الماتىنىڭ بەلسەندى جاستارى شىرشا تويىندا باس قوستى

وڭتۇستىك شاھاردىڭ جوعارى وقۋ ورىندارىندا جاقسى وقيتىن ستۋدەنتتەر, قالانىڭ قوعامدىق ومىرىنە بەلسەنە ارالاسىپ جۇرگەن جاستار بيىل دا قازاق مەملەكەتتىك قىزدار پەداگوگيكالىق ۋنيۆەرسيتەتىندە داستۇرگە اينالعان «قىزدار ۋنيۆەرسيتەتى شاقىرادى» اتتى جاڭاجىلدىق ءان-دۋمان كەشىنە جينالدى. جاڭاجىلدىق كەشكە الماتى قالاسى جاستار ساياساتى جونىندەگى باسقارماسى, قالالىق جاستار ساياساتىن دامىتۋ مەملەكەتتىك قورى, «نۇر وتان» پارتياسى جانىنداعى «جاس وتان» جاستار قاناتى, قازاقستان حالقى اسسامبلەياسى, رەسپۋبليكالىق «جاراسىم» جاس­تار ۇيىمى «قازاقستان ستۋدەنتتەر اليانسى» الماتى قالاسى بويىنشا كوشباسشىلارى, تاعى باسقا جاس­تار ۇيىمدارى اتسالىستى. «جاڭا جىل توسىن سىيلارعا تولى, تاڭعاجايىپ ەرتەگى الەمى ىسپەتتەس», دەگەن قىزدار ۋنيۆەر­سيتەتى جاستارى ودان ءارى «ەرتەگىلەر الەمىندە» اتتى كومپوزيتسيالىق قويىلىمدى, «سانتا كلاۋستار» فلەشموبىن, «اقشاقار» ءبيىن قوناقتار نازارىنا ۇسىندى. ال جاڭاجىلدىق كەشتىڭ قوناقتارى ءداستۇر بويىنشا قوناق كادە­لە­رىمەن بارشا قاۋىمعا شات-شادىمان كوڭىل كۇي مەن ۇلان-اسىر دۋمان سىيلادى. جۇرەككە جىلىلىق ۇيالاتىپ, كوتەرىڭكى كوڭىل كۇي سىي­لاعان كەشتە مەرەكەلىك اندەر ايتىلىپ, بيلەر بيلەندى, ويىندار وينالىپ, ءتۇرلى بايقاۋلار وتكىزىلدى. رەسپۋبليكالىق «جاي­دار­مان ويىندارىنىڭ» ۇزدىك­تەرى, ۋنيۆەرسيتەتىمىزدىڭ «تەك قانا قىزدار» كۆن كومانداسى, «توميريس» بي ءانسامبلى, حالىقارالىق جانە رەسپۋبليكالىق كونكۋرستاردىڭ لاۋرەاتى «ايگۇل» ۆوكالدى-اسپاپتار ءانسامبلى, وزگە دە ونەرپاز قىزدار ءوز ونەرلەرىمەن كەش كوركىن اشا ءتۇستى. ءسانى مەن سالتاناتى كەلىسكەن شارا بارىسىندا الماتى قالاسى جاستار ساياساتى جونىندەگى باسقارما باسشىسى ماركەن احمەتوۆ باستاعان كەش قوناقتارى كەلە جاتقان جاڭا جىل مەرەكەسىمەن قۇتتىقتاپ, قۋانىشتى كوڭىل كۇي سىيلاعان قىزدار ۋنيۆەرسيتەتى باسشىلىعى مەن جاستار ساياساتى بولىمىنە العىستارىن ءبىلدىردى. شارا سوڭىندا جاستار ءىسى جونىندەگى كوميتەتتىڭ ۇيىم­داستىرۋىمەن وتكەن «ەڭ ۇزدىك جاتاق­حانا», «ەڭ ۇزدىك بولمە» بايقاۋىنىڭ قورىتىندىسى جا­ريا­لانىپ, جەڭىمپازدار باعا­لى سىيلىقتارمەن, ماقتاۋ قاعاز­دارمەن ماراپاتتالدى. ايناش ەسالي, «ەگەمەن قازاقستان». الماتى.