ق.ساتباەۆتىڭ باياناۋىل مەموريالدىق مۋزەيىندە ۇيىمداستىرىلعان سالتاناتتا جينالعاندار ەڭ اۋەلى عالىمنىڭ ەسكەرتكىشىنە گۇل شوقتارىن قويدى. باياناۋىل اۋدانىنىڭ اكىمى ارداق كىسەنتاەۆ, پاۆلودار وبلىسىنىڭ قۇرمەتتى ازاماتى, ەڭبەك ارداگەرى قوراباي شاكىروۆ كوپشىلىكتى قۇتتىقتاپ, لەبىزدەرىن ءبىلدىردى.
مادەني ءىس-شارانىڭ جالعاسى مۋزەيدىڭ ءماجىلىس زالىندا جالعاسىن تاپتى. باياناۋىلدىق مادەنيەت سالاسىنىڭ ارداگەرلەرى, كەزىندە ساتباەۆ مۋزەيىنىڭ اشىلۋىنا مۇرىندىق بولعان ازاماتتار مەن ولكەتانۋشىلار, جەرگىلىكتى پروكۋراتۋرا, سوت باسشىلارى ءسوز سويلەپ, اكادەميكتىڭ ولشەۋسىز ەڭبەگى جونىندە وي تەربەدى. عالىمنىڭ جيەن نەمەرەسى, حانيسا ساتباەۆانىڭ پەرزەنتى ءاليما قاينەكەيقىزى, عابدۇلعازيز ساتباەۆتىڭ شوبەرەسى, گەولوگ مامان عابدۇلعاني ساتباەۆ, سونداي-اق الماتىداعى ۇلتتىق عىلىم اكادەمياسى مەن ق.ساتباەۆ ۋنيۆەرسيتەتىندەگى مۇراجاي وكىلدەرى, ماكەن تورەگەلدين اتىنداعى تاۋ-كەن جانە بالقىتۋ ءىسى تاريحى مۋزەيىنىڭ قىزمەتكەرلەرى بەينەجازبا قۇتتىقتاۋلارىن جولدادى.
تاۋتۇلعانىڭ 125 جىلدىق مەرەيتويى اياسىندا مۋزەيدىڭ ۇيىمداستىرۋىمەن جاس اقىندار اراسىندا «ساتباەۆ جانە ۇلت رۋحانياتى» اتتى وبلىستىق كوركەمسوز وقۋ بايقاۋى وتكەن ەدى. جەڭىمپاز اتانعان كۇننۇر سولتانباي ءوزىنىڭ جىرىن وقىپ بەردى. ءداستۇرلى ءانشى سامال جاقىپوۆا «ەكى جيرەندى», جاندوس اداموۆ جاياۋ مۇسانىڭ «باياناۋىل» اندەرىن ورىندادى.
كەزىندە اقىن قابدىكارىم ىدىرىسوۆ زەيىن شاشكيننىڭ مەرەيتويىنا تارتۋ رەتىندە قازىرگى «باياناۋىل ءۆالسىنىڭ» ءسوزىن جازعانى ءمالىم. وندا: «قانىشى كوپكە ايگىلى», دەگەن جىر جولدارى بولىپتى. اسەرلى ءان كەيىن قانىش ساتباەۆتىڭ قۇلاعىنا شالىنادى عوي. قاشان دا ءوزىن حالىقتان بيىك ۇستاپ كورمەگەن نار تۇلعا بۇل تارماقتى الىپ تاستاۋىن سۇرايدى. وسىلايشا ءان قايىرماسىنداعى «قانىشى كوپكە ايگىلى» دەگەن جول «ۇلدارى كوپكە ايگىلى» بولىپ وزگەرتىلگەن ەكەن. كەشتى مادەنيەت قايراتكەرى رىمبەك بايازيتوۆ اۋداننىڭ گيمنىنە اينالعان ايگىلى «باياناۋىل» ۆالسىمەن قورىتىندىلادى.
ايتىپ وتەرلىگى, سول كۇنى رەسەي فەدەراتسياسىنىڭ توم قالاسىندا اتاقتى جەرلەسىمىزدىڭ قۇرمەتىنە ۇيىمداستىرىلعان جيىنعا ءوڭىر دەلەگاتسياسىمەن بىرگە مۋزەي باسشىسى قايىرگەلدى ابىلعازين قاتىسىپ كەلدى. سونىمەن قاتار ەلوردادا وتكەن «قانىش ساتباەۆ – ۇلت ماقتانىشى» اتتى حالىقارالىق عىلىمي-پراكتيكالىق كونفەرەنتسياعا اكادەميكتىڭ باياناۋىل مەموريالدىق مۋزەيى «قازاقتىڭ قانىشىنا 125 جىل» اتتى جىلجىمالى كورمەسىن اپاردى.
سانسىزباي ساپارعاليەۆ,
باياناۋىلداعى اكادەميك ق.ساتباەۆتىڭ مەموريالدىق مۋزەيىنىڭ قىزمەتكەرى
پاۆلودار وبلىسى
