جولدى قالپىنا كەلتىرۋگە كىرىستى

پاۆلودار وبلىسىنىڭ ەرتىس اۋدا­نىنداعى ۇزىنسۋ اۋلى­نا تونگەن سۋ تاسقىنى قاۋپى «اتا­مەكەن – ەرتىس – رۋسسكايا پوليانا» اۆتوجولىنداعى قوزعا­لىس­تى شەكتەۋگە ماجبۇرلەدى. جەرگىلىكتى اتقا­رۋشى ورگاننىڭ شەشىمىمەن جولدىڭ 207 شاقىرىمىندا ەرىگەن قار سۋىن وتكىزۋ ءۇشىن جول ۋچاسكەسىن بۇزۋعا تۋرا كەلدى. سوندىقتان پانفيلوۆ اۋلىنان رەسەي شەكاراسىنا دەيىنگى 194–263 شاقىرىم ارالىعىندا كولىكتىڭ بارلىق ءتۇرى­نىڭ قوزعالىسىنا شەكتەۋ قويىل­دى. قاۋىپسىز جول قوزعالىسىن قام­تاماسىز ەتۋ ماقساتىندا تاۋلىك بويى باقىلاۋ ورناتىلدى. 

كەيىنگى كۇندەرى حالىقارالىق جانە رەسپۋب­ليكالىق ماڭىزى بار اۆتوموبيل جولدارىندا دا تاسقىن سۋدىڭ قاۋپى كۇشەيگەن. اۋا رايىنىڭ كۇرت جىلىنۋى مەن قاردىڭ تەز ەرۋىنىڭ سالدارىنان اباي, باتىس قازاقستان, قاراعاندى, قوستاناي, ۇلىتاۋ وبلىستارىندا 5 جول ءجۇرۋ ۋچاسكەسىندە جالپى ۇزىندىعى 940 مەتر بولاتىن تەلىمدەردى تاسقىن سۋ باسقان. اتالعان 5 وبلىستاعى رەسپۋبليكالىق ماڭىزى بار 5 اۆتوموبيل جولىندا ۇزاقتىعى 249 شاقىرىم بولاتىن تەلىمدەردە قوزعالىسقا شەكتەۋ قويىلدى. قازىر رەسپۋبليكالىق جولداردا 252 بىرلىك تەحنيكا مەن 280 ادام جۇمىلدىرىلعان.

اقمولا وبلىسىنداعى «ما­كينسك – اقسۋ – تورعاي» تاسجو­لىنىڭ 24-شاقىرىمىنداعى ساۋلە كەنتىن­دە دە جول شەتىندە ەرىگەن قار سۋى­نىڭ تاسقىنى انىقتالدى. ونىڭ ۇزىندىعى 15 م-ءدى, ال بيىكتىگى 5 سم-ءدى قۇراعان. ول جەردە سۋ تاسقىنىنىڭ الدىن الۋ, جول بەلگىلەرىن ورناتۋ, دابىل بەلگىشەلەرى قويىلدى. ايتسە دە, قوزعالىسقا شەكتەۋ قويىلعان جوق. اتالعان جۇمىسقا 6 بىرلىك تەحنيكا مەن 11 ادام جۇمىلدىرىلدى. جالپى, وبلىستىڭ قوسشى, جىبەك جولى, اتباسار ەلدى مەكەندەرىندە «قازاۆتوجول» ۇك» اق ماماندارى ەرىگەن قار سۋىنىڭ الدىن الۋ ماقساتىندا جۇمىس ىستەپ جاتىر. شاراعا 27 بىرلىك ارنايى تەحنيكا تارتىلعان.

باتىس قازاقستان وبلىسىنىڭ اۋماعىنداعى رەسپۋبليكالىق ما­ڭىزى بار «پودستەپنوە – فەدو­روۆكا – رەسەي شەكاراسى» تاس­جولىنىڭ 35-شاقىرىمىندا ەرىگەن قار سۋىنىڭ سالدارىنان جول توسەمىن سۋ بۇزدى. ماماندار دەرەۋ شارا قابىلداپ, ينەرتتى ماتەريالداردى توسەپ, جوندەۋ جۇمىستارىنا 20 مامان مەن 14 تەحنيكا شاقىرىلىپ, جولدى قالپىنا كەلتىردى. قازىر كولىكتەر ءۇشىن قوزعالىس قايتا اشىلعان.

سوڭعى اقپاراتقا سايكەس رەس­پۋب­ليكالىق ماڭىزى بار اۆتوموبيل جولدارىندا اباي, اقمولا, قاراعاندى, قوستاناي وبلىس­تا­رىنىڭ اۋماعىندا 4 جول ۋچاسكەسىندە سۋ تاسقىنى بولدى. اتالعان 4 وبلىستاعى 4 اۆتوموبيل جولىندا ۇزاقتىعى 216 كم بولاتىن تەلىمدەردەگى قوزعالىسقا شەكتەۋ قويىلدى. قازىرگى ۋاقىتتا رەسپۋبليكالىق جولداردا 696 بىرلىك تەحنيكا مەن 1 618 ادام بۇزىلعان جولداردى قالپىنا كەلتىرۋ جۇمىس­تا­رىمەن شۇعىلدانىپ جاتىر.

وعان قوسا اقمولا مەن قوستاناي وبلى­سىندا 2 جول ءجۇرۋ ۋچاسكەسىندە جالپى ۇزىن­دى­عى 109 مەتر بولاتىن تەلىمدى سۋ  باسىپ قالعان. ال اقتوبە, قاراعاندى, قوس­تا­ناي, پاۆلودار وبلىستارىنا تيەسىلى رەس­پۋب­لي­كا­لىق ماڭىزداعى 4 اۆتوموبيل جولىندا (ۇزىندىعى 196 كم) كولىك قوزعالىسى توق­تا­تىل­دى. رەسپۋبليكالىق جولداردا 283 بىرلىك تەح­نيكا مەن 319 ادام تاسقىن سۋ زاردابىن قال­پىنا كەلتىرۋمەن اينالىسىپ جاتىر.