بۇل سايىسقا يندونەزيا, كۋۆەيت, قىرعىزستان, قىتاي, موڭعوليا, ومان, وزبەكستان, پاكستان, رەسەي, ساۋد ارابياسى, سيريا, تايلاند, قازاقستان قاتارلى 30 ەلدىڭ 60-تان اسا مەرگەنى «ماجار», «ازيا», «تۇركى» ستيلمەن سايىسقا تۇسەدى.
اتالعان مەملەكەت وكىلدەرىنىڭ قاتىسۋىمەن تاريحتا تۇڭعىش رەت قازاقتىڭ ءتول ونەرى «جامبى اتۋ» ستيلىنەن ازيا قۇرلىق فەدەراتسياسى قۇرىلىپ, باسشىلىعىنا وتاندىق بيزنەسمەن ەركەبۇلان ءىلياسوۆ سايلاندى. بولاشاقتا فەدەراتسيانىڭ كەڭسەسى قازاقستاندا ورنالاساتىندىقتان جيىنعا قاتىسۋشى وكىلدەر وسى مەكەمەنىڭ اتقارۋشى ديرەكتورى رەتىندە ۇسىنىلعان ەلنۇر يساقۇلدىڭ كانديداتۋراسىن بەكىتتى.
سونداي-اق جاڭادان قۇرىلعان فەدەراتسيانىڭ ۆيتسە-پرەزيدەنتى بولىپ قىتاي ەلىنىڭ وكىلى دجانگ لي مىرزا سايلانسا, تورەشىلەرگە توراعالىق ەتۋ مىندەتى وڭتۇستىك افريكا ەلىنىڭ ازاماتى امالي راچكەگە جۇكتەلدى.
باسقوسۋ بارىسىندا قازاقستان جامبى اتۋ فەدەراتسياسىنىڭ ۆيتسە-پرەزيدەنتى باقداۋلەت ءسابيتوۆ جينالعان كوپشىلىككە ازيا جامبى اتۋ فەدەراتسياسىنىڭ الداعى بەسجىلدىق جۇمىس جوسپارىمەن تانىستىرىپ, ۇيىم قۇرامىنا ەنگەن ەلدەرگە جامبى اتۋ سپورتى بويىنشا بولاشاقتا قولداۋلار بولاتىنىن جەتكىزدى.
«بۇگىن ءبىز تاريح بەتىندە ءىز قالدىراتىن ەرەكشە وقيعاعا كۋا بولىپ وتىرمىز. ات ۇستىندە ساداق اتۋدان ازيا فەدەراتسياسىنىڭ باستى ماقساتى – قازاقتىڭ مەرگەندىك ونەرى «جامبى اتۋ» ءستيلىن 2030 جىلى دوحادا وتەتىن جازعى ازيا ويىندارىنا ەنگىزۋ. وسى ماقساتتا قازاقستان تاراپى فەدەراتسياعا مۇشە مەملەكەتتەردىڭ مەرگەندەرىن قولداۋعا دايىن. سونىڭ ءبىر دالەلى – الداعى ءتورت جىلدا فەدەراتسياعا مۇشە مەملەكەتتەرگە ەشقانداي جارنا تولەتپەيدى جانە قارجىلىق كومەك كورسەتەدى», دەدى باقداۋلەت مارات ۇلى.
جيىندا فەدەراتسياعا جاڭادان مۇشە بولعان مەملەكەت وكىلدەرى ساۋالدارىن قويىپ, تۇشىمدى جاۋاپ الدى. بۇيىرسا, الداعى ۋاقىتتا جامبى اتۋدان جىل سايىن ءداستۇرلى تۇردە ازيا چەمپيوناتى, ازيا كۋبوگى جانە حالىقارالىق تۋرنيرلەر وتكىزىپ تۇرۋعا توقايلاستى.
شىمكەنت
