كىتاپ كورمەسىنە قازاقستان, رەسەي, تۇركيا, يران, وزبەكستان, يسپانيا, قىتاي ەلدەرىنەن باسپا, كىتاپ ساتۋ, تانىمدىق-عىلىمي ءبىلىم بەرۋ جانە پوليگرافيالىق ونىمدەرىن ۇسىناتىن 70-كە جۋىق كومپانيا قاتىسادى.
بيىلعى جوبانىڭ نەگىزگى ماقساتى – بالالار مەن جاسوسپىرىمدەردى كىتاپ وقۋعا باۋلۋ, وتباسىمەن بىرگە كىتاپ وقۋدى ناسيحاتتاۋ, جاستاردىڭ وقىرماندىق تالعامىن قالىپتاستىرۋ, وقىرماندارعا جەتەكشى باسپالاردىڭ كىتاپ ونىمدەرىنىڭ ەڭ جاقسى زاماناۋي اسسورتيمەنتىن ۇسىنۋ, الەمدىك كىتاپ شىعارۋ جانە باسپا يندۋسترياسىنىڭ تاجىريبەسىمەن الماسۋ, الەمدىك باسپالارمەن بايلانىس ورناتۋ جانە باسپا ىسىندەگى جەتىستىكتەردى كورسەتۋ بولىپ وتىر.
«Astana Eurasian Book Fair – 2024» حالىقارالىق كىتاپ كورمە-جارمەڭكەسى ەرەسەكتەرگە دە, بالالارعا دا بىردەي قىزىقتى بولاتىن بەس كۇندىك مادەني-ىسكەرلىك باعدارلامادان تۇرادى. كورمە قوناقتارى مەن قاتىسۋشىلارىن جەتەكشى وتاندىق جانە شەتەلدىك باسپالاردان بالالار ادەبيەتى, كوركەم ادەبيەت, عىلىمي-تانىمدىق ادەبيەتتەردىڭ تۇساۋكەسەرى, بەلگىلى اقىن-جازۋشىلارمەن قولتاڭبا-سەسسيالار, كىتاپ شىعارۋدىڭ وزەكتى ماسەلەلەرى تالقىلاناتىن دوڭگەلەك ۇستەلدەر كۇتەدى. بەس كۇندىك كورمەدە كۇن سايىن ويىن الاڭىندا كىتاپ وقۋ, شەبەرلىك سىنىپتارى, تاعى باسقا دا قىزىقتى ءىس-شارالار وتكىزىلەدى.
ايتا كەتەيىك, كىتاپ كورمە-جارمەڭكەسىن ءداستۇرلى تۇردە «فوليانت» باسپاسى ۇيىمداستىرىپ كەلەدى.
سونداي-اق بيىل كورمەگە كىرۋ اقىلى بولماق. كىرۋ باعاسى – 500 تەڭگە (زەينەتكەرلەرگە, بالالارعا, وقۋشىلارعا, ستۋدەنتتەرگە, كوپبالالى انالارعا, مۇمكىندىگى شەكتەۋلى جاندارعا كىرۋ تەگىن). جينالعان قارجى سۋ تاسقىنىنان زارداپ شەككەن ايماقتارعا جىبەرىلەدى.
