وليمپيادا: ساتتارحاننان سابىرحانعا دەيىن

عاسىر توعىسىنداعى جازعى وليمپيا ويىندارىندا بوكس­شىلار 12 سالماق دارەجەسىندە سىنعا ءتۇستى. تۇرسىنعالي ەدىلوۆ باپتايتىن ۇلتتىق قۇراما بوكسشىلار جەتى سالماقتا عانا جولداما يەلەندى. جەتى جام­پوزدىڭ تورتەۋى وليمپيادانىڭ فينالىنا شىقتى. قازاق سپورتىنىڭ تاريحىندا بۇعان دەيىن دە, ودان كەيىن دە وليمپيادانىڭ فينالىنا ءتورت بىردەي بوكسشىمىز جەتە العان ەمەس. راس, 2016 جىلى ريو جازعى وليمپيا ويىندارىندا ءۇش بوكسشىمىز فينالعا شىعىپ, 1 التىن, 2 كۇمىس مەدال بۇيىردى.

بەكزات 2000 جىلى سيدنەي وليمپيا­داسىنا اتتانعاندا ەرەسەكتەر ساپىنا ەندى وتكەن شاعى ەدى. ءتىپتى ەل چەمپيوناتىندا 57 كگ سالماقتا جەڭىسكە جەتپەسە دە, باپكەرلىك قۇرام قارشىعاداي ۇلدىڭ قيادان قاعىپ تۇسەر قىران مىنەزىنە سەندى. 1998 جىلى ارگەنيتانىڭ بۋەنوس-ايرەس قالاسىندا بوكستان جاستار اراسىندا الەم چەمپيو­ناتى تۇڭلىگىن ءتۇردى. فينالدىق دوداعا دەيىن بارلىق قارسىلاسىن ەركىن ەڭسەرگەن 18 جاستاعى بەكزات ۋكراينالىق سەرۆين سۇلەيمەنوۆكە ەسە جىبەرىپ, كۇمىس مەدالدى مىسە تۇتتى. اراعا ەكى جىل سالىپ قازاقتىڭ ۇلى الەمدى تەڭسەلتەرىن تورتكۇل دۇنيە تۇيسىنە قويعان جوق ول كەزدە. وزگە تۇ­گىل ءوز ەلىمىزدە دە بەكزات ساتتارحانوۆتىڭ وليمپ شىڭىنا شىعاتىنىنا سەنگەندەر از ەدى.

سيدنەيدە وتكەن وليمپيا ويىندارىنا 57 كيلودا 32 بوكسشى كەلگەن. العاشقى اينالىمىندا رۋمىن وۆيديۋ بوبيرناتتى 11:5 ەسەبىمەن ەڭسەردى. ەكىنشى اينالىمدا وڭتۇستىكافريكالىق دجەففەري ماتەبۋلانى دا ءىرى ەسەپپەن (16:5) ىعىس­تىردى. شيرەك فينالدىق ايقاستا ەۋروپا چەمپيونى, 65 ميلليون تۇرىك حالقى ءۇمىت ارتقان رامازان ءپاليانيدى 12:11 ناتيجەسىمەن جەڭىپ, رينگتەگى قارسىلاسىن ەڭىرەتكەندە ەتەگىن جاسقا تولتىردى. جاز­عى وليمپيا ويىندارىنا العاش رەت قا­تىسقان جيىرماداعى جامپوزدىڭ ءتور­تىنشى جەكپە-جەگى ماروككولىق تاحار تامسامانيگە قارسى ءوتتى. جەڭسە – فينال! سوڭعى راۋندتىڭ گونگ ءۇنى ەستىلگەندە 22:10 ەسەبى تىركەلدى. فينالدا قارسىلاسى الەم چەمپيوناتىندا توپ جارىپ, التىن مەدال ەنشىلەگەن ريكاردو حۋارەستى دە ءىرى ەسەپپەن ۇتتى: 22:14.

بەكزاتتىڭ فەنومەنى سول – ول سيدنەي وليمپياداسىندا حۋارەستەن بولەك, الەم چەمپيوناتىنىڭ ەكى بىردەي جۇلدەگەرىنىڭ مىسىن باستى. وۆيديۋ بوبيرنات پەن رامازان پالياني دە 1999 جىلى حيۋستوندا قولا جۇلدەگەر اتانعان, سىرالعى بوكسشىلار ەدى.

ەل سپورتىنىڭ تاريحىندا بوكستان قازاق ۇلتىنان شىققان تۇڭعىش وليمپيادا چەمپيونى بەكزات ساتتارحاننىڭ ورنىن وسى سالماقتا بوكسشىلارىمىز قان­شالىقتى بۇتىندەپ, سەنىمدى اقتاپ كەلەدى دەگەنگە قاتىستى بىرەر ءسوز. افي­نى وليمپياداسىندا 57 كگ سالماقتا گاليب جافاروۆ شيرەك فينالدا ءسۇرىنىپ, 5-ورىنمەن اياقتاسا, بەيجىڭدە دە جافا­روۆقا سەنىم ارتىلعان, 28 بوكسشى اراسىندا 17-ساتىعا تۇراقتادى. لوندوندا قا­نات ءابۋتالىپوۆ 9-ورىنمەن شەكتەلدى. ريو وليم­پياداسىندا قايرات ەراليەۆ ىرىكتەۋدەن اسا العان جوق. توكيو جازعى وليم­پيا ويىندارىندا سەرىك تەمىرجانوۆ تا شيرەك فينالعا جەتپەي ءسۇرىندى. بيىل پاريج وليمپياداسىندا 57 كگ سالماقتا الەم چەمپيونى, ماحمۇد سابىرحان جولداما ولجالادى. ماحمۇدتىڭ دا جاسى – 22-دە. بەكزات ساتتارحان سالعان سوقپاقتىڭ سورابىمەن وليمپ شىڭىنا شىقسا, ودان كەيىن سول بيىگىنە ەكى, ءۇش مارتە ات شالدىرسا ەكەن دەيمىز. ەلدىڭ تىلەگى – وسى.