ەلگە قىزمەت ەتەمىز

تاۋەلسىزدىك – قاي حالىق ءۇشىن دە كيەلى, قاستەرلى ۇعىم. ول حالقىمىزعا وڭايلىقپەن كەلگەن جوق.  تاۋەلسىزدىكتىڭ جولىندا اتا-بابانىڭ قانى, انالارىمىز بەن اق جاۋلىقتى اجەلەرىمىزدىڭ كوز جاسى توگىلدى.  ءاز تاۋەلسىزدىك حاقىندا تۇڭعىش پرەزيدەنتىمىز نۇرسۇلتان نازارباەۆتىڭ «قازاق حالقى سان عاسىرلار بويى ءوزىنىڭ ەگەمەندىگى مەن تاۋەلسىزدىگى ءۇشىن كۇرەسىپ كەلدى. ءوزىنىڭ ەڭ جاقسى قاسيەتتەرىنىڭ: قاتەر تونگەن ساتتە بىرىگىپ, ۇيىمداسا ءبىلۋىنىڭ, سونداي-اق, باسقا حالىقتارمەن بەيبىتشىلىك,  كەلىسىم مەن تاتۋ كورشىلىك جاعدايىندا تۇرۋعا دەگەن ىنتا-ىقىلاسىنىڭ ارقاسىندا ول تاريح تاسقىنىنىڭ استىندا قالىپ قويماي, ءوزىنىڭ مەملەكەتتىلىگىن قالپىنا كەلتىرە الدى»,  دەگەنى ويعا ورالادى. بۇگىندە قازاقستان مەملەكەتى تاۋەلسىزدىك تامىرىن تەرەڭگە سالىپ, ۇلى كوشكە ىلەستى. وسى ەلدىڭ ازاماتتارى رەتىندە ەل تاۋەلسىزدىگىن باياندى ەتۋگە, وتانىمىزدىڭ قۋاتىن ارتتىرۋعا, ونىڭ يگىلىگىنە, حالىقارالىق قوعامداستىقتاعى بەدەلىنىڭ وسە تۇسۋىنە قىزمەت ەتۋگە مىندەتتىمىز. قۇرىلعانىنا 60 جىل تولعان «جايىقگيد­رو­گەولوگيا» كاسىپورنى تاۋەلسىزدىكتىڭ العاشقى جىلدارىنداعى بارلىق قيىنشىلىقتاردى ەلمەن بىرگە باستان وتكەردى. تاۋەلسىزدىكپەن بىرگە تىنىسىمىز اشىلىپ, تىرلىمىزگە ءار كىردى. بيىل كومپانيامىز وبلىستىڭ 24 اۋىلىن اۋىزسۋمەن قامتاماسىز ەتۋ ماقساتىندا بارلاۋ  جۇمىستارىن جۇرگىزىپ, ۇكىمەتتىك كوميسسيانىڭ قاراۋىمەن جەر­استى سۋ كەندەرىنىڭ شاماسىن  بەكىتتى. سونىڭ ىشىندە اقجايىق اۋدانىندا بازارتوبە, شابدارجاپ, ءبورلى اۋدانىندا اقبۇلاق, جاڭاقالا اۋدانىندا ايتپاي,  جانىبەك اۋدانىندا جاسقايرات, تالوۆكا, زەلەنوۆ اۋدانىندا بالاعان, ماكاروۆ, ماحامبەت, قاراتوبە اۋدانىندا سونالى, دايىنوتكەل, سىرىم اۋدانىندا بۇلان, قوسوبا, ارالتوبە, بۇلدىرتى, جامبىل, تاسقالا اۋدانىندا امانكەلدى, مەرەي, تەرەكتى اۋدانىندا پويما, نوۆوپاۆلوۆكا, پودستەپنىي, اقسۋات, اقجايىق, پريرەچنىي اۋىلدارىنا تاۋلىگىنە 5 200 تەكشە مەتر مولشەرىندە اۋىزسۋ قورى  انىقتالىپ, بەكىتىلدى. اۋىزسۋعا مۇقتاج بولىپ وتىرعان اقساي قالاسىنا جانە جىمپيتىنىڭ اينالاسىنداعى اۋىلدارعا اقبۇلاق جانە كەڭاششى جەراستى سۋ كەندەرى بارلانىپ, سۋ قورىنىڭ مولشەرى انىقتالدى. سونىڭ ىشىندە كوپتەن بەرى تۇششى سۋ كۇتىپ جۇرگەن سىرىم اۋدانىنىڭ اۋىلدارىنا توپتىق سۋ قۇبىرىن جوبالاۋعا مۇمكىنشىلىكتەر پايدا بولدى. جەرگىلىكتى قۇرىلىس يندۋسترياسىن شيكىزاتپەن جابدىقتاۋ ماقساتىندا جالپى كەڭ تاراعان پايدالى قازبالار بارلانىپ, ولاردىڭ ءوندىرىسىن جۇرگىزۋگە جوبالار بەكىتىلدى. مىسالى, ورال قالاسىنىڭ قاسىنداعى بەلايا گوركا اتتى اق بالشىق, كورشىلەس اتىراۋ وبلىسىنىڭ يندەر اۋىلىنا شەكتەسەتىن تۇستان جۇقا قيىرشىقتى قۇم جانە گيپس, داريان اۋىلى قاسىنداعى قۇم كەندەرى ءوندىرىس جۇرگىزۋگە ازىرلەندى. اۋىزسۋ ماسەلەسى شەشىلمەگەن اۋىلدار وبلىس­تا ءالى دە بارشىلىق. سوندىقتان, اۋىلداردى اۋىز­سۋمەن قامتاماسىز ەتۋ باعىتىنداعى جۇمىستار «اقبۇلاق» باعدارلاماسى بويىنشا جالعاسادى دەپ ويلايمىز. بار ماقساتىمىز, ەلىمىزدىڭ كوركەيۋى ءۇشىن جانە حالىقتىڭ ءال-اۋقاتىن ارتتىرۋ جولىندا قولىمىزدان كەلگەن قىزمەتىمىزدى ادال اتقارۋعا ۇمتىلۋدامىز. بيسەن داۋموۆ, «جايىقگيدروگەولوگيا» جشس باس ديرەكتورى, جەر قويناۋىنىڭ قۇرمەتتى بارلاۋشىسى.