«ەستىڭ تۇراقتىلىعى» اتتى كارتينانى يسپانيانىڭ سۋرەتشىسى سالۆادور دالي 1931 جىلى سالىپتى. اۋەلدە كولەمى 22ح33 بولاتىن شاعىن كارتينانى بالەندەي پالساپالىق ويمەن باستاماعان. ەرىگەن ىرىمشىكتى كورىپ, قولىنا قىلقالام الا سالعان كورىنەدى. شىعارماشىلىق جۇمىسقا كىرىسكەنى سول, ەرىپ بارا جاتقان ىرىمشىكتى سىناپتاي سىرعىعان ۋاقىتپەن سالىستىرعان. ونىڭ سۋرەت اكادەمياسىنا تۇسكەن كەزدەن-اق باعىتى باسقا ەدى. قاتارلاستارىنان قيالى ۇشقىر, ويلاۋ قابىلەتى وزگەشە بولىپتى. وزىنە ساباق بەرەتىن ۇستازدارمەن پىكىرى قاراما-قايشى كەلە بەرگەن سوڭ وقۋدان شىعىپ, تۇڭعىش رەت پاريجگە اتتانعان. ونداعى ماقساتى, وزىنە ءتان ستيل تابۋ. بەينەلەۋ ونەرىندە وزگەدەن ەرەكشەلەنگىسى كەلگەنىن ءوزى دە جاسىرماعان. ءسويتىپ, پابلو پيكاسسومەن تانىسىپ, شەبەرلىگىن شىڭداعان. ونىمەن بىرلەسە ءجۇرىپ, 1929 جىلى داۋىسسىز فيلم شىعاردى. قىسقامەترلى فيلم پاريج جۇرتىنا عانا ۇسىنىلىپتى. اراعا ەكى جىل سالىپ, سيۋررەاليزم جانرىنداعى «ەستىڭ تۇراقتىلىعى» اتتى كارتيناسىن جازىپ شىققان. كارتيناعا تەرەڭ ۇڭىلسەڭىز, ءار دەتال ماعىناعا يە. البەتتە, اركىم ءارتۇرلى كورىپ, وزىنشە وي تۇيەتىن شىعار. الايدا ونەرتانۋشىلاردىڭ وي-پىكىرى شىنايىلىققا, ناقتىلىققا جەتەلەيدى.
شاعىن كارتينا. ورتادا شىعارماعا ارقاۋ بولعان ىرىمشىك بەينەسى دەرسىز. دۇرىسى, تەرەزەنىڭ الدىندا كۇنگە بالقىعان ىرىمشىك. ءبىر جاعىنان كوزگە ەلەۋسىز قاراپايىم زاتتان سۇلۋلىق كورگەن سۋرەتشىنىڭ ومىرگە دەگەن قۇشتارلىعىن, ىڭكارلىگىن بايقاۋعا بولادى. الايدا ورتاداعى نوقاتتى سۋرەتشى ءوزىنىڭ اۆتوپورترەتى رەتىندە بەينەلەپتى. سۋرەتكە زەر سالساڭىز, كىرپىكتەرى ايقاسا ۇيىقتاپ جاتقان سالۆادور ءداليدىڭ اۆتوپورترەتى. ءبىر قاراپ, اق كورپەنىڭ استىندا جاتىر دەپ تە ويلاپ قالۋىڭىز مۇمكىن. تۋىندىداعى ەلەمەنتتەردىڭ دەنى قوڭىر فونعا بەينەلەنگەن. ارعى پلاندا عانا شەكسىز تەڭىز اسپانمەن استاسىپ جاتىر. ودان بەرى ەتەگىن تولقىن تەپكىلەگەن جاعالاۋداعى جارقاباق مۇنارتادى. ورتاعا سۋرەتشى ءوزىن ۇيقىداعى كەيىپتە بەينەلەپ, ۇستىنە بالقىعان ساعاتتى قوندىرعان. كارتينادان بالقىپ بارا جاتقان ساعاتتىڭ تاعى ۇشەۋىن كورۋگە بولادى. ونىڭ ءبىرى قۋراعان اعاشتىڭ سوستيعان بۇتاعىنا