باس اۋرۋى كۇشەيە باستاعان سوڭ, وعان ميدى مرت وتكىزۋ ۇسىنىلعان. مرت-دا ميدىڭ وڭ جاعىنداعى ارتقى ارتەرياسىنىڭ ۇلكەن انەۆريزماسى انىقتالدى. مۇنىڭ كولەمى ۇلعايعاندىقتان, جانىنداعى جۇيكە قۇرىلىمدارىن قىسىپ, كەز كەلگەن ۋاقىتتا جارىلىپ كەتۋ قاۋپىن تۋدىرادى. بۇل جاعدايدىڭ كۇردەلىلىگى, جۇكتىلىكتىڭ 20-اپتاسىندا نەيروحيرۋرگيالىق وپەراتسيا جاساۋ جونىندە شۇعىل شەشىم قابىلداۋ قاجەت بولدى.
ءسويتىپ, الماتى جانە استانا قالالارى نەيروحيرۋرگتەرىنىڭ بىرلەسكەن تالقىلاۋىنان كەيىن سانيتارلىق اۆياتسيا جەلىسى بويىنشا پاتسيەنت ودان ءارى جەدەل ەمدەۋگە ۇلتتىق نەيروحيرۋرگيا ورتالىعىنا جەتكىزىلدى. ۇلتتىق نەيروحيرۋرگيا ورتالىعىنا جاتقىزعان كەزدە ناۋقاستى انا مەن بالا ۇلتتىق عىلىمي ورتالىعىنىڭ انەستەزيولوگتەرى مەن اكۋشەر-گينەكولوگتەرى دە تەكسەرۋگە دايىن بولدى. حيرۋرگيالىق ارالاسۋ مەن اتالعان اۋرۋدىڭ قاۋىپتىلىگىنە قاراماستان وپەراتسيا جاساۋ جانە جۇكتىلىكتى ساقتاپ قالۋ تۋرالى شەشىم قابىلداندى.
قۋانىشتىسى, وپەراتسيا ءساتتى ءوتتى. كەز كەلگەن ساتتە جارىلۋى مۇمكىن «بومبا» زالالسىزداندىرىلدى. نەيروحيرۋرگتەر جۇرگىزىلگەن جۇمىستىڭ ناتيجەسى ويداعىداي ەكەنىن ايتتى. ناۋقاستى ەمدەۋگە انەستەزيولوگ-رەانيماتولوگتەر مەن اكۋشەر-گينەكولوگتەر دە بەلسەندى قاتىستى.
وپەراتسيادان كەيىن ناۋقاسقا قوسىمشا زەرتتەۋلەر جۇرگىزگەن اكۋشەر-گينەكولوگتەر قايتا قاراپ, تەكسەرۋدەن وتكىزدى. جاتىرداعى شارانا مەن جۇكتىلىك بارىسىندا ەشقانداي پاتولوگيا انىقتالعان جوق. قازىر بولاشاق انانىڭ دەنساۋلىعى جاقسى جانە ۇيگە شىعۋعا دايىندالىپ جاتىر.
مي تامىرلارىنىڭ انەۆريزماسىنا وپەراتسيا جاساۋ – مامانداردىڭ جوعارى بىلىكتىلىگىن تالاپ ەتەتىن, زاماناۋي مەديتسينالىق جابدىقتى قاجەت ەتەتىن ەڭ كۇردەلى حيرۋرگيالىق ارالاسۋلاردىڭ ءبىرى. وپەراتسيانى تامىرلى جانە فۋنكتسيونالدى نەيروحيرۋرگيا بولىمشەسىنىڭ مەڭگەرۋشىسى ەربول ماحامبەتوۆ پەن نەيروحيرۋرگ دارىگەر نۇرتاي نۇراقاي جۇرگىزدى.
بۇل وپەراتسيا تەگىن, ياعني ءمامس اياسىندا كۆوتا ارقىلى جاسالدى. ايتا كەتەيىك, مۇنداي وپەراتسيا قۇنى شەتەلدىك ازاماتتارعا اقىلى نەگىزدە شامامەن 5 ملن تەڭگە بولار ەدى.
ۇلتتىق نەيروحيرۋرگيا ورتالىعىنىڭ دارىگەرلەرى مۇنداي كۇردەلى جاعداي كەزىندە انا مەن بالا ءومىرىن تاڭداۋعا ماجبۇرلەيتىن ماسەلە تۋىندامايتىنىن اتاپ ءوتتى. ويتكەنى نەيروحيرۋرگيا مەن انەستەزيولوگياداعى جەتىستىكتەر انا مەن بالانىڭ ەكەۋىنىڭ دە ءومىرىن ساقتاۋعا مۇمكىندىك بەرەدى.
