ايتۋلى ونەر وقيعاسى قارساڭىندا «استانا وپەراعا» ارنايى بارىپ, تەاتر تىنىسىمەن تانىسىپ قايتقان ەدىك. قىزۋ قاربالاس ورتاسىندا جۇرگەن Astana Opera حالىقارالىق اكادەمياسىنىڭ تىڭداۋشىلارى, قويۋشى ديريجەر, قويۋشى رەجيسسەر مەن سۋرەتشىلەر اتالعان پرەمەرانىڭ دايىندىق جۇمىستارى مەن ىزدەنىستەرى تۋرالى ايتىپ بەردى.
الدىمەن باس سۇققانىمىز – تىگىن تسەحى بولدى. مۇندا كوستيۋم تىگۋ ءىسىنىڭ شەبەرلەرى قويۋشى رەجيسسەر نيكولاي كۋليكوۆتىڭ ويىن جۇزەگە اسىرۋ ءۇشىن تالماي ەڭبەك ەتىپ جاتىر. وتكىر قايشىنىڭ دامىلسىز قايشىلانۋى مەن تىگىن ماشيناسىنىڭ ماتا ۇستىندەگى ۇزدىكسىز ءجۇرىسىنىڭ ناتيجەسىندە ارتىستەردىڭ ۇستىنە اسەم كيىمدەر ءاپ ساتتە قونا قالدى: – كوستيۋمدەر ارقىلى كونە كوشە تەاترلارىنىڭ تىنىس-تىرشىلىگىن بەينەلەۋگە بولادى. ول كەزدە تەاترلىق كيىمدەر قاراما-قارسى تۇستەر مەن رەڭكتەردە جاسالاتىن, ال ارتىستەردىڭ بەتتەرىندە اپپاق گريم بولاتىن. كوستيۋمدەردى تىگۋ كەزىندە جاككارد, زەرلى جانە كوستيۋم ماتاسى كوبىرەك قولدانىلدى. ءازىل-سىقاق ۇستەۋ ءۇشىن كەيبىر كەيىپكەرلەردىڭ بەينەلەرى شامالى اسىرەلەنگەن. جالپى, كوستيۋم جاساۋ تۇجىرىمداماسى تاريحي ءپىشۋدى زاماناۋي كيىم ەلەمەنتتەرىمەن بىرىكتىرۋدى ماقسات ەتەدى, – دەپ جۇمىس بارىسىن كوستيۋمدەر بويىنشا سۋرەتشى داريعا تايشىقوۆا بايانداپ بەردى.
ال قويۋشى ديريجەر رۋسلان بايمۋرزين وركەستر ارتىستەرى مەن اكادەميا تىڭداۋشىلارىن ماڭايىنا ۇيىستىرىپ, گ.دونيتسەتتيدىڭ مۋزىكاسىن ورىنداۋ ەرەكشەلىكتەرى بويىنشا جۇمىس ىستەپ, دايىندىقتاردى مۇقيات جۇرگىزىپ جاتىر. ونەر يەسىن كومپوزيتوردىڭ پارتيتۋراعا سالعان ەموتسيونالدىق مازمۇنىن جەتكىزۋگە تىرىسىپ, مۋزىكانتتارعا تۋىندى تابيعاتىن بارىن سالىپ ءتۇسىندىرىپ جاتقان جەرىنەن جولىقتىردىق. ديريجەر ترۋپپا ىزدەنىسى تۋرالى كەڭىنەن اڭگىمەلەپ بەردى.
– بۇل – دونيتسەتتيدىڭ «استانا وپەرا» افيشاسىنداعى وسىمەن ءۇشىنشى وپەراسى. «قوڭىراۋ نەمەسە ءدارىحاناشىنىڭ نەكە ءتۇنىن» ءبىز Piccolo تەاترى جوباسى اياسىندا Astana Opera حالىقارالىق وپەرا اكادەمياسىنىڭ سوليستەرىمەن بىرگە ورىندايمىز. گ.دونيتسەتتيدىڭ باسقا دا شىعارمالارىمەن قاتار «قوڭىراۋ» دا وپەرا تەاترلارىنىڭ ساحناسىندا ءجيى قويىلادى. مۋزىكاسى وتە اسەم, بىراق سونىمەن بىرگە ورىنداۋشىلار ءۇشىن ايتارلىقتاي كۇردەلى, ويتكەنى كومپوزيتوردىڭ ستيليستيكاسى ءمىنسىز ۆوكالدىق تەحنيكا مەن يتاليا ءتىلىن جاقسى ءبىلۋدى تالاپ ەتەدى. سەبەبى وپەرادا رەچيتاتيۆتەر وتە كوپ. جالپى, دونيتسەتتي – تاماشا دراماتۋرگ قوي, سوندىقتان ايتۋلى قويىلىمنىڭ وقيعا جەلىسى كورەرمەنىن بىردەن ەلىكتىرىپ اكەتەدى. بۇل پرەمەرا كوپشىلىك قىزىعۋشىلىعىن وياتقان ءساتتى جۇمىس بولادى دەگەن ويدامىن, – دەيدى رۋسلان بايمۋرزين.
