بۇل جوبادا كاتونقاراعاي وڭىرىندەگى جايلاۋدىڭ التىقىز اتانۋى, ۇلاستى ارۋدىڭ قۇسقا اينالۋى, «الىپ ايەلدىڭ ۇرشىعى» سياقتى وڭىرىمىزگە قاتىستى اڭىزدار توپتاستىرىلعان. جوبانىڭ كوزدەگەنى – شىعىس قازاقستاننىڭ جەر-سۋ اتاۋلارىنا, كيەلى جەرلەرىنە بايلانىستى حالىق اراسىندا ايتىلىپ جۇرگەن اڭىز-اڭگىمەلەردى جيناقتاۋ, ساقتاۋ, ونى دارىپتەۋ. اڭىزداردىڭ ەلەكتروندى نۇسقادا ءۇش تىلدە شىعارىلۋى ىشكى-سىرتقى ءتۋريزمنىڭ دامۋىنا وڭ اسەرىن تيگىزەرى ءسوزسىز.
التاي اڭىزدارى ءارتۇرلى دەرەككوزدەردەن جينالىپ, قازاق, اعىلشىن, ورىس تىلدەرىندە https://anyz.pushkinlibrary.kz پورتالىنا ورنالاستىرىلدى.
– پورتالدى اشساڭىز, ولكەمىزگە قاتىستى بۇرىن-سوڭدى ەستىمەگەن قىزىقتى اڭىزداردى وقۋعا بولادى. مىسالى, قالا شەتىندەگى وزەن نەگە ابلاكەتكا, ال كاتونقاراعايداعى جايلاۋ نەگە التىقىز اتالعانىن, القابەك اتتى جاس جىگىتتىڭ كوڭىلىنەن شىقپاعان ۇلاستى ارۋدىڭ قانداي قۇسقا اينالعانىن, «الىپ ايەلدىڭ ۇرشىعى» وبلىسىمىزدىڭ قاي ايماعىندا ورنالاسقانى تۋرالى قىزىقتى اقپارات الىپ, باسقا دا اڭىزدارمەن تانىسا الاسىز. سونداي-اق پورتالدا شىعىس قازاقستاننىڭ كيەلى جەرلەرىنە ۆيرتۋالدى ساياحات جاساپ, «اق-باۋىر» وبسەرۆاتورياسىن تاماشالاۋعا, التايدىڭ ەڭ بيىك شىڭى – مۇزتاۋعا شىعۋعا, «ىرعىزباي اتا» كەسەنەسىمەن تانىسۋعا بولادى, – دەيدى كىتاپحانانىڭ انىقتاما-بيبليوگرافيالىق ءبولىمىنىڭ قىزمەتكەرى مەرۋەرت جايلىباەۆا.
ايتا كەتەرلىگى, كەز كەلگەن وقىرمان پورتالعا ءوز تۋىندىسىن جاريالاي الادى. ول ءۇشىن اڭىز جەلىسىمەن سۋرەت سالىپ, شىعىستىڭ اسەم جەرلەرىنە جاساعان ساياحاتى جايىندا ايتپەسە, اۆتورلىق اڭىزدار جازۋعا بولادى.
وسكەمەن