ىلىنگەن دە, ەكىنشىسى تومەندەگى ءتورت قىرلاپ ويىلعان جەردە بەينەلەنگەن. ونىڭ جانىندا ەري قويماعان ساعاتتىڭ سىنىعى جانە جاتىر. ەرەكشە كارتيناعا كوز توقتاتپاي وتە شىعۋ مۇمكىن ەمەس. استار ىزدەپ, سۋرەتشىنىڭ جان دۇنيەسىن اقتارىپ سالعىڭ كەلەدى. قاراپ وتىرساق, اۆتوردىڭ عانا ەمەس, تۇتاس ءبىر الەمنىڭ قۇبىلىسى كورسەتىلگەن تۋىندى. سايىپ كەلگەندە, اركىم باعاسىنا جەتە الماي جۇرگەن – ۋاقىت. ۋاقىت – ءومىر. سەكسەننىڭ سەڭگىرىنەن اسىپ بارىپ, دۇنيەدەن وتكەن سالۆادور ءداليدىڭ ارتىندا جۇزدەگەن كارتيناسى, كوپتەگەن ءمۇسىنى قالدى. مۋلتفيلم جانرىنىڭ مايتالمانى ۋولد ديسنەيمەن كينو سالاسىندا دا ەلەۋلى ەڭبەك ەتتى. ودان باسقا ءتۇرلى كامپيت قاعازدارىنىڭ ديزاينىن جاسادى. ال شىعارماشىلىق جۇمىستارىنىڭ كوبى نيۋ-يوركتەگى ونەر مۋزەيىندە ساقتالعان. اتالعان كارتينادان باسقا سيۋررەاليزم باعىتىنداعى ء«تۇس», «وتقا ورانعان جيراف», «اققۋلاردىڭ ءپىل بولىپ تۇسكەن بەينەسى» سىندى كوپتەگەن جۇمىسى بار. دەگەنمەن سۋرەتشى, جازۋشى سالۆادور دالي عۇمىرىن ونەرگە ارناعانىمەن, «ەستىڭ تۇراقتىلىعى» اتتى ايگىلى كارتيناسىندا ءوزىن ۇيقىداعى كەيىپتە بەينەلەۋىندە نە سىر بار دەرسىز. بالكىم, ءوزىنىڭ ەڭبەكقورلىعىنا, شىعارماشىلىعىنا كوڭىلى تولماعان شىعار. ءوزىن بەينەلەي وتىرىپ, توقتاۋى جوق ومىردە كوپشىلىكتىڭ بەيعام جاتقاندىعىن كورسەتكىسى كەلدى مە؟ راس, كوپتەگەن ءىستى ەرتەڭگە قالدىراتىنىمىز, قالدىرىپ ءجۇرىپ ۇمىت بولىپ كەتەتىنى جاسىرىن ەمەس. التىن ۋاقىتتىڭ قادىرىنە جەتە الماي جۇرگەنىمىز دە شىندىق. ءومىردى وتپەستەي كورەتىنىمىز بار.
كارتيناعا قاراڭىزشى, اناۋ سولعان اعاشتىڭ وزىمەن-اق ءومىردىڭ ولشەۋلى ەكەنىن كورسەتىپ تاستاعان. اعاش قۋراعانىمەن, الەمنىڭ ەشتەڭەسى كەتپەيدى. ول ويىن اناۋ جاتقان كوك تەڭىز بەن زەڭگىر اسپان ارقىلى ايتقان. مەيلى, كىم بولسىن, دۇنيەدەن وتكەنىمەن, مىنا الەم, مىنا ادامدار ءباز-باياعى كەيىپتە تىرشىلىك ەتە بەرمەك. ءيا, قالاي دەگەنمەن, ۋاقىت شىركىن ءوز دەگەنىن الادى. جەر باردا, الەم باردا سالۆادور ءداليدىڭ بۇل كارتيناسى ماعىناسى مەن قۇندىلىعىن جوعالتپاق ەمەس. ەندى كارتينادان كوزىڭىزدى الىپ, جان-جاعىڭىزعا ءبىر قاراڭىزشى, ۋاقىتىڭىز ىرىمشىكتەي بالقىپ بارا جاتقان جوق پا؟
