فوتو: استانا اكىمدىگى
استانا اكىمدىگىنىڭ شەشىمى بويىنشا, جەڭىستىڭ 79 جىلدىعىنا وراي سوعىس ارداگەرلەرىنە تولەنەتىن تولەم سوماسى ەكى ەسە ۇلعايدى. ەندى ارداگەرلەر 2 ميلليون تەڭگەدەن الادى. بۇگىنگى تاڭدا ەلوردادا ەكىنشى دۇنيەجۇزىلىك سوعىستىڭ جەتى ارداگەرى تۇرادى.
«سونىمەن قاتار تولەمدەردى ەكىنشى دۇنيەجۇزىلىك سوعىس ارداگەرلەرىنە تەڭەستىرىلگەن ارداگەرلەر (قاتىسۋشىلارى مەن مۇگەدەكتەرىنەن باسقا) (سوعىس كەزەڭىندە قىزمەت وتكەرگەن اسكەري قىزمەتشىلەر, فاشيستىك گەرمانياعا قارسى ءىس-قيمىلدارعا قاتىسقان ادامدار, لەنينگراد قالاسىندا بلوكادا كەزەڭىندە جۇمىس ىستەگەن ازاماتتار, كونتسلاگەرلەردىڭ كامەلەتكە تولماعان تۇتقىندارى, جارالانۋى سالدارىنان مۇگەدەك بولعان اسكەري قىزمەتشىلەر, ازاماتتىق نەمەسە اسكەري ماقساتتاعى نىساندارداعى رادياتسيالىق اپاتتار مەن يادرولىق سىناقتار سالدارىنان مۇگەدەكتىگى انىقتالعان ادامدار جانە ولاردىڭ بالالارى) - 45 اەك (166 140 تەڭگە) مولشەرىندە اقشا الادى», دەپ تولىقتىردى اكىمدىك قىزمەتكەرلەرى.
باسقا ەلدەردىڭ اۋماعىندا وتكەن اسكەري ءىس-قيمىلداردىڭ ارداگەرلەرىنە 45 اەك (166 140 تەڭگە) كولەمىندە اقشا تولەنەدى.
«ارداگەرلەر تۋرالى» قر زاڭىنىڭ كۇشى قولدانىلاتىن باسقا ادامدار (تىل ەڭبەككەرلەرى, قازا تاپقان اسكەري قىزمەتشىلەردىڭ وتباسىلارى, قايتىس بولعان ارداگەرلەردىڭ جۇبايى (زايىبى) – 15 اەك (55 380 تەڭگە) مولشەرىندە الادى.
بۇعان دەيىن الماتى قالاسىندا تۇراتىن سوعىس ارداگەرلەرىنە تولەنەتىن تولەم سوماسى دا ەكى ەسە ۇلعايعانىن حابارلاعان ەدىك.
