جەدەل ءىس-شارالار ءجونى
سۋ تاسقىنى كەزىندە ۇزىن-سانى 107 465 ادام, ونىڭ ىشىندە 38 627 بالا قاۋىپسىز جەرگە كوشىرىلسە, 11 786 ادام ۇيىنە ورالدى. ۋاقىتشا ورنالاسۋ بەكەتتەرىنە 7 598 ادام, 3 288 بالا ورنالاستى. كەيىنگى مالىمەتتەرگە سۇيەنسەك, اۆاريالىق-قۇتقارۋ جۇمىستارىندا 32 484 ادام, 3 709 تەحنيكا, 14 اۋە كەمەسى جۇمىلدىرىلعان. تاسقىننىڭ جولىن قولدان كەلگەنشە بوگەپ, ارپالىسقانمەن اتىراۋ, اقتوبە, اقمولا, قوستاناي, باتىس قازاقستان, سولتۇستىك قازاقستان وبلىستارىندا 4 870 جەكە تۇرعىن ءۇي, 1 517 اۋلا, 2 035 ساياجاي سۋ استىندا قالعان. وسى ارالىقتا «جەدەل جەلىگە» 1 667 قوڭىراۋ تۇسسە, ماماندار 123 ازاماتقا شۇعىل پسيحولوگيالىق كومەك كورسەتتى.
قازىر 20 وڭىردە رەسپۋبليكالىق جانە وبلىستىق جەدەل شتابتار جۇمىس ىستەسە, اقتوبە, قوستاناي, باتىس قازاقستان, اقمولا, قاراعاندى, اتىراۋ, سولتۇستىك قازاقستان, ۇلىتاۋ وبلىستارىندا جەرگىلىكتى اۋقىمداعى 36 توتەنشە جاعدايلار قىزمەتىنىڭ مامانى جەدەل قىزمەتكە جۇمىلدىرىلدى. توتەنشە جاعدايلار مينيسترلىگى سۋ باسقان ولكەلەردىڭ تۇرعىندارىن اسا مۇقيات بولۋعا, تاسقىن كەزىندە قاۋىپسىزدىك ەرەجەلەرىن ساقتاپ, ۇيدەن, ەۆاكۋاتسيالاۋ پۋنكتتەرىنەن رۇقساتسىز كەتپەۋگە شاقىرىپ, ەسكەرتەدى.
بۇگىندە سۋ استىندا قالعان وڭىرلەردە 66 مەديتسينالىق پۋنكت جۇمىس ىستەپ تۇر. وندا مەديتسينا ماماندارى مەن پسيحولوگتەردىڭ كەزەكشىلىگى ۇيىمداستىرىلعان. ءدارى-دارمەك پەن مەديتسينالىق بۇيىمداردىڭ قورى جەتكىلىكتى. توتەنشە جاعداي رەجىمى جاريالانعان بارلىق وڭىردە 309 جۇكتى ايەلدىڭ دەنساۋلىعىن دارىگەرلەر باقىلاپ وتىر. وسىعان دەيىن سۋ باسقان ايماقتاردا 253 ايەل بوسانعان. ەۆاكۋاتسيالىق پۋنكتتەردە 5 300-گە جۋىق بالا بار بولسا, ونىڭ ىشىندە 71 بالا ستاتسيونارلىق كومەك, 87 بالا امبۋلاتوريالىق ەم الادى. وسىنداي پۋنكتتەردە مەديتسينالىق جانە پسيحولوگيالىق كومەك كورسەتۋ ءۇشىن 1 116-دان اسا مەديتسينا قىزمەتكەرى, ونىڭ ىشىندە 278 دارىگەر, 838 مەيىرگەر, 79 پسيحولوگ تارتىلعان. سانيتارلىق-ەپيدەميالىق باقىلاۋ ماقساتىندا سۋ تاسقىنىنان زارداپ شەككەن وڭىرلەردە اۋىزسۋ ساپاسىنا تۇراقتى باقىلاۋ جۇرگىزىلىپ كەلەدى.
