فوتو: gov.kz
مەملەكەت باسشىسىنا «قۇرمەتتى قاسىم-جومارت كەمەل ۇلى, بيىلعى جىلدىڭ قىركۇيەك ايىندا ارمەنيا مەن قازاقستان اراسىنداعى دوستىق جانە ىنتىماقتاستىق تۋرالى شارتقا قول قويىلعانىنا 25 جىل تولادى. ارميان-قازاق قارىم-قاتىناستارىنىڭ قازىرگى دامۋ ديناميكاسىن قالاي سيپاتتايسىز؟» دەگەن سۇراق قويىلدى.
پرەزيدەنتتىڭ ايتۋىنشا, بيىلعى جىل ەكىجاقتى قاتىناستار ءۇشىن ەرەكشە جانە سيمۆولدىق جىل بولىپ ەسەپتەلەدى.
«1999 جىلى قازاقستان مەن ارمەنيا قابىلداعان ىرگەلى مەملەكەتارالىق قۇجات – دوستىق پەن ىنتىماقتاستىق تۋرالى شارت – قازاق-ارميان كوپ قىرلى قارىم-قاتىناستارىنىڭ سەنىمدى ىرگەتاسىن قالادى. وسى جىلدار ىشىندە ءبىز ونىڭ ەرەجەلەرىن قاتاڭ ۇستاندىق, ەلدەرىمىز بەن حالىقتارىمىز اراسىنداعى بايلانىستاردى جان-جاقتى كەڭەيتىپ, تەرەڭدەتىپ وتىردىق.
قازىرگى كەزەڭدە استانا مەن ەرەۆاننىڭ قارىم-قاتىناسى اشىق ساياسي ديالوگپەن, ساۋدا-ەكونوميكالىق سالاداعى ىنتىماقتاستىقتىڭ سەرپىندى وسۋىمەن, جان-جاقتى دامىعان مادەني-گۋمانيتارلىق بايلانىستارمەن سيپاتتالادى.
ءبىزدىڭ ەلدەرىمىز الەمدىك ارەنادا بىرلەسىپ جۇمىس ىستەۋدىڭ وڭ تاجىريبەسىن جينادى. ءار ءتۇرلى حالىقارالىق ينستيتۋتتارعا ۇسىنۋ كەزىندە ءبىزدىڭ باستامالارىمىز بەن كانديداتۋرالارىمىزعا ءوزارا قولداۋ كورسەتىلەدى.
وسى مۇمكىندىكتى پايدالانا وتىرىپ, ەۋرازيالىق ەكونوميكالىق وداقتاعى ارميان توراعالىعىنا تابىس تىلەيمىن.
جۇيەلى نەگىزدە پارلامەنتارالىق ارىپتەستىك دامۋدا. ۇكىمەتارالىق دەڭگەيدە ءوزارا ءىس-قيمىل سەرپىندى جۇزەگە اسىرىلۋدا.
شارتتىق-قۇقىقتىق بازا بىرتىندەپ كەڭەيىپ كەلەدى. ارمەنياعا الداعى ساپارىم بارىسىندا ءبىز بىرقاتار جاڭا قۇجاتتاردى قابىلدايمىز.
سوڭعى بەس جىلدا ءوزارا ساۋدا 3,5 ەسە ءوستى. 2023 جىلى تاۋار اينالىمى 23% - عا ءوستى. ارينە, ساۋدا كولەمى ءبىزدىڭ الەۋەتىمىزگە سايكەس كەلمەيدى, بىراق بۇعان ەلدەر اراسىنداعى كۇردەلى كولىك لوگيستيكاسىمەن بايلانىستى وبەكتيۆتى سەبەپتەر بار. دەگەنمەن, ەكسپورتتىق-يمپورتتىق مۇمكىندىكتەر ءوزارا ساۋدانى ايتارلىقتاي كەڭەيتۋ ءۇشىن تاۋاشالاردىڭ بار ەكەندىگىن كورسەتەدى. جاقىندا ەرەۆاندا وتكەن قازاقستان مەن ارمەنيا كاسىپكەرلەرىنىڭ قاتىسۋىمەن وتكەن بيزنەس-فورۋم وسىنى ايقىن كورسەتتى.
مۇندا ساۋدا-ەكونوميكالىق ىنتىماقتاستىق جونىندەگى ۇكىمەتارالىق كوميسسيا - مەملەكەتارالىق ءوزارا ءىس-قيمىلدىڭ نەگىزگى ينستيتۋتى. ول قۇرىلعاننان بەرى 25 جىل ءوتتى.
ءبىز بايلانىستارىمىزدى ودان ءارى تەرەڭدەتۋگە جانە كەڭەيتۋگە نيەتتىمىز. وسى جىلى ارمەنيانىڭ ارارات جانە اراگاتسوتن وبلىستارىندا قازاقستاننىڭ قۇرمەتتى كونسۋلدارىنىڭ قوسىمشا كەڭسەلەرىن اشۋ تۋرالى شەشىم ءبىزدىڭ نيەتىمىزدى ءىس جۇزىندە راستاۋ بولىپ تابىلادى.
استانا مەن ەرەۆان, سونداي-اق باسقا دا قالالار اراسىندا باۋىرلاستىق بايلانىس ورناتۋ بويىنشا قولدا بار جوسپارلار دا وسىعان ىقپال ەتەتىنىنە سەنىمدىمىن.
ىسكەرلىك ىنتىماقتاستىق پەن ءتۋريزمدى دامىتۋعا 2023 جىلى "اقتاۋ – ەرەۆان – اقتاۋ" باعىتى بويىنشا تىكەلەي رەيستەردىڭ اشىلۋى ىقپال ەتەدى.
ونەردى, سپورتتى, ءتۋريزمدى, ءبىلىم بەرۋدى, دەنساۋلىق ساقتاۋدى جانە ت.ب. قامتيتىن مادەني-گۋمانيتارلىق سالا پراكتيكالىق مازمۇنعا تولى.
جالپى, دوستىق, سەنىم مەن ءوزارا تۇسىنىستىككە نەگىزدەلگەن قازاق-ارميان قارىم-قاتىناستارىنىڭ دەڭگەيى ەكى حالىقتىڭ مۇددەسىنە ساي كەلەدى. بىرلەسكەن كۇش-جىگەرمەن ءبىز قازاقستان مەن ارمەنيا اراسىنداعى كوپ قىرلى بايلانىستاردىڭ بارلىق سپەكترىنە جاڭا سەرپىن بەرە الاتىنىمىزعا سەنىمدىمىن», دەدى پرەزيدەنت قاسىم-جومارت توقاەۆ.
