ىرعىز اۋدانىنىڭ اقشي ەلدى مەكەنىندە ءبىر ۇيگە, قاراساي ەلدى مەكەنىندە ءۇش ۇيگە سۋ كىردى. وسى كۇندەرى تاسقىننىڭ بەتى قايتىپ, وزەن ارناسى ءسال تومەن تۇسسە دە, تۇرعىنداردىڭ سۋ كىرگەن باسپانالارىنا كىرۋى وتە قاۋىپتى. تاسقىن سۋ امانكول, قىزىلجار, نۇرا, قۇمتوعاي, ىرعىز اۋىلدارى تۇرعىندارىنىڭ ورىسكە شىعارعان مالىن اعىزىپ كەتكەن, بىرنەشە قىستاۋعا, قوراعا سۋ كىردى. وسى اۋىل تۇرعىندارى دالالىقتاعى مالىنىڭ قانشاسى سۋعا كەتكەنىن بىلە الماي وتىر. ويتكەنى, جايىلىمداعى مالدى تۇگەندەۋگە سۋ تارتىلعانشا ەشقانداي مۇمكىندىك جوق. ال اۋىل شەتىنە دەيىن جايىلعان سۋدىڭ قاشان كەرى تەبەتىنى بەلگىسىز.
ىرعىز وزەنىنە بىرنەشە باعىتتان سۋ كەلەدى. وسى وزەننىڭ مۇعالجاردان باستاۋ الاتىن شەتىرعىز, تالدىق, ايتەكە بي اۋدانى اۋماعىنان كەلەتىن باقسايىس, ولكەيەك سالالارى تاسىپ بولدى. ەندى تورعاي وزەنىنەن كەلەتىن كولەمدى سۋ بار. تورعاي بۇل جاققا ارناسىنان اسىپ كەلسە, نۇرا ەلدى مەكەنىنە قاۋىپ توندىرمەكشى. نۇرا – ىرعىز جانە تورعاي وزەندەرىنىڭ قوسىلاتىن جەرى. ەكى وزەننىڭ سۋى وسى جەردە قوسىلىپ, بىرگە اعىپ قۇردىم دەگەن جەردە جەر استىنا سىڭەدى.
قازىرگى تاڭدا ىرعىز وزەنىنىڭ سۋى ءتاۋىپ اۋىلدىق وكرۋگىنىڭ قۇيلىس, جايساڭباي اۋىلدىق وكرۋگىنىڭ جايساڭباي ەلدى مەكەندەرىنە بارىپ, وسى جاقتاعى كەۋىپ كەتكەن شاعىن كولدەردى تولتىردى. بۇل جاققا ەندى سۋدان قاۋىپ ءتونىپ تۇرعان جوق. تورعاي وزەنى مەن ىرعىز وزەنىنىڭ تەلعارا سالاسىنان كەلەتىن تاسقىننان قاۋىپتەنگەن نۇرا جانە مامىر اۋىلدارىنىڭ تۇرعىندارى اۋىل شەتىندەگى بوگەتتەردى بيىكتەتۋگە كىرىستى.
اقتوبە وبلىسى
