كوللاج: ابىلقاسىم ەسەنتاەۆ
سىبايلاس جەمقورلىققا قارسى قىزمەتتە اگەنتتىك توراعاسى ا. جۇماعاليدىڭ باسشىلىعىمەن سپورتتى قارجىلاندىرۋ سالاسىنداعى جەمقورلىق تاۋەكەلدەرىن جويۋ ماسەلەلەرى بويىنشا ۆەدومستۆوارالىق ءماجىلىس ءوتتى.
ءماجىلىس جۇمىسىنا اگەنتتىك توراعاسى ا. جۇماعاليمەن بىرگە تۋريزم جانە سپورت ءمينيسترى ە.ب. مارجىقپاەۆ, ۇلتتىق وليمپيادالىق كوميتەتىنىڭ پرەزيدەنتى گ.گ. گولوۆكين, استانا قالاسىنىڭ اكىمى ج.م. قاسىمبەك, قارجى جانە تسيفرلاندىرۋ ۆيتسە-مينيسترلەرى, «سامۇرىق-قازىنا» اق باسشىلىعى, قوعام قايراتكەرلەرى, ورتالىق جانە وڭىرلىك مەملەكەتتىك ورگاندار قاتىستى.
جيىن بارىسىندا ەلىمىزدە سپورتتى دامىتۋعا بولىنەتىن مەملەكەتتىك قاراجاتتىڭ ۇتىمسىز جانە ءتيىمسىز جۇمسالۋىنا اكەپ سوقتىراتىن ەلەۋلى جەمقورلىق تاۋەكەلدەرى مەن فاكتورلارىنىڭ بولۋىن كورسەتكەن سىرتقى تالداۋ ناتيجەلەرى تالقىلاندى.
اگەنتتىك 2024 جىلدىڭ باسىنان بەرى سپورت سالاسىندا 39 جەمقورلىق قىلمىسىن تىركەدى.
تەك سوڭعى 6 جىلدا اتالعان سالاداعى بيۋدجەت 2 ەسە ءوسىپ, 1,4 ترلن تەڭگەنى قۇرادى. وسىعان قاراماستان, قازاقستاننىڭ الەمدىك سپورتتاعى كورسەتكىشتەرى قۇلدىراپ بارادى.
وسى سالا بيۋدجەتىنىڭ 90%-ى جۇمسالاتىن «جوعارى جەتىستىكتەر» جانە «بۇقارالىق» سپورتتى قارجىلاندىرۋ اراسىندا تەڭگەرىمسىزدىك بايقالعان.
«قارجىلاندىرۋداعى ديسپروپورتسيا جەمقورلىق سحەمالارىنا نەگىز بولدى. ەگەر بۇقارالىق سپورتتا قازىر تسيفرلاندىرىلعان جان باسىنا شاققانداعى قارجىلاندىرۋ باعدارلاماسى جۇمىس ىستەپ تۇرسا, وندا جوعارى جەتىستىكتەر سپورتىندا اشىق ەمەس جانە سۋبەكتيۆتى تولەمدەر, از باقىلاۋ, اففيليرلەنگەن قاتىسۋشىلار, جالعان وقۋ-جاتتىعۋلار جانە قوسارلانعان قارجىلاندىرۋعا جاعداي جاسالعان», دەدى اگەنتتىك توراعاسى.
سپورتتىق پروتسەستەردە تسيفرلاندىرۋدىڭ بولماۋى جەمقورلىق قۇقىق بۇزۋشىلىقتار مەن قاراجاتتىڭ جىمقىرىلۋىنا قولايلى جاعداي تۋعىزادى.
ماسەلەن, ەكى جىل بۇرىن جوسپارلانعان «ە-sport» اقپاراتتىق جۇيەسى وسى ۋاقىتقا دەيىن ىسكە قوسىلماعانىن ايتا كەتۋ كەرەك. ودان بولەك «سپورت شەبەرى» جالعان اتاعىن بەرۋ دەرەكتەرى انىقتالدى.
ماجىلىستە قازاقستانداعى سپورتشىلاردى ناتۋراليزاتسيالاۋ, كاسىبي كلۋبتاردىڭ بيۋدجەتتەرىن قالىپتاستىرۋ جانە لەگيونەرلەرگە تولەمدەردى قارجىلاندىرۋ ماسەلەلەرى تالقىلاندى.
ەل پرەزيدەنتىنىڭ بيۋدجەت پەن جالاقى مولشەرىن شەكتەۋ جونىندەگى تاپسىرماسىنا قاراماستان, ەلىمىزدىڭ فۋتبول كاسىپوداق كلۋبتارى سوڭعى 3 جىل ىشىندە 30 ملرد تەڭگەدەن استام ۇستەمە اقى تولەدى. سونىمەن قاتار ءوزىنىڭ سپورتتىق ينفراقۇرىلىمىن دامىتۋدىڭ ورنىنا بيۋدجەت قاراجاتى لەگيونەرلەرگە تولەم جاساۋعا جانە سپورت نىساندارىن جالعا الۋعا جۇمسالدى.
تالداۋ قورىتىندىسى بويىنشا اگەنتتىك سالالىق مينيسترلىكتىڭ اتىنا جەمقورلىق تاۋەكەلدەرىن جويۋ بويىنشا ۇسىنىمدار ەنگىزدى.
