ءوڭىردى ەلەكتر قۋاتىمەن قامتاماسىز ەتىپ وتىرعان «باتىس قازاقستان ايماقتىق ەلەكتر جەلىلىك كومپانياسى» جشس بۇگىندە ءارتۇرلى كەرنەۋدەگى 20 531 شاقىرىم ەلەكتر جەلىسىنە قىزمەت كورسەتەدى ەكەن. سۋ تاسقىنىنا بايلانىستى العاشقى اپات ناۋرىزدىڭ 26-ءسى كۇنى بولدى. سول كۇنى توقتاۋسىز جاۋعان جاۋىن-شاشىنعا بايلانىستى ورال قالالىق ەلەكتر تورابى ءوشىپ, زاچاگانسك, 2 جۇمىسشى, ەسكى اۋەجاي شاعىناۋداندارىندا 2879 ابونەنت جارىقسىز قالدى. ابىروي بولعاندا 2 ساعات ىشىندە اقاۋ جويىلدى.
«تاسقىن سۋعا بايلانىستى تابيعي سيپاتتاعى توتەنشە جاعداي جاريالانعان ساتتەن باستاپ وبلىس اۋماعىندا ەلەكتر جەلىلەرىندە 6 مارتە اقاۋ شىقتى. ماسەلەن, قاراتوبە اۋدانىندا – 1 وقيعا, سىرىم اۋدانىندا – 3, شىڭعىرلاۋ مەن ءبورلى اۋداندارى بويىنشا - 1 وقيعادان بولدى. بارلىعى 1803 ابونەنت جارىقسىز قالدى. ءبىز جەدەل قيمىلداپ, 1 ساعات پەن 2 كۇن اراسىندا اپاتتى جويىپ, جارىقتى قوستىق», دەيدى وبلىستىق ەنەرگەتيكا جانە تۇرعىن ءۇي-كوممۋنالدىق شارۋاشىلىق باسقارماسىنىڭ باسشىسى ميراس مۇلكاي.
قازىر وڭىرلىك توتەنشە جاعدايلار دەپارتامەنتىنىڭ بۇيرىعىمەن, جايىقتان تاسىعان سۋ باسۋ قاۋپىنە بايلانىستى دەركول كەنتىنە قاراستى ماشتاكوۆ, ياگودكا, ۇمىتكەر ساياجايلارى, پودستەپنىي ورتا مەكتەبىنىڭ عيماراتى, يۆۋشكا شيپاجايى, زدوروۆە باۋ-باقشا سەرىكتەستىگى, كارديولوگيالىق ورتالىق ماڭىنداعى ساياجايلار ەلەكتر جەلىسىنەن اجىراتىلعان. سونداي-اق شىڭعىرلاۋ اۋدانىنداعى اششىساي اۋىلى, بايتەرەك اۋدانىنداعى ماحامبەت اۋىلىندا دا ءىشىنارا جارىق بەرۋدى توقتاتۋعا تۋرا كەلگەن.
«سۋ قاۋىپسىز دەڭگەيگە تۇسكەن سوڭ بۇل ەلدى مەكەندەردى ەلەكترمەن جابدىقتاۋدى قالپىنا كەلتىرەمىز», دەيدى ميراس رۇستەم ۇلى.
قازىر ەلەكترمەن جابدىقتاۋشى كومپانيا تەحنولوگيالىق اپاتتاردى جەدەل جويۋ ءۇشىن 10 بريگادا, 35 قىزمەتكەر جانە 10 تەحنيكانى ازىرلەپ قويعان.
ءتىلسىز جاۋ تابيعي گاز جەلىلەرىنە دە از زاقىم كەلتىرمەدى. سۋ تاسقىنى باستالعالى بەرى «قازترانسگاز ايماق» اق باتىس قازاقستان وندىرىستىك فيليالى جۇمىسشىلارى سۋ باسقان 5 اۋداننىڭ بىرنەشە ەلدى مەكەنىندە گاز بەرۋدى ۋاقىتشا توقتاتۋعا تۋرا كەلدى.
