وسكەمەندە جاڭا جىل مەرەكەسىنە وراي جارمەڭكە ۇيىمداستىرىلدى

وسكەمەن. 1 قاڭتار. شىعىس قازاقستان وبلىسى باسشىلىعىنىڭ ۇيىتقى بولۋىمەن وسكەمەندەگى «فرەش ماركەت» فەرمەرلىك گاسترونومىنىڭ جانىندا تارباعاتاي اۋدانىنىڭ ازىق-ت ۇلىك جارمەڭكەسى ءوتتى. بۇل تۋرالى egemen.kz ءتىلشىسى حابارلادى. مال شارۋاشىلىعىمەن ايگىلى تارباعاتايلىقتار جارمەڭكەگە 47 باس ءىرى قارا, 83 باس قوي, 1 تۇيەنىڭ ەتىن اكەلگەن ەكەن. سونداي-اق, زايسان كولىنەن تۇعىل اۋىلىنىڭ تۇرعىندارى اۋلاعان ءبىر جارىم توننا بالىق جەتكىزىلدى. ونىڭ سىرتىندا 50 ليتر قىمىز, 50 كيلودان استام سارى ماي, قۇرت-ىرىمشىك, ايران سياقتى ءسۇت ونىمدەرى دە سورەگە قويىلدى. ايتا كەتكەن ابزال, جارمەڭكەدەگى ازىق-ت ۇلىك بازار نارقىنا قاراعاندا 30-40 پايىزعا دەيىنگى تومەن باعامەن ساتىلدى. – جارمەڭكەدە سيىر ەتى 700 تەڭگەدەن ساتىلىپ جاتىر. بازاردا 1200-1300 تەڭگەگە ساتىلاتىنىن ەسكەرسەك, بۇل اجەپتاۋىر تومەن باعا. قىمىزدىڭ ءليترى 300 تەڭگەدەن ساتىلدى. بازاردا كەم دەگەندە 600 تەڭگەدەن باعالانادى. سوندىقتان, مۇندا بارلىق تاۋاردى حالىق بىردەن ساتىپ الىپ كەتتى, – دەيدى قالا تۇرعىنى نادەجدا ۆاسيلەۆنا. شىنىندا, تاڭ اتپاي جارمەڭكەگە اعىلعان جۇرتتىڭ قاراسى قالىڭ ەدى. ءتۇس اۋا فەرمەرلەر بارلىق ونىمدەرىن ساتىپ بولعاندارىن ايتتى. – بۇگىنگى جارمەڭكەدە 22 ميلليون تەڭگەنىڭ ءونىمى ساتىلدى. وعان 17 اۋىلدىق وكرۋگ پەن 54 شارۋا قوجالىعى قاتىستى, – دەدى تارباعاتاي اۋدانىنىڭ اكىمى دىلدابەك ورازباەۆ. دۋمان اناش. دەرەك: egemen.kz. سۋرەت: Altaynews.kz.