گرەك-ريم كۇرەسى ەل قۇراماسىنىڭ قورجىنىندا ازىرگە جالعىز جولداما بار. ونىڭ يەگەرى – نۇرسۇلتان تۇرسىنوۆ. 87 كگ سالماقتا كۇرەسەتىن 33 جاستاعى سەمەي ءوڭىرىنىڭ تۋماسى پاريج وليمپياداسى قارساڭىندا وسى جارىستا كۇش سىناسۋدى قۇپ كورگەن ەكەن. نەگىزى نۇرسۇلتان بۇعان دەيىن ازيا چەمپيوناتتارىندا ءتورت رەت جەڭىس تۇعىرىنا كوتەرىلدى. 2014 جىلى ول باس جۇلدەنى ولجالاسا, 2015 پەن 2023 جىلدارى كۇمىستى يەلەندى. ال 2022 جىلى قولاعا قول سوزدى. بىشكەكتەگى باسەكەنى تۇرسىنوۆ پەن ونىڭ باپكەرلەرى عالامدىق دوداعا دايىندىق رەتىندە قاراستىرىپ وتىر.
بىلتىر استانادا ۇيىمداستىرىلعان ازيا چەمپيوناتىندا ەلىمىزدىڭ «كلاسسيكتەرى» اراسىنان جالعىز يبراگيم ماگومادوۆ (77 كگ) قانا التىن تۇعىرعا كوتەرىلگەن ەدى. ول كەزدە وتانداسىمىز 72 كگ سالماقتا ونەر كورسەتتى. بيىل 33 جاستاعى قاراعاندى وبلىسىنىڭ وكىلى وليمپيادالىق سالماققا اۋىستى. بىراق استاناداعى ەل بىرىنشىلىگىندە ماگومادوۆ ءۇشىنشى ورىننان اسا المادى. سونىڭ سالدارىنان ول ليتسەنزيالىق تۋرنيرگە قاتىسۋ مۇمكىندىگىنەن ايىرىلدى. دەسەك تە بىلتىرعى ناتيجەنى قايتالاپ, قاتارىنان ەكىنشى جىل ازيا چەمپيونى اتانسا, تاعى ءبىر التىن يبراگيمنىڭ تاقياسىنا تار كەلمەيتىن انىق.
جاستار اراسىنداعى الەم بىرىنشىلىگىنىڭ كۇمىس جانە قولا جۇلدەگەرى يۋسۋپ ماتسيەۆ (97 كگ), ەۆگەني پوليۆادوۆ (82 كگ) پەن ازيا چەمپيوناتىنىڭ قولا جۇلدەگەرى مانسۇر شادۋكاەۆقا (130 كگ) دا زور سەنىم ارتىلىپ وتىر. وسى ساڭلاقتارمەن قاتار بىشكەكتىڭ بوزكىلەمىندە نۇرزات قابدىراقىموۆ (55 كگ), عالىم قابدۋناساروۆ (60 كگ), ەرجەت جارىلقاسوۆ (63 كگ), الماتبەك امانبەك (67 كگ), نيكولاي حاپكو (72 كگ) ونەر كورسەتەدى.
ەركىن كۇرەستەن دە ازىرگە وليمپيادانىڭ جالعىز جولداماسىن قاناعات تۇتىپ وتىرمىز. سول جولدامانىڭ يەگەرى ازامات داۋلەتبەكوۆ تە الاتاۋدىڭ ارعى بەتىندە ايقاسۋعا تاۋەكەل ەتتى. 86 كگ سالماقتا كۇش سىناسىپ جۇرگەن 30 جاستاعى اتاقتى بالۋان كەيىنگى ەكى الەم چەمپيوناتىندا قولا مەدالدى قانجىعاسىنا بايلادى. سارى قۇرلىقتىڭ باستى دوداسىندا ەكى مارتە تەڭدەسسىز دەپ تانىلدى. بۇل جولى ازاماتتىڭ ءۇشىنشى مارتە التىن تۇعىرعا كوتەرىلۋىنە تاماشا مۇمكىندىك بار.
ەلىمىزدىڭ ەركىن كۇرەس تاريحىنداعى تۇڭعىش الەم چەمپيونى ريزابەك ايتمۇحانعا بۇل جولى وليمپيا ويىندارىنىڭ ليتسەنزيالىق تۋرنيرىندە باق سىناۋ باقىتى بۇيىرمادى. ويتكەنى 97 كگ سالماققا اۋىسقاننان كەيىن ول ەل بىرىنشىلىگىنىڭ اقتىق سايىسىندا الىشەر ەرعاليگە ەسە جىبەردى. الايدا ريزابەك ءالى دە جولدامادان كۇدەرىن ۇزگەن جوق. سۋ جاڭا الەم چەمپيونى دا فرانتسيانىڭ استاناسىندا اتوي سالۋدى ارماندايدى. بۇل رەتتە ءبارى دە الىشەرگە بايلانىستى. بىشكەكتە ەرعاليدىڭ جولى بولسا, وندا جوعارىداعى اڭگىمە ساپ تيىلادى. ال ساقا سپورتشى ءساتسىز ونەر كورسەتسە, 9-12 مامىر ارالىعىندا تۇركيانىڭ ىستانبۇل قالاسىندا وتەتىن سوڭعى ليتسەنزيالىق تۋرنيرگە ايتمۇحاننىڭ قاتىسۋى ابدەن مۇمكىن.
36 جاستاعى ادىلەت داۋلىمباەۆقا بۇل – سوڭعى وليمپيادالىق تسيكل. كەزىندە ول ءتاۋىر كۇرەستى. ازيا ويىندارى مەن قۇرلىق چەمپيوناتى, باسقا دا حالىقارالىق تۋرنيرلەردە سان مارتە جۇلدەگەرلەر قاتارىنان كورىندى. بىراق ەڭبەكقور جىگىتتىڭ وليمپياداعا جولى تۇسپەدى. بيىل دا پاريجدەگى دودادان شەت قالدى. سونداي-اق ادىلەت ازيا چەمپيوناتىندا التىن العان ەمەس. سول ولقىلىقتىڭ ورنىن تولتىرۋ ءۇشىن ساقا سپورتشى بىشكەككە اتتانىپ بارادى. قىرعىزستاندا داۋلىمباەۆ 92 كگ سالماقتا بەلدەسەدى. ال وزگە سالماق دارەجەلەرىندە مەيرامبەك قارتباي (57 كگ), اسىل ايتاقىن (61 كگ), مۇحتار سانجار (65 كگ), مەيىرجان ءاشىروۆ (65 كگ), سىرباز تالعات (74 كگ), ازامات ءومىرجانوۆ (79 كگ), ابىلاي سوۆەت (125 كگ) باق سىنايدى.
ايەلدەر كۇرەسىنەن وتەتىن جارىستا يرينا جانىبەكوۆا (50 كگ), اياجان مارقاشەۆا (53 كگ), ءزۇلفيا ياحياروۆا (55 كگ), لاۋرا الماعامبەتوۆا (57 كگ), دينا كايۋموۆا (59 كگ), تىنىس دۋبەك (62 كگ), يرينا كازيۋلينا (65 كگ), ءمادينا باقبەرگەنوۆا (68 كگ), اناستاسيا پاناسوۆيچ (72 كگ), ەلميرا سىزدىقوۆا (76 كگ) سايىسقا تۇسەدى.