مىسالى, 30 ناۋرىز كۇنى حالىقتى ەۆاكۋاتسيالاۋعا بايلانىستى ورال قالاسىنا قاراستى ماشتاكوۆ اۋىلىنان – 94 تۇتىنۋشى, قاراتوبە اۋدانىنىڭ قورجىن اۋىلىنان – 90 ءۇي, تەرەكتى اۋدانىنىڭ اڭقاتى اۋىلىنان – 37 ابونەنت, ءبورلى اۋدانىنىڭ اقسۋ, كەڭتۇبەك, باقتىارال, ارالتال, پۋگاچەۆ اۋىلدارىنان – 237 ءۇي, سىرىم اۋدانىنىڭ بۇلدىرتى جانە قوسارال اۋىلدارىنان – 31 ابونەنت كوگىلدىر وتىنسىز قالدى. بارلىعى 489 تۇتىنۋشىنىڭ تۇرعىن ۇيىنە كىرە بەرىستەگى كراندار قاۋىپسىزدىك ءۇشىن ءوشىرىلدى.
31 ناۋرىزدا تەرەكتى اۋدانى پودستەپنوە اۋىلىنا ەرىگەن سۋدى اعىزۋ كەزىندە ەكسكاۆاتور ورتاشا قىسىمدى دۋ – 160 مم جەراستى پوليەتيلەن گاز قۇبىردى زاقىمداپ العان بولاتىن. سونىڭ سالدارىنان پودستەپنوە اۋىلىنداعى جەكە سەكتوردىڭ 1877 تۇتىنۋشىسى مەن 47 كوممۋنالدىق كاسىپورىن گازسىز قالدى. سول كۇنى اپات ورنىنا 15 ادام, 2 ەكسكاۆاتور, 2 اپاتتىق جوندەۋ گاز كولىگى, 2 اپاتتىق گاز كولىگى جينالىپ, زارداپتى جويۋعا كىرىستى. 2-ساۋىردە بۇزىلعان گاز قۇبىرى قالپىنا كەلتىرىلدى. بىراق ەرىگەن سۋدى اعىزۋ ءۇشىن جەر قازىپ جۇرگەن ەكسكاۆاتور پودستەپنىي اۋىلىنىڭ شەتىندە دۋ-160مم ورتاشا قىسىمدى گاز قۇبىرىن تاعى دا بىرنەشە رەت زاقىمدادى. جەكە سەكتورداعى 1877 تۇتىنۋشى مەن 47 كوممۋنالدىق كاسىپورىن ۋاقىتشا گازسىز قالعانىمەن, سول كۇنى گاز بەرۋ قالپىنا كەلتىرىلدى.
ال ءساۋىردىڭ 3-ءى كۇنى كەشكى ساعات 18:00-دە سۋ باسۋ قاۋپى بار ەلدى مەكەندە جەكە سەكتوردىڭ گاز شۇمەگى جابىلدى. 556 تۇتىنۋشى ۋاقىتشا گاز جەلىسىنەن اجىراتىلدى.
سوڭعى كۇندەرى وبلىس اۋماعىنا رەسەيدەن تاسقىن سۋ ۇزدىكسىز كەلىپ, وزەندەردە سۋ دەڭگەيى كوتەرىلىپ جاتىر. وسىعان وراي 4-ساۋىردە سۋ باسۋ قاۋپى بار ەلدى مەكەندەردەگى جەكە سەكتوردىڭ 961 تۇتىنۋشىسى تابيعي گازدان اجىراتىلدى. 8-ساۋىردە ساياجايلار مەن جەكە تۇرعىن ءۇي سەكتورىندا تۇراتىن 922 تۇتىنۋشى دا گازسىز قالدى. مۇنىڭ ءبارى قاۋىپسىزدىك ءۇشىن جاسالعان امالسىز شارا.
«تاسقىن قاۋپى سەيىلگەن ەلدىمەكەندەردە كوممۋنالدىق قىزمەت جەلىلەرىن بىردەن قالپىنا كەلتىرەمىز», دەيدى ميراس مۇلكاي.
باتىس قازاقستان وبلىسى
