بۇگىندە اقتوبە وبلىسىندا سۋدىڭ تاسۋ قاۋپى باسەڭدەدى, بىراق جاعداي كەز كەلگەن ۋاقىتتا وزگەرىپ كەتۋى مۇمكىن. اسىرەسە, اۋداندارداعى بوگەتتەر مەن دامبىلار توسىننان كەلگەن تاسقىنعا توتەپ بەرە الماي جاتىر. سونىڭ ءبىرى – ايتەكە بي اۋدانىنداعى «ششەرباكوۆ» بوگەتى مەن العا اۋدانىنداعى سىيىمدىلىعى 15,8 ملن تەكشە مەتر بولاتىن ماعادجان سۋ قويماسى. 1985 جىلى پايدالانۋعا بەرىلگەن ماعادجان دامبىسى «تۇلپار» جشس-ءى سەرىكتەستىگىنىڭ يەلىگىندە بولىپ شىقتى. گيدروتەحنيكالىق قۇرىلعى العا اۋدانىنداعى جەكە شارۋا قوجالىعىنىڭ سۋ جينايتىن بوگەتى رەتىندە پايدالانىلىپ, مەملەكەتتىك قاداعالاۋ قىزمەتىنەن تىس قالعانى سۋ قويماسىنىڭ بوگەتى جانىندا ورنالاسقان بەسقوسپا اۋىلىنا قاۋىپ تونگەندە بەلگىلى بولدى. ماعادجان سۋ قويماسىنىڭ جانىندا ورنالاسقان بەسقوسپا اۋىلىنىڭ 200 تۇرعىنى ۇلتتىق ۇلانعا تيەسىلى «مي-171ە» ۇشاعىمەن بەستاماق اۋىلىنا ەۆاكۋاتسيالاندى. ماعادجان قويماسىنىڭ بوگەتىن بۇزىپ وتكەن قارعىن سۋ بەسقوسپا اۋىلىنىڭ ۇيلەرى مەن اۋلاسىنا كىردى. قازىرگى كەزدە وسى اۋىل تۇرعىندارى بەستاماق مادەنيەت ۇيىنە ۋاقىتشا ورنالاستىرىلدى. سونداي-اق بەستاماققا قىزىلتۋ اۋىلىنان 25 ادام, تابانتال قىستاعىنان 11 ادام كوشىرىلدى.
ايتەكە بي اۋدانىنداعى تەرەڭساي دامبىسىنىڭ بۇزىلۋىنان ايكە اۋىلىنا سۋ كىردى. اقتوبە وبلىسىنا كومەككە كەلگەن قىزىلوردا وبلىستىق تجد قىزمەتكەرلەرى ايكە اۋىلىنان 188 ادامدى ۇرمەلى قايىقپەن تەرەڭساي جانە ت. جۇرگەنوۆ اۋىلدارىنا ەۆاكۋاتسيالادى جانە تىكۇشاقپەن سۋ ايدىندارىنىڭ جاعدايىن باقىلادى. موتوپومپانىڭ كومەگىمەن 4 مىڭ تەكشە مەتر سۋ سورىلىپ, تەرەڭساي بوگەتىندەگى سۋ ارناسىن باسقا باعىتقا بۇرۋ جۇمىستارى جۇرگىزىلدى.
