اڭگىمە قارجى پيراميداسى تۋرالى. مۇنى قۇرۋشىلار كەز كەلگەن تۇرعىنعا ۋادەنى ءۇيىپ-توككىش. از ۋاقىت ىشىندە مول تابىسقا كەنەلەتىنىن ايتىپ, وزدەرىنە تارتادى. ءتاتتى سوزبەن «باۋرايدى». سودان سوڭ جوسپارداعىداي توپ قۇرىلىپ, ولاردان ءتيىستى اقشا اۋدارىمدارى تۇسكەننەن كەيىن ءىزىم-قايىم جوعالادى. قۇمعا سىڭگەن سۋداي تاپتىرمايدى. ال الدانعان توپ الاسۇرا ءجۇرىپ, قۇقىق قورعاۋ ورىندارىن جاعالايتىنى بەلگىلى.
قارجى پيراميدالارى قاتىسۋشىسىن سەندىرۋ ءۇشىن جالعىز ءادىس بار. ول ءۇشىن پيراميدانىڭ جاڭا مۇشەلەرى سالعان قاراجاتتى پايدالانادى. دۇرىسى, پيراميدانىڭ العاشقى قاتىسۋشىلارىنا ديۆيدەند كەيىنگى قاتىسۋشىلاردىڭ سالىمدارى ەسەبىنەن تولەنەدى. سونداي-اق بارىنشا سەندىرۋ ءۇشىن جالعان قۇجات, كۇماندى تسيفرلىق ەسەپ, دياگرامما مەن سحەمالاردى كورسەتىپ, الداۋ نەمەسە قوماقتى تابىس تاباتىنى تۋرالى ۋادە بەرىپ, جارناماسىنا بەلگىلى ادامدى تارتادى. بۇعان تانىمال ءانشى, بلوگەر نەمەسە اكتەردى پايدالانادى. ەكىنشىدەن, قارجى پيراميدالارىن ۇيىمداستىرۋشىلاردىڭ جەتىك ءبىلىمى بار. كوبىنە ولار ءىت-تەحنولوگيا بويىنشا مامان, ادامداردىڭ ەموتسيالارىمەن «ويناي» الاتىن جاقسى پسيحولوگ پەن سوزگە شەشەن بولىپ كەلەدى.
قارجى پيراميدالارىن قۇرۋدا الەۋمەتتىك جەلى مەن مەسسەندجەر ماڭىزدى ءرول اتقارادى. بىراق اتالعان كومپانيالاردىڭ قىزمەتىن جەلىلىك ماركەتينگپەن شاتاستىرماۋ كەرەك. ونداعى ادامدار ءۇشىن بەلگىلى ءبىر پايىز تولەيدى, بىراق سونىڭ نەگىزىندە ءونىم الىپ, سونى ساتقانى ءۇشىن ناقتى تابىس تابادى. ال قارجى پيراميداسىنىڭ نەگىزىن سالىمشىلاردىڭ اقشاسى قۇرايدى. پيراميدا سحەماسى مىناداي: جەلىدە ولار سىزگە جوعارى كىرىسى بار ونلاين-جوباعا ينۆەستيتسيا سالۋدى ۇسىنادى. ونىڭ جاي سحەمادان ايىرماشىلىعى – سىزگە جاڭا قاتىسۋشىلاردى تارتۋ مىندەت ەمەس. سىزگە تەك بەلگىلى ءبىر سومانى سالدىرىپ, جوبا ىسكە قوسىلعاننان كەيىن اسا جوعارى تابىسقا كەنەلۋگە ۋادە بەرەدى. الايدا ۇيىمداستىرۋشىلار قوماقتى سوما جيناعاننان كەيىن الگى جوبانى جابادى دا, جوعالىپ كەتەدى. ءبىراز ۋاقىت وتكەننەن كەيىن كوپشىلىككە جاڭا جوبانى جارنامالاپ, سول سحەمانى قايتالاي باستايدى.
ءتيىستى ماماندار قارجى پيراميداسىنا قاتىستى مىنانى ەسكەرتەدى. بىرىنشىدەن, ولار كىرىس جارناسىن ەنگىزۋدى ۇسىنادى ءارى نارىقتىق دەڭگەيدەن بىرنەشە ەسە ارتىق جوعارى پايدا تاباتىنىڭىزعا كەپىلدىك بەرەدى. ەكىنشى بەلگىسى – الەۋمەتتىك جەلىلەردەگى جارناما كومپانياسى ارقىلى سالىمشىلاردى بەلسەندى تۇردە تارتادى. ودان سوڭ باسقا كليەنتتەردى تارتقانى ءۇشىن سىياقى بەرۋگە ۋادە ەتەدى. ۇشىنشىدەن, كومپانيانىڭ قارجىلىق جاعدايى تۋرالى ناقتى اقپارات جوق. دۇرىسى, قارجى نارىعىن رەتتەۋ جانە دامىتۋ اگەنتتىگى بەرگەن حالىقتىڭ اقشالاي سالىمدارىن تارتۋعا نەمەسە باعالى قاعازدار نارىعىندا قىزمەتىن جۇزەگە اسىرۋعا ارنالعان ليتسەنزياسى بولمايدى.
قارجىلىق مونيتورينگ اگەنتتىگىنىڭ ينتەرنەت-رەسۋرسىندا قارجى پيراميدالارى رەتىندە قىزمەتكە كۇدىكتى, سونداي-اق ولار بويىنشا سوت ۇكىمدەرى شىعارىلعان ۇيىمداردىڭ كەڭەيتىلگەن تىزبەسى جاريالانعان. قاراجاتىن ينۆەستيتسيالاعىسى كەلگەن ازامات كومپانيانىڭ سەنىمدىلىگىن قارجى نارىعىن رەتتەۋ جانە دامىتۋ اگەنتتىگىنىڭ, سونىمەن قاتار قارجىلىق مونيتورينگ اگەنتتىگىنىڭ تىزىمىنەن تەكسەرە الادى. سونداي-اق اگەنتتىكتىڭ Baiqa, piramida Telegram بوتى ارقىلى ۇيىمنىڭ پيراميداعا قاتىسى, الاياقتىق بەلگىلەرىنىڭ بار-جوعىن بىلۋگە بولادى.
قارجى پيراميداسىن قۇرعانى ءۇشىن قىلمىستىق كودەكستىڭ 217-بابى بويىنشا م ۇلىكتى تاركىلەۋمەن 12 جىلعا دەيىن باس بوستاندىعىنان ايىرۋعا, بەلگىلى ءبىر لاۋازىمدار بويىنشا قىزمەت ەتۋ نەمەسە بەلگىلى ءبىر قىزمەتپەن اينالىسۋ قۇقىعىنان ايىرۋعا دەيىنگى قىلمىستىق جاۋاپتىلىق كوزدەلگەن. اكىمشىلىك قۇقىق بۇزۋشىلىق زاڭىنىڭ 150-بابى بويىنشا پيراميدا قىزمەتiنىڭ جارناماسىن شىعارعانى, تاراتقانى ءۇشىن اكىمشىلىك جازا بار جانە 150 ايلىق ەسەپتىك كورسەتكىشتەن 600 ايلىق ەسەپتىك كورسەتكىشكە دەيىنگى مولشەردە ايىپپۇل سالىنادى.