ارتىستەر دە ديريجەر ءسوزىن قۋاتتاپ, سپەكتاكلدىڭ ۇلكەن ىنتانى تالاپ ەتەتىنىن باسا ايتتى. كومەديالىق وپەرا بولعاندىقتان شىعارماشىلىق جۇمىس بارىسى البەتتە قىزىقتى ءوتىپ جاتىر. دايىندىقتا اكادەميستەر كوپ ازىلدەسىپ, سۋىرىپ سالۋ ونەرلەرىن پاش ەتتى. البەتتە, ولار ساحنادا جارقىن, قىزىقتى كەيىپكەرلەردى سومداي الاتىندارىنا جانە العاش رەت ەلوردادا قارت ءدارىحاناشى مەن جاس جۇبايىنىڭ حيكاياسىن ايتاتىندارىنا قاتتى قۋانىشتى.
– «قوڭىراۋ» وپەراسىنداعى ءدارىحاناشىنىڭ پارتياسى – ەڭ باستى پارتيا. بارلىق ءىس-ارەكەت باس كەيىپكەردىڭ اينالاسىندا ءوربيدى. ارينە, مۋزىكالىق ورىنداۋ جاعىنان دا, اكتەرلىك ويىن تۇرعىسىنان دا بۇل ءرولدىڭ وزىندىك قيىندىقتارى دا بار. كومەديالىق كەيىپكەر دون اننيبالە قيىن جاعدايدا قالادى. جاس قىزعا ۇيلەنگىسى كەلگەنىمەن, قالىڭدىعىنىڭ عاشىعى بۇعان كوندىگە الماي, شىم-شىتىرىق وقيعا باستالىپ كەتەدى. پارتيا وپەرا-بۋففا داستۇرلەرىنە ساي جازىلعاندىقتان وتە قىزىقتى. بىراق ەڭ قيىنى – كەيىپكەردىڭ بارلىق كومەديالىق حاراكتەرىن كورەرمەنگە جوعارى دەڭگەيدە شىنايى جەتكىزۋ, – دەپ اتاپ ءوتتى ۆالەري سەليۆانوۆ. ءارتىستىڭ ساحناداعى جۇبى, سەرافينانىڭ بەينەسىن سومداۋعا دايىندالىپ جاتقان فيرۋزا راحمەتوۆا دا ارىپتەسىمەن ءبىر پىكىردە:
– مەنىڭ جاتتاپ جاتقان پارتيام كوڭىلدى بولۋىمەن قاتار, ءوزىنىڭ كوپ قىرلىلىعىمەن كۇردەلى جانە ول اكتەرلىك ويىندى ايتپاعاندا, ەموتسيالار مەن مىندەتتەردىڭ ۇلكەن شوعىرىن قامتيدى. وندا دۋەت, تەرتسەت جانە رەچيتاتيۆتەر بار. مەن كومەديالىق وپەرالاردى قاتتى جاقسى كورەمىن. بۇل ءرول – مەنىڭ وپەرا-بۋففانى ورىنداۋداعى دەبيۋتىم. سوندىقتان دا ايتۋلى پارتياعا اسقان قىزىعۋشىلىقپەن, تەبىرەنىسپەن جانە جاۋاپكەرشىلىكپەن قارايمىن. سپەكتاكلگە دايىندىق قارقىندى ءجۇرىپ جاتىر, وعان اكادەميانىڭ بارلىق تىڭداۋشىسى جۇمىلدىرىلعان. ءبىز كونە كوشە تەاترى فورماتىن ءوز پايىمداۋىمىزدا تانىستىرعىمىز كەلەدى. كوڭىلدى كەش وتكىزىپ, Astana Opera حالىقارالىق وپەرا اكادەمياسى تىڭداۋشىلارىنىڭ ورىنداۋىنان ۇمىتىلماس اسەر الۋ ءۇشىن كورەرمەندەر «قوڭىراۋ» وپەراسىنا قۋانا كەلەدى دەپ ويلايمىن, – دەپ فيرۋزا راحمەتوۆا ءسوزىن قورىتىندىلادى.
«قوڭىراۋ نەمەسە ءدارىحاناشىنىڭ نەكە ءتۇنى» اتتى قايتالانباس كومەديالىق وپەرانىڭ پرەمەراسى 11-12 ءساۋىر كۇندەرى «استانا وپەرا» تەاترىنىڭ ك.بايسەيىتوۆا اتىنداعى كامەرالىق زالىندا كورەرمەنىن كۇتەدى.
