«ارحيۆتە كونە باسىلىمداردىڭ تىگىندىسىن قاراپ وتىرعانمىن. سول كەزدەگى باتىس قازاقستان وبلىستىق «پريۋرالسكايا پراۆدا» گازەتىنىڭ 1940 جىلى 4 قاڭتارداعى ءنومىرىنىڭ ءبىرىنشى بەتىندە قارشاداي قازاق قىزىنىڭ سۋرەتى باسىلعان ەكەن. فوتوسۋرەتتىڭ سيپاتتاماسىندا «دوسانوۆا ح.ح.» دەپ جازىلعانىمەن, قازاقتان شىققان قاھارمان ۇشقىش قىزدى بىردەن تانىدىم», دەيدى بىزبەن قۋانىشتى جاڭالىقتى بولىسكەن ولكەتانۋشى ايبولات قۇرىمباەۆ.
«10-سىنىپتىڭ وقۋ ۇزدىگى, №1 (ورال) ورتا مەكتەپ بويىنشا كومسومول كوميتەتىنىڭ حاتشىسى ح.ح.دوسانوۆا ورالداعى وسواۆياحيم جانىنداعى اەروكلۋبتى مەكتەپتەن قول ۇزبەي وقىپ, «جاقسى» دەگەن باعامەن اياقتادى» دەپ جازىلعان ەكەن سۋرەتتىڭ استىندا.
وسى گازەتتىڭ 1940 جىلعى 6 قاڭتارداعى سانىندا «ۇشقىش قىزدار» دەگەن شاعىن ماقالا تاعى جاريالانعان.
«جاقىندا ورال قالاسىنداعى قورعانىس, اۆياتسيا جانە حيميالىق ينجەنەريانى قولداۋ قوعامى جانىنداعى اۋە كلۋبىنىڭ جازعى مەكتەبىندە وقۋ اياقتالدى. كۋرستى بولدىرەۆا, دوسپانوۆا, پاروموۆا سىندى قىزدار جاقسى كورسەتكىشپەن ءتامامدادى. تيموفەەۆ, تسىگانوۆ, گولۋبينوۆ, پيسمەننىي جانە باسقالارى سىناقتان ۇزدىك ءوتتى. بولدىرەۆا مەن پاروموۆا نۇسقاۋشى-ۇشقىش توبىنا قابىلداندى», دەلىنگەن ماقالادا.
سونىمەن بىرگە اۆتور جاستاردىڭ اۋە ىسىنە ەرەكشە قىزىعۋشىلىق ءبىلدىرىپ وتىرعانىن, بيىل كلۋبقا كەلگەن جاستاردىڭ جالپى ءبىلىم دەڭگەيى دە جوعارى ەكەنىن, وسى (1940) جىلى اەروكلۋب ۇشقىشتاردان بولەك, اۋە مەحانيكتەرىن دە دايارلاي باستايتىنىن حابارلاعان.
باتىس قازاقستان وبلىسى
