فوتو: ن.بايبۋلين.
اتالعان زاڭداردىڭ باستى ماقساتى – بالالاردىڭ قاۋىپسىزدىگىن قامتاماسىز ەتۋ ماسەلەلەرى بويىنشا مەملەكەتتىك ساياساتتىڭ قۇقىقتىق, ەكونوميكالىق, الەۋمەتتىك جانە ۇيىمداستىرۋشىلىق نەگىزدەرىن جەتىلدىرۋ, ايەلدەر مەن بالالارعا قاتىستى قىلمىستاردىڭ الدىن الۋ جانە جولىن كەسۋ.
«ايەلدەردىڭ قۇقىقتارى مەن بالالاردىڭ قاۋىپسىزدىگىن قامتاماسىز ەتۋگە پرەزيدەنتىمىز ۇنەمى باسا ءمان بەرىپ كەلەدى. مەملەكەت باسشىسىنىڭ تاپسىرماسى اياسىندا ارنايى زاڭدار ازىرلەندى. وسىلايشا, ايەلدەر مەن بالالاردىڭ زاڭدى مۇددەلەرىن قامتاماسىز ەتۋ جانە ەلىمىزدە وتباسى ينستيتۋتىن نىعايتۋ ءۇشىن قوسىمشا قۇقىقتىق تەتىكتەر ەنگىزىلىپ وتىر. سونداي-اق وتباسىلىق زورلىق-زومبىلىق ءۇشىن جاۋاپكەرشىلىك كۇشەيتىلدى», دەدى ماۋلەن اشىمباەۆ.
سەنات توراعاسى وسى زاڭدار اياسىندا ومىردە قيىن جاعدايعا تاپ بولعان وتباسىلاردى قولداۋعا ارنالعان ەرەجەلەر دە قاراستىرىلعانىن اتاپ ءوتتى. زاڭ نورمالارى ارقىلى ءتيىستى ۋاكىلەتتى ورگانداردىڭ وكىلەتتىكتەرى ايقىندالادى. وتباسىن قولداۋ ورتالىقتارى جانە «111» بايلانىس ورتالىعى سياقتى ۇيىمداردىڭ قۇزىرەتتەرى دە زاڭنامالىق دەڭگەيدە بەلگىلەنەدى.
«ماقۇلدانعان زاڭدارعا سايكەس ەندى دەنساۋلىققا قاساقانا جەڭىل زيان كەلتىرگەنى جانە ۇرىپ-سوققانى ءۇشىن قىلمىستىق جاۋاپكەرشىلىك قاراستىرىلادى. ءوز كەزەگىندە سوت قىلمىستىق قۇقىق بۇزۋشىلىق جاساعان ادامنىڭ تارتىبىنە قاتىستى ەرەكشە تالاپتار بەلگىلەي الادى. سونداي-اق بۋللينگ, كيبەربۋللينگ بالالاردى قوعامدىق كولىكتەن ماجبۇرلەپ ءتۇسىرىپ كەتۋ ارەكەتتەرى ءۇشىن اكىمشىلىك جاۋاپكەرشىلىك كوزدەلىپ وتىر. الداعى ۋاقىتتا بۇل زاڭدار ايەلدەر مەن بالالاردىڭ كونستيتۋتسيالىق قۇقىقتارى مەن مۇددەلەرىن قورعاۋعا تىڭ سەرپىن بەرەدى دەپ سەنەمىز», دەدى پالاتا سپيكەرى.
وتىرىستا پارلامەنت دەپۋتاتتارى باستاماشى بولعان «قر-نىڭ كەيبىر زاڭنامالىق اكتىلەرىنە حالىقتىڭ كوشى-قونى جانە قىلمىستىق-اتقارۋ جۇيەسى سالالارىنداعى زاڭنامانى جەتىلدىرۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ دا ءبىرىنشى وقىلىمدا قارالىپ, ماقۇلداندى. قۇجات حالىقتىڭ كوشى-قونى جانە قىلمىستىق-اتقارۋ جۇيەسى سالاسىنداعى زاڭنامانى جەتىلدىرۋگە ارنالعان. ناقتى ايتقاندا, كامەلەتكە تولماعانداردىڭ جىنىستىق قول سۇعىلماۋشىلىعىنا قارسى قىلمىستارى ءۇشىن سوتتالعان شەتەلدىكتەردىڭ ەلىمىزگە كىرۋىن جانە قر ازاماتتىعىن الۋىن شەكتەۋ كوزدەلگەن. ودان بولەك, ەكسترەميستىك نەمەسە تەرروريستىك ارەكەتتەرگە قاتىسى بار شەتەلدىكتەردىڭ ەلگە كىرۋىنە تىيىم سالىنادى. زاڭدا وڭىرلەرگە قونىس اۋدارۋشىلار ءۇشىن جاعداي جاساۋعا جانە «قانداس» مارتەبەسىن بەرۋ ءراسىمىن جەتىلدىرۋگە ارنالعان وزگەرىستەر دە بار.
سونداي-اق پالاتا وتىرىسىندا سەناتورلار ولگا بۋلاۆكينا, سەرىك شايداروۆ, رۋسلان رۇستەموۆ, سۇلتان دۇيسەمبينوۆ, ساكەن ارۋباەۆ, بەكبولات ورىنبەكوۆ, عالياسقار سارىباەۆ, سۇلتانبەك ماكەجانوۆ, بيبىگۇل جەكسەنباي ءتۇرلى ماسەلەلەر بويىنشا دەپۋتاتتىق ساۋالدارىن جولدادى.