شىعىنداردىڭ ورنى تولادى
سۋ تاسقىنىنان بۇلىنگەن ۇيلەردى قالپىنا كەلتىرۋ جۇمىستارىن ۇيلەستىرۋ ءۇشىن جەدەل توپتار قۇرىلدى. مەملەكەت باسشىسىنىڭ تاپسىرماسىمەن ونەركاسىپ جانە قۇرىلىس مينيسترلىگى تۇرعىن ءۇيدى, الەۋمەتتىك ينفراقۇرىلىمدى, كوممۋنالدىق شارۋاشىلىق نىساندارىن قالپىنا كەلتىرۋگە قاتىستى شارۋالاردى ۇيلەستىرۋ ءۇشىن 3 جەدەل توپ قۇردى. ونەركاسىپ جانە قۇرىلىس ءمينيسترى قانات شارلاپاەۆ باستاعان ءبىرىنشى جەدەل توپ بىرەر كۇن بۇرىن عانا اقتوبە وبلىسىنا بارعان. مينيستر ىزىنشە اقمولا جانە قوستاناي وبلىستارىنا دا ساپارلاۋدى جوسپارلاپتى. ال قۇرىلىس جانە تۇرعىن ءۇي كوممۋنالدىق شارۋاشىلىق ىستەرى كوميتەتى توراعاسىنىڭ مىندەتىن اتقارۋشى باقىتجان جۇنىسبەكوۆ باستاعان 2-جەدەل توپ پاۆلودار, اباي وبلىسىنا بارعان. «مەمساراپتاما» رەسپۋبليكالىق مەملەكەتتىك كاسىپورنىنىڭ باس ديرەكتورى قۋاندىق قاجكەنوۆ جەتەكشىلىك ەتكەن 3-توپ باتىس قازاقستان, سولتۇستىك قازاقستان وبلىستارىنا اتتانىپ, جالپى احۋالدان حابار الدى. جەدەل توپتىڭ قۇرامىندا اۋىل شارۋاشىلىعى, كولىك, دەنساۋلىق ساقتاۋ, سۋ رەسۋرستارى, توتەنشە جاعدايلار, ەكولوگيا, عىلىم جانە جوعارى ءبىلىم ۆيتسە-مينيسترلەرى, ۇكىمەت اپپاراتىنىڭ ايماقتىق ينسپەكتورلارى دا بار. مىسالى, ولار اقتوبە وبلىسىنا جاساعان ساپاردا سۋ تاسقىنىنان زارداپ شەككەندەرگە تۇرعىن ءۇي سالۋعا دەپ اكىمدىك بولگەن جەر تەلىمدەرىنىڭ جاي-كۇيىن تەكسەردى. اكىمدىك تاراتقان اقپارات بويىنشا بويىنشا وڭىردە 436 دايىن جەر بار. ونىڭ ىشىندە ويىل اۋدانىندا – 321, قوبدا اۋدانىندا – 77, ايتەكە بي اۋدانىندا – 22, تەمىر اۋدانىندا – 10, اقتوبە قالاسىندا 6 جەر بار ەكەن. قانات شارلاپاەۆ وڭىرلەردە جەرگىلىكتى كاسىپكەرلەرمەن, قۇرىلىس كومپانيالارىنىڭ باسشىلارىمەن كەزدەسۋدى ۇمىتپاي, قالپىنا كەلتىرۋ جۇمىستارى بويىنشا جوسپارلاردى تالقىلاعان.
ەسكەرتۋدى ەلەۋسىز قالدىرۋعا بولمايدى
«قازگيدرومەت» رمك-نىڭ حابارلاۋىنشا, اتموسفەرالىق فرونتتاردىڭ سالدارىنان ەلدىڭ باسىم بولىگىندە جاڭبىر جاۋادى. وڭتۇستىك-شىعىس پەن وڭتۇستىكتىڭ تاۋلى ايماقتارىندا جاڭبىر مولىنان تۇسسە, سولتۇستىكتەگى ولكەلەردە ءتۇن جاۋىن-شاشىندى بولادى. بىرنەشە وڭىردە تۇمان, جەل كۇشەيىپ, ەلىمىزدىڭ وڭتۇستىگىندە داۋىل بولادى دەگەن بولجام بار.
ء«تورت وبلىس بويىنشا گيدرولوگيالىق دابىلدى ەسكەرتۋ ساقتالادى. 16 ساۋىرگە دەيىن الماتى وبلىسىندا قار كوشكىنى بويىنشا ەسكەرتۋ جاريالاندى. اباي وبلىسى مەن شىعىس قازاقستان وبلىسى بويىنشا دا دابىلدى ەسكەرتۋ بار. مۇندا اعىندار پايدا بولىپ, وزەندەردە سۋ دەڭگەيى كوتەرىلۋى ىقتيمال. قوستاناي وبلىسىنىڭ سولتۇستىك جانە سولتۇستىك-شىعىسىنداعى وزەندەردە 17 ساۋىرگە دەيىن سۋ دەڭگەيىنىڭ كوتەرىلۋ قاۋپى بار. سونداي-اق جامبىل وبلىسىنداعى تاۋلى جانە تاۋ بوكتەرىندەگى اۋدانداردا 16 ساۋىرگە دەيىن كولبەۋ اعىن قالىپتاسىپ, وزەندەردە سۋ دەڭگەيى كوتەرىلۋى مۇمكىن», دەپ حابارلادى «قازگيدرومەت» رمك ءباسپاسوز حاتشىسى الينا يسماعۇلوۆا.
