تجم (توتەنشە جاعدايلار مينيسترلىگى) قورعانىس سالاسىمەن بىرلەسىپ, اەروۆيزۋالدى دروندار ارقىلى وزەندەر مەن سۋ قويمالارىنداعى جاعدايعا تۇراقتى باقىلاۋ جۇرگىزىپ جاتىر. ال كەيبىر وڭىرلەردەگى وزەندەردە مۇز جارۋ باستالدى.
«مۇز كەپتەلىستەرىنىڭ الدىن الۋ ماقساتىندا اقمولا وبلىسى تسەلينوگراد اۋدانىنىڭ پرەوبراجەنكا اۋلى ماڭىنداعى نۇرا وزەنىندە, شورتاندى اۋدانىنداعى كولۋتون وزەنىندە, اباي وبلىسى بورودۋليحا اۋدانىنىڭ كراسنىي يار اۋلى ماڭىنداعى ۋبا وزەنىندە, قاراعاندى وبلىسى وساكاروۆ اۋدانىنىڭ نيكولاەۆ اۋلىنىڭ ماڭىنداعى سابىرقوجا وزەنىندە مۇز جارۋ جۇمىستارى جۇرگىزىلىپ جاتىر», دەلىنگەن تجم ءباسپاسوز قىزمەتىنىڭ حابارلاماسىندا.
مالىمەتكە سايكەس اباي, اقمولا, اقتوبە, اتىراۋ, قاراعاندى, قوستاناي, پاۆلودار, ۇلىتاۋ, باتىس قازاقستان وبلىستارىنىڭ ەلدى مەكەندەرىندەگى تاسقىنعا توسقىن قويۋ, اۆاريالىق-قۇتقارۋ جۇمىستارى, ەرىگەن قار سۋىن بۇرۋ, قۇم سالىنعان قاپتار توسەۋ, سۋاعارلاردىڭ جاعالارىن نىعايتۋ جانە جۇرتشىلىقتى قۇلاقتاندىرۋ مەن ادامداردى قاۋىپسىز جەرلەرگە ەۆاكۋاتسيالاۋ جالعاسىپ جاتىر.
«اقتوبە, قوستاناي, اتىراۋ, اقمولا, قاراعاندى وبلىستارىندا 55 جەكە تۇرعىن ءۇي جانە 8 اۋلا اۋماعى سۋ استىندا قالعان (سۋ تاسقىنى باستالعاننان بەرى 1 376 ءۇي جانە 1 319 اۋلا اۋماعى). 28 ءۇي مەن 39 اۋلا اۋماعىنان ەرىگەن قار سۋى سورعىزىلدى (سۋ تاسقىنى باستالعاننان بەرى 358 ءۇي مەن 988 اۋلا اۋماعىنان سۋ سورعىزىلدى). 1 345 ادام, ونىڭ ىشىندە 496 بالا قۇتقارىلدى (سۋ تاسقىنى باستالعاننان بەرى 17 131 ادام, ونىڭ ىشىندە 6 683 بالا). قازىرگە دەيىن 5,7 ملن تەكشە مەتردەن اسا ەرىگەن قار سۋى سورعىزىلعان. 638 مىڭنان اسا قاپ جانە 912 مىڭ توننا ينەرتتى ماتەريال توسەلدى», دەيدى تجم رەسمي وكىلى دينارا عالىمجان.
كەيىنگى دەرەكتەر بويىنشا تەز ەرىگەن قار سۋى اقمولا وبلىسى جارقايىڭ اۋدانىنىڭ پريگورودنوە اۋلىنداعى 8 جەكە تۇرعىن ءۇيدى باسىپ قالعان. 19 ادام, ونىڭ ىشىندە 2 بالا جانە 1 جۇكتى ايەل قۇتقارىلىپ, تۇرعىندار تۋىستارىنىڭ ۇيلەرىن ۋاقىتشا پانالاي تۇرۋعا ءماجبۇر. سونداي-اق اۋىل تۇرعىندارىنىڭ 34 باس مالى قاۋىپسىز جەرلەرگە جەتكىزىلدى.
«رەسپۋبليكالىق, وبلىستىق جانە جەرگىلىكتى ماڭىزى بار 18 اۆتوجولدى سۋ شايدى. سۋ شايعان 77 اۆتوجول, ونىڭ ىشىندە 4 كوپىر جانە 73 جول توسەمى, سۋ جۇرگەن 93 اۆتوجول باقىلاۋدا. جەرگىلىكتى اتقارۋشى ورگاندار حالىقپەن بايلانىس ورناتىپ, قاجەتتى ازىق-ت ۇلىك جانە ءدارى-دارمەك قورلارىن قۇرعان, 67 ەلدى مەكەن كولىك قاتىناسىنسىز قالدى», دەيدى د.عالىمجان.
اقتوبە وبلىسىندا «تەرەڭساي» بوگەتىنىڭ سۋى ارناسىنان اسىپ, ايتەكە بي اۋدانىنىڭ ايكە اۋلىنداعى 2 جەكە تۇرعىن ءۇيدى سۋ باسقان. ايكە اۋلىنان جۇرگەنەۆ اۋلىنا 297 ادام, ونىڭ ىشىندە 79 بالا ەۆاكۋاتسيالاندى. ال ويىل اۋدانىنىڭ 5 ەلدى مەكەنىندەگى جەكە ۇيلەردى سۋ باسۋىنا بايلانىستى قورعانىس مينيسترلىگى اۋە كەمەلەرى ارقىلى 85 ادام, ونىڭ ىشىندە 27 بالا قۇتقارىلعان. بۇل اۋدانداردا ەرىگەن قار سۋىن بۇرۋ مەن سورعىزۋ جانە حالىققا كومەك كورسەتۋ جۇمىستارى قارقىندى ءجۇرىپ جاتىر.
تجم مالىمەتىنە سايكەس باتىس قازاقستان وبلىسى تەرەكتى اۋدانى ۇزىنكول كەنتىن سۋ باسۋ قاۋپى ءتونىپ تۇر. ەگىستىكتەردەن كەلگەن مول مولشەردەگى قارعىن سۋ ۇزىنكول سۋ قويماسىن ارناسىنان اسىرىپ بارادى. وسىعان وراي تەرەكتى اۋدانى پودستەپنوە اۋلىنىڭ 705 تۇرعىنى الدىن الا ەۆاكۋاتسيالاندى. ازىرگە سۋ قويماسىنىڭ بوگەتتەرىن كۇشەيتۋ جۇمىسى قولعا الىندى.
اۆاريالىق-قۇتقارۋ جۇمىستارىنا تجم, قم, ءىىم, ۇقك, جەرگىلىكتى اتقارۋشى ورگانداردىڭ, ۇيىمداردىڭ 12 مىڭنان اسا ادام, 2,5 مىڭ تەحنيكا, 801 سۋ ايداۋ قۇرالى جانە 105 ءجۇزۋ قۇرالى, 9 اۋە كەمەسى جۇمىلدىرىلعان.
