ەكونوميكا ورنىقتى, تابىسىمىز تولىمدى بولعاي!

تاۋەلسىزدىك تاڭى اتقالى بەرى تاۋبە دەيىك, مەملەكەتىمىز الەۋمەتتىك-ەكونوميكالىق دامۋ تۇرعىسىنان تمد ەلدەرى ىشىندە كوشباسشىلىق جولدى باستادى. مۇنى, ارينە, ەلباسى نۇرسۇلتان نازارباەۆتىڭ «...الدىمەن – ەكونوميكا» قاعيداسىن ۇستانىپ, ءبىرىنشى كەزەكتە وتاندىق ەكونوميكانى ءارتاراپتاندىرۋ, حالىقتىڭ ءال-اۋقاتىن كوتەرۋ ساياساتىمەن بايلانىستىرۋعا بولادى. دەربەس مەملەكەت اتانعانىمىزعا شيرەك عاسىرعا ەندى جاقىنداسا دا ءبىزدىڭ قازاقستاندى ەكونوميكالىق, ينۆەستيتسيالىق احۋالى تۇراقتى ەل رەتىندە تورتكۇل دۇنيە تانىدى, تۇڭعىش پرەزيدەنتىمىز نۇرسۇلتان نازارباەۆتى ساياساتكەر, كوشباسشى رەتىندە جاھان جۇرتى مويىندادى. جىل سايىن ۇلتتىق ەكونومي­كانىڭ ءار سالاسى قارقىندى دامۋ باعىتىنان جاڭىلعان جوق. ەلىمىزدە باسەكەگە قابىلەتتى ساپالى ونىمدەر مولىنان وندىرىلۋدە. اۋىلداردا, قالالاردا ءوندىرىس ورىندارى كوپتەپ سالىنۋدا. مۇناي مەن گاز سەكىلدى تابيعي شيكىزاتتارىمىزدى ءوندىرۋ ۇلعايعان سايىن قورشاعان ورتانى قورعاۋ ماسەلەسىنە كوبىرەك ءمان بەرۋدى قولعا الۋىمىزدىڭ قاجەتتىگى تۋىندايدى. ويتكەنى, تال بەسىككە بالايتىن تابيعاتىمىزدى ءبىر ءبۇلدىرىپ الار بولساق, ونى ورنىنا كەلتىرۋ ماشاقاتى دا, شىعىنى دا مولايا تۇسەدى. تابيعات الدىمەن ادامزاتقا قاجەت. ءار ادام تابيعاتسىز ءومىر سۇرە المايدى. ءار ادامعا تازا اۋا, تازا سۋ قانداي قاجەت بولسا, تابيعاتقا دا ادامنىڭ شىنايى جاناشىرلىعى قاجەت. تابيعات – ادامنىڭ ەڭ ءبىرىنشى قورەگى, ەڭ باستى ەمشىسى. قورشاعان ورتا – اۋا, سۋ, جەر قۇرامى ب ۇلىنسە, ادام اعزاسىنا زياندى حيميالىق زات وتە كوپ مولشەردە ءتۇسىپ, دەنساۋلىعى بۇزىلادى. قورشاعان ورتانى قورعاۋدىڭ باستى ءتاسىلى – ەل زاڭدىلىعىن ساقتاۋ, تابيعي شيكىزاتتى وندىرەتىن كاسىپورىنداردى سوعان ۇيرەتۋ. ەلباسىنىڭ ءوزى سولتۇستىك كاسپي جوباسىن يگەرۋشى وپەراتور-كومپانيالارعا كاسپيدىڭ بيولوگيالىق تەپە-تەڭدىگىن ساقتاۋ قاجەتتىگى جونىندە ارنايى تاپسىرما بەرگەنى بار. ويتكەنى, الەمدە كاسپي تەڭىزى سەكىلدى بيولوگيالىق الۋان تۇرلىلىگى ەرەكشە تۇنىق سۋ ايدىنى كەزدەسپەيدى. مۇندا قۇستىڭ سان الۋان ءتۇرى بار, بەكىرە تۇقىمداس بالىقتار وزگە سۋ قويمالارىندا كەزدەسپەيتىندىگىمەن ەرەكشەلەنەدى. اتار تاڭعا ايتار اق تىلەگىم –الدىمەن تاۋەلسىز قازاقستانىمىزدىڭ ابىرويى ارتا بەرسىن, «قوي ۇستىنە بوزتورعاي جۇمىرتقالاعان» دەپ بابالارىمىز ايتقانداي, ەلىمىزدەگى ىنتىماق پەن بىرلىكتىڭ بۋىنى بەكي ءتۇسسىن! قورشاعان ورتامىزدىڭ تازالىعى بۇزىلماسىن, ەڭ باستىسى –حالقىمىزدىڭ دەنساۋلىعى مىقتى بولسىن! ەلىمىز امان, جۇرتىمىز تىنىش, اسپانىمىز اشىق, ەكونوميكامىز ورنىقتى, تابىسىمىز تولىمدى, باق-بەرەكەمىز مول بولعاي! مۇفتاح دياروۆ, گەولوگيا-مينەرولوگيا عىلىمدارىنىڭ دوكتورى, ۇعا اكادەميگى, اتىراۋ وبلىسىنىڭ قۇرمەتتى ازاماتى. اتىراۋ.