سۋرەتتى تۇسىرگەن – ەرلان ومار, «EQ»
ءاربىر ءۇشىنشى وتباسىنا تۇرمىستىق زورلىق-زومبىلىق دەرەكتەرى بولىپ جاتىر. مۇنداي ستاتيستيكالىق مالىمەتتەر, وتباسى ءىسى جونىندەگى ساراپشىلاردىڭ پىكىرى, پەتيتسيا, ميتينگتەرمەن دالەلدەنىپ, دايەكتەلىپ وتىردى. قابىلدانعان زاڭ – ادامداردىڭ قۇقىقتارى مەن ەركىندىگىن قورعاۋعا ءارى مەملەكەتتى دەموكراتيالاندىرۋعا باعىتتالعان قادام.
ەلىمىزدىڭ 12 وڭىرىندە 19 داعدارىس ورتالىعى بار. ورتالىقتىڭ نەگىزگى ماقساتى – تۇرمىستىق زورلىق-زومبىلىققا تاپ بولعان ايەلدەردىڭ قۇقىقتارى مەن بالالاردىڭ قاۋىپسىزدىگىن قامتاماسىز ەتۋ. بۇل سالادا 25 جىلدان بەرى قىزمەت ەتىپ كەلەمىن. «ايەلدەردىڭ قۇقىقتارى مەن بالالاردىڭ قاۋىپسىزدىگى» زاڭىنىڭ قۇرىلۋىنا ءبىز دە قاتىسىپ, جۇمىس توبىندا بولدىق. ەندى زاڭ اياسىندا وتباسىنداعى زورلىق-زومبىلىق, ايەلگە نەمەسە بالاعا قول كوتەرىپ, كۇش جۇمساۋ اكىمشىلىك ىستەن قىلمىستىق ىسكە كوشىرىلدى. ەگەر قىلمىستىق ءىس قوزعالسا, وندا زورلىق كورسەتۋشى باس بوستاندىعىنان ايىرىلادى, وعان ايىپپۇل سالىنادى. وسى تۇرعىدا زورلىق كورسەتۋشىگە ايىپپۇل ەمەس, ونى سوتتالۋ مەرزىمىنە باسىمدىق بەرىلگەنى دۇرىس بولدى. سەبەبى بۇل وتباسىلىق قارجىعا دا بايلانىستى.
سونداي-اق قۇجات نەگىزىندە سوتتىڭ شەشىمىمەن زورلىق كورسەتۋشى ادامدار پسيحولوگيالىق كوررەكتسيادان ءوتۋى مۇمكىن. زاڭ اياسىنداعى بۇل تاجىريبەنىڭ قالاي ىسكە اسىرىلاتىنىن باقىلايتىن بولامىز. داعدارىس ورتالىقتارىندا وتباسىلىق زورلىق-زومبىلىقتان زارداپ شەككەن ايەلدەرگە پسيحولوگيالىق كومەك پەن بىلىكتى زاڭگەرلەر كەڭەس بەرەدى. ورتالىقتا قاجەتتى بارلىق كومەك كوزى قاراستىرىلادى. ورتالىق سوڭعى 5 جىلدا وسى ماسەلە اياسىندا ارنايى ساراپتاما مەن مونيتورينگ جۇرگىزەدى. داعدارىس ورتالىقتارى اۋىل تۇرعىندارىمەن دە ەتەنە بايلانىسىپ, ولارعا دا كومەك كورسەتە الادى.
ءزۇلفيا بايساقوۆا,
داعدارىس ورتالىقتارى وداعىنىڭ باسشىسى
