا قاساقانا جەڭىل زيان كەلتىرۋ, دەنە جاراقاتىن سالۋ, ءوزىن-ءوزى ولتىرۋگە يتەرمەلەۋ جانە وعان ىقپال ەتۋ ارەكەتتەرى قىلمىستىق جاۋاپكەرشىلىك جۇكتەيدى. كامەلەتكە تولماعاندارعا قاتىستى جاسالعان بۇل ارەكەتتەر ءۇشىن ۇزاق مەرزىمگە باس بوستاندىعىنان ايىرۋ جازاسى قاراستىرىلعان.
قاساقانا جاسالعان دەنساۋلىققا زيانى ورتاشا ارەكەتتەر ءۇشىن باس بوستاندىعىنان ايىرۋ مەرزىمى ۇلعايتىلدى. ازاپتاۋ ءىسى بويىنشا 7 جىلعا دەيىن باس بوستاندىعىنان ايىرۋ تۇرىندەگى ەڭ جوعارى جازا قاراستىرىلعان. سونداي-اق زاڭدا اتا-انالاردىڭ بالالاردىڭ قاۋىپسىزدىگىن قامتاماسىز ەتۋ جاۋاپكەرشىلىگىن كۇشەيتۋگە دە باسا ءمان بەرىلگەن.
العاش رەت زاڭنامالىق دەڭگەيدە ايەل مەن بالانىڭ قۇقىقتارىن قورعاۋ, سونداي-اق وتباسىن قولداۋ ورتالىقتارىن قۇرۋ ءۇشىن وتباسى ماسەلەلەرى بويىنشا 111 بايلانىس ورتالىعىنىڭ جۇمىس ىستەۋىنە قۇقىقتىق نەگىز جاسالعانىن اتاپ وتكەن ءجون.
جاڭا زاڭنىڭ ورىندالۋىن كەڭىنەن تالقىلاۋعا باستاماشىلىق ەتۋىمىز كەرەك. ءار ازاماتتىڭ مەملەكەت وتباسى مۇشەلەرى اراسىنداعى تۇرمىستىق زورلىق-زومبىلىقتى قولدامايتىنىن ءتۇسىندىرۋ ماڭىزدى. ءبىز زورلىق-زومبىلىقتىڭ بارلىق تۇرىنە «جوق» دەپ ايتۋىمىز كەرەك. بۇل ماسەلەنى نازاردان تىس قالدىرماۋىمىز قاجەت. زاڭنىڭ قابىلدانۋى قازىرگى قوعامنىڭ قانشالىقتى كەمەلدەنگەنىن, زورلىق-زومبىلىقتى قابىلدامايتىنىن كورسەتەدى.
ازيزا شوجەەۆا,
«TechnoWomen» كەۇ باسقارما توراعاسى
