ءدىن مەن ءداستۇر – ەگىز ۇعىم

ءدىن مەن ءداستۇر. قازاقتىڭ بولمىسىمەن بىتە قايناسقان بۇل ەكى قاستەرلى ۇعىم قادىم زامانداعى قيلى زاۋالدارعا قارسى تۇرعان, حالىقتى بىرلىككە, تۇتاستىق پەن تاتۋلىققا باعىتتاعان رۋحاني قۇندىلىق. اللا تاعالا قاسيەتتى قۇراننىڭ اعراف سۇرەسىندە: «عافۋ جولىن ۇستا, عۇرىپپەن ءامىر ەت...» دەپتى. تاياۋدا استانا قالاسىنداعى ۇلتتىق سۋرەت گالەرەياسىندا قمدب-نىڭ ۇيىمداستىرۋىمەن «ءدىن مەن ءداستۇر – ەگىز ۇعىم» اتتى رۋحاني كەش ءوتتى. قاسيەتتى قۇران سۇرەلەرىمەن اشىلعان كەشتى قازاقستان مۇسىلماندارى ءدىني باسقارماسىنىڭ توراعاسى, باس ءمۇفتي ەرجان قاجى مالعاجى ۇلى باستاپ, بيىلعى جىلدا اتقارىلعان ءىس-شارالارعا كەڭىنەن توقتالدى. «ءدىن مەن ءداستۇر جىلى» دەپ جاريالانعان بيىلعى جىلدىڭ قورىتىندى كەشىنە قوعام قايراتكەرلەرى, پارلامەنت دەپۋتاتتارى, وبلىس يمامدارى مەن ءدىنتانۋشى عالىمدار, زيالى قاۋىم وكىلدەرى قاتىستى. قازىر ۇلتتىق تابيعاتىمىزبەن ساباقتاس اسىل دۇنيەلەرىمىزدى, جاۋھارلارىمىزدى جارىققا شىعارۋ, ۇزىلگەنىمىزدى جالعاپ, جوعالت­­قانىمىزدى تۇگەندەۋ باس­تى باعىت بولىپ تۇر. سول ارقىلى قازاق­تىڭ تولىققاندى ۇلتقا, الاش­تىڭ ىرگەلى ەلگە اينالۋى ءۇشىن قولدان كەلگەنشە ۇلەس قوسۋ بولىپ تابىلادى. باعدارلاما اياسىندا, بەينە تاسپا, تەرمە, قويىلىم, ايتىس, ءداستۇرلى ءان مەن كۇي راسىمدەرى ءوتتى. ءار كەزەڭنىڭ ءوز بەلەسى مەن ەلەۋلى وقيعالارى بولاتىنداي, ءدىني سالا ءۇشىن دە 2014 جىل تاريحي وقيعالارعا تولى بولدى. قىسقاشا توقتالار بولساق, بيىلعى جىلدىڭ قازان ايىندا قازاقستان مۇسىلماندارى ءدىني باسقارماسى استاناعا قونىس اۋداردى. جىل باسىندا ءدىن سالاسىنداعى ۋاكىلەتتى ورگان مەن قمبد-نىڭ اراسىندا ءوزارا ىنتىماقتاستىق تۋرالى كەلىسىمگە قول قويىلدى. ءدىني باسقارمانىڭ 2020 جىلعا دەيىنگى قىزمەتىن دامىتۋ تۇجىرىمداماسى قابىلدانعان. ەگيپەت پەن تۇركيا­نىڭ ءدىني باسقارمالارىمەن, ءماس­كەۋ قالاسىنداعى يسلام ۋنيۆەر­سيتەتىمەن جاسالعان ۋاعدالاستىڭ شەڭبەرىندە ەلىمىزدىڭ 64 يمامى اتال­عان ەلدەردە ءبىلىمىن جەتىلدىرۋ ۇستىندە ەكەن. رەسپۋبليكا بويىنشا مەشىتتەر جانىنداعى ساۋات اشۋ كۋرستارىندا 22 592 ادام ءدىني ءبىلىم الىپتى. ءدىن قىزمەتكەرلەرى 1ملن. 168 مىڭنان استام تۇرعىن­دارىمىزعا ءدىن جايىندا حالىق­تىڭ كوكەيىندە جۇرگەن ساۋالدارىنا جاۋاپ بەرگەن. وزەكتى ءدىني ماسەلەلەر بويىنشا, سونىڭ ىشىندە «تاكفىرشىلەر», «حيجرات», «جيھاد» ۇعىمدارى جانە قازىرگى زامان تۋرالى 23 ءپاتۋا شىعارىلىپتى. سونداي-اق, قاسيەتتى رامازان ايىندا 17 280 تۇرمىسى تومەن وتباسىنا قايىرىمدىلىق كومەك, 480 رۋحاني شارالار وتكىزىلىپتى. كەش سوڭىندا باس ءمۇفتي ەرجان قاجى مالعاجى ۇلى ەرەن ەڭبەگىمەن تانىلىپ, وسى سالانىڭ وركەندەۋىنە ەلەۋلى ۇلەس قوسقان ازاماتتارعا «العىس حات» تابىس­تاپ, ارنايى ماراپاتتاۋ ءراسىمىن وتكىزدى. قىسقاسى, مۇنداي يگىلىكتى ءىس-شارالار بولاشاقتا دا جالعاسىن تابا بەرمەك. راۋشان تاۋىرحانقىزى, جۋرناليست.