فوتو:depositphotos.com
ادىلەت ءمينيسترى ازامات ەسقاراەۆ اتاپ وتكەندەي, قولدانىستاعى قىلمىستىق زاڭناما اياسىندا قوعامدىق جۇمىستارعا تارتۋ تۇرىندەگى جازا قاراستىرىلعان. قىلمىستىق كودەكستىڭ 43-بابىنا سايكەس سوتتالعاندار تەگىن جۇمىس كۇشى رەتىندە بەلگىلى ءبىر بىلىكتىلىكتى تالاپ ەتپەيتىن قوعامدىق جۇمىستاردى اتقارادى. ولاردى اكىمدىكتەر ۇيىمداستىرادى. ادىلەت مينيسترلىگى وسىعان ۇقساس جازانى اكىمشىلىك قۇقىق بۇزۋشىلىق تۋرالى كودەكسكە (اقبك) ەنگىزۋدى ۇسىندى.
«زاڭ جوباسىندا قوعامدىق جۇمىستارعا تارتۋ تۇرىندەگى اكىمشىلىك جازالاردى جۇزەگە اسىرۋدىڭ ۇقساس تەتىگىن قولدانۋ ۇسىنىلدى, ونى جۇزەگە اسىرۋ اكىمدىكتەرگە تاپسىرىلادى», دەدى ازامات ەسقاراەۆ ءماجىلىستىڭ جالپى وتىرىسىندا.
قوعامدىق جۇمىستارعا ۇساق بۇزاقىلىق (434-باپ) جاساعاندار, الكوگولدى ىشىمدىك ىشكەن نەمەسە قوعامدىق ورىندارعا ماس كۇيىندە بارعاندار (440-باپ), قوعامدىق ورىنداردا قىسىم كورسەتكەندەردى (449-باپ) تارتۋ ۇسىنىلدى.
ايتا كەتەيىك, ۇساق بۇزاقىلىققا قوعامدىق ورىنداردا ادەپسىز سوزدەر ايتۋ, جەكە تۇلعالاردى قورلاۋ, عيماراتتاردى, باسقا قۇرىلىستاردى, تۇرعىن ءۇي-جايلاردى, قوعامدىق ورىنداردى, كولىكتەگى جانە باسقا دا قوعامدىق ورىندارداعى م ۇلىكتى قورلاۋ جانە قوعامدىق ءتارتىپ پەن جەكە تۇلعالاردىڭ تىنىشتىعىن بۇزاتىن ارەكەتتەر جاتادى.
ەستەرىڭىزگە سالا كەتەيىك, 2023 جىلى قوعامدىق ورىنداردا ادەپسىز ءسوز ايتقان ازاماتتارعا ايىپپۇل سالىنا باستادى. بۇگىنگى كۇنى ايىپپۇل 20 اەك-ءتى (2024 جىلى 73 840 تەڭگە) قۇرايدى.
