«سولتۇستىك قازاقستان ۋنيۆەرسيتەتىن بىتىرگەننەن بەرى مەن وسى اسسامبلەيادا قىزمەت اتقارىپ كەلەمىن. قازىر «قوعامدىق كەلىسىم» مەكەمەسى باسشىسىنىڭ ورىنباسارىمىن. ۆولونتەرلىك ۇيىمداردىڭ باسىن بىرىكتىرىپ, دوستىق ۇيىندە ورتالىق شتابىن قۇردىق. قازىر بارلىق كۇشىمىزدى ءبىر ارناعا بىرىكتىرىپ, ۇيلەستىرە الامىز», دەيدى ول.
كەشەگى كۇنى تاسقىن سۋعا قارسى كۇرەستە ماريا تاتارەنكونىڭ جولداستارى الدىڭعى قاتاردا ءجۇردى. 25-30 جاستاعى ەر-ازاماتتار قاپشىق تاسىپ جاتسا, قىزدار سولارعا ينەرتتى ماتەريالدار تولتىردى. قولدارى كۇرەكتىڭ سابىنان كۇلدىرەپ, جىلاعان قىزدار دا بولدى. وندايلارعا قولعاپپەن جۇمىس ىستەۋ كەرەكتىگىن كورسەتىپ, كۇلدىرەگەن تەرىسىن بايلاپ بەرىپ جۇرگەن كومەكشىگە كومەك بەرۋشىلەر دە تابىلدى.
ەرىكتىلەردى شاقىرعان حابارلاندىرۋدان كەيىن ماريالاردىڭ كومانداسى 30-40 ادامعا دەيىن كوبەيگەن. اسىرەسە دامبالاردى بەكىتەيىك دەگەن حابارعا 20-30-داعى ەر-ازاماتتار كوپ كەلگەن. «ولاردىڭ كەيبىرەۋلەرىنىڭ تەگىن دە بىلمەيمىز. بارىنە انتون, رومان, دامير, ت.ب. دەپ تەك اتتارىمەن شاقىرامىز. ءبىز نەگىزىنەن تەپليچنىي اۋىلىنداعى دامبانى بەكىتۋگە قاتىستىق. وكىنىشكە قاراي, دامبامىزدى سۋ جارىپ كەتتى. الايدا ۆولونتەر جىگىتتەر قازىر قايىقتارمەن سۋدا قالعان جانۋارلار مەن يتتەردى قۇتقارىپ ءجۇر. كەيدە ادامداردى قۇتقارۋعا قولۇشىن بەرەدى», دەدى ماريا.
ماريا تاتارەنكو كومانداسىنىڭ قازىرگى مىندەتى – قايىرىمدىلىق كومەكتەرىمەن كەلگەن ازىق-ت ۇلىك, ءتۇرلى كيىمدەر, ءبىرىنشى قاجەتتىلىككە قاجەتتى ءدارى-دارمەك, ت.ب. قوراپتارعا سالىپ, حالىققا تاراتۋ. ء«بىز الدىمەن كومەك زاتتارىن ءوزىمىز حالىقتان جيناعان بولاتىنبىز. اركىم قولدا بارىن اكەلدى. مەن حالىقتىڭ جۇرەگىنىڭ كەڭدىگىنە تاڭعالامىن. ءبىر اجەي ءتىپتى «وسىدان باسقا ەشتەڭەم بولماي تۇر» دەپ ۇيىندە تۇرعان ءبىر كيلوگرامم كۇرىشىنە دەيىن اكەلىپتى. اجەي كەتكەن سوڭ قىزدار كوزىمىزدىڭ جاسىن سىعىپ الدىق. قازىر جان-جاقتان كەلگەن قايىرىمدىلىق كومەك كوبەيدى. سولاردىڭ ءبارىن ءبولىپ, قوراپتارعا سالىپ, ادامدارعا تاراتۋدامىز. وعان داميرا دەگەن قىزىمىز باسشىلىق جاساپ, 15 ادام ەڭبەك ەتىپ جاتىر», دەدى م.تاتارەنكو.
ۆولونتەرلەردىڭ نازارباەۆ كوشەسىندەگى «كوممۋنالدىق بازارداعى» تاراتۋ الاڭىنا كەزەككە تۇرعان حالىقتىڭ ۇشى-قيىرى جوق, ءتىپتى ايالداماعا دەيىن سوزىلىپتى. ارينە, بۇلاردىڭ ءبارى تاسقىننان زارداپ شەككەندەر ەمەس ەكەنى ايدان انىق. اراسىندا تەگىن دۇنيەنى الىپ قالايىن دەگەن اشكوزدەر دە جوق ەمەس. كەيبىرەۋلەرى ءتىپتى تەلەفوندارىمەن تانىستارىن, تۋىستارىن دا شاقىرىپ جاتىر. «تەگىن تاراتىپ جاتىر, الىپ قالايىق» دەگەن سوزدەردى ەستىپ قالاسىڭ. ماريا كەزەكتە تۇرعانداردى زارداپ شەگۋشى مە, باسقا ما – ايىرا المايتىنىن ايتتى. ء«بىز تەك قۇجاتتارىن سۇرايمىز. سوسىن مەكەنجايىن جازىپ الامىز. ارينە, كەيبىرەۋلەردىڭ زارداپ شەگۋشى ەمەس ەكەنى ءبىلىنىپ تۇرادى, بىراق وندايدى انىقتاپ جاتۋعا ۋاقىتىمىز دا, قاقىمىز دا جوق. اركىمنىڭ ءوز ۇياتى بىلەدى عوي», دەيدى ول.
ءسويتىپ, وبلىستاعى 8 مىڭداي بەلورۋس حالقىنىڭ وكىلى ماريا دا جۇرتتىڭ بەل ورتاسىندا, ەرىكتىلەردى ۇيىمداستىرىپ, حالىققا قولدان كەلگەن كومەگىن جاساپ ءجۇر. مۇندايلارعا «مىڭ بولعىر» دەپ قالاي ايتپاسسىڭ!
پەتروپاۆل
