فوتو: تۋريزم جانە سپورت مينيسترلىگى
سپورت جانە دەنە شىنىقتىرۋ ىستەرى كوميتەتىنىڭ توراعاسى ەربول مىرزابوسىنوۆتىڭ مالىمەتىنشە, ارنايى كوميسسياعا 15 ۇيىمنان ءوتىنىش كەلىپ تۇسكەن.
ازيا ويىندارىنداعى سپورتشىلاردىڭ كيىم ساپاسىنا كەلىپ تۇسكەن شاعىمداردان كەيىن وسى جولى فورماعا ەرەكشە نازار اۋدارىلعان. وليمپيادا ويىندارى كەزىندە فرانتسيا استاناسىندا 40 گرادۋسقا دەيىن ىستىق بولۋى ىقتيمال. سوندىقتان ساراپشىلار پاراد ۇلگىسىندەگى كيىمدەردى ىڭعايلى ماتادان ءارى جەڭسىز تىگۋدى ۇيعارعان.
«ەڭ ءبىرىنشى نۇسقا — تۋ ۇستاپ شىعاتىن اسلانبەك شىمبەرگەنوۆ پەن نادەجدا دۋبوۆيتسكايانىڭ كيىمى. ەكەۋى دە ۇلتتىق ناقىشتا تىگىلەدى. ەر ادامنىڭ كيىمىندە بورىك بولسا, قىزدا ساۋكەلە بار. ەر سپورتشىلاردىڭ باسىندا تاقيا, قىزدار فورماسىنىڭ ءبىر ۇلگىسىندە شالبار, ەكىنشى نۇسقاسىندا بەلدەمشە بولادى. ەكى نۇسقاسى دا قاراستىرىلعان», دەدى ەربول مىرزابوسىنوۆ.
كوميتەت باسشىسى ەل سپورتشىلىارىنىڭ كيىم ۇلگىسى ماراپاتتاۋ راسىمىندە كيەتىن توپتامامەن تولىققانىن اتاپ ءوتتى. جاڭا توپتامانىڭ دا ەر جانە ايەلدەرگە ارنالعان نۇسقاسى قاتار تىگىلەدى.
«سپورتشىلارعا ىڭعايلى بولۋ ءۇشىن شەتەلدىك برەند Joma-دان تولىق 16 نۇسقالى كيىم الىپ بەرەمىز. ونى سپورتشىلار جولدا, دايىندىق كەزىندە كيەدى. بۇل - ساپالى كيىم تىگەتىن حالىقارالىق برەند. ازيا ويىندارىنىڭ قورىتىندىسى بويىنشا, سپورتشىلاردىڭ تالاپ-تىلەكتەرىنە تالداۋ جاساپ, سونىڭ نەگىزىندە حالىقارالىق برەندكە تاپسىرىس بەردىك. سپورتشىلاردىڭ فورماسى دەمەۋشىلەردىڭ ەسەبىنەن تىگىلەدى. 15 نۇسقادان وسى ۇلگى تاڭداپ الىندى. ەندى تىگە باستايمىز», دەدى ەربول مىرزابوسىنوۆ.
ايتا كەتسەك, ارنايى فورما سپورتشىلارعا تورتجىلدىقتىڭ باستى الامانىنا 35 كۇن قالعاندا ۇلەستىرىلەدى.
