الىستان مەنمۇندالايتىن جاڭا كەشەن گرەك-ريم كۇرەسىنەن الەم چەمپيونى, قازاقتىڭ تۇڭعىش وليمپيادا چەمپيونى جاقسىلىق ۇشكەمپىروۆتىڭ ەسىمىمەن اتالادى. ەكى جىل بۇرىن قۇرىلىسى باستالعان نىسانعا 2 534,8 ملرد تەڭگە جۇمسالعان.
ەڭسەلى ەتىپ سالىنعان عيماراتتىڭ ويىن, جاتتىعۋ زالدارىندا بوكس, ەركىن كۇرەس, قازاقشا كۇرەس, گرەك-ريم كۇرەسى, ۆولەيبول, باسكەتبول, فۋتبول, فۋتزال, گاندبول سەكىلدى سپورت تۇرلەرىنەن ۇيىرمەلەر جۇمىس ىستەيدى. نىساننىڭ جالپى اۋماعى – 5 477,4 شارشى مەتر. مۇندا شەلەك اۋلىنىڭ تۇرعىندارى عانا ەمەس, كورشىلەس اۋىلداردان سپورتقا قىزىعۋشىلىق تانىتقان بالالاردىڭ دا جاتتىعۋىنا مۇمكىندىك بار. كۇنىنە جۇزدەگەن ءجاسوسپىرىم مەن جاستار جوعارىدا اتالعان ۇيىرمەلەرگە قاتىسىپ, شەبەرلىكتەرىن شىڭدايدى.
ايتۋلى مەرەكەدە كەشەن وبلىس تاريحىنداعى اسا ماڭىزدى وقيعا ەكەنى اتالدى. بۇل قادام اۋىلدىڭ الەۋمەتتىك ينفراقۇرىلىمىن دامىتۋعا, تۇرعىنداردىڭ جاعدايىن جاقسارتۋعا زور مۇمكىندىك بەرەدى.
– سىزدەردى بىرنەشە زالى مەن فۋتبول الاڭى بار زاماناۋي دەنە شىنىقتىرۋ-ساۋىقتىرۋ كەشەنىنىڭ اشىلۋىمەن شىن جۇرەكتەن قۇتتىقتايمىن. بۇل عيمارات تەك وسى شەلەك اۋلىندا عانا ەمەس, اۋداندا سپورتتىڭ دامۋىنا جاڭا سەرپىن بەرەدى. سەبەبى ونىڭ نەگىزىندە ەڭبەكشىقازاق اۋدانىنىڭ №3 بالالار مەن جاسوسپىرىمدەر سپورت مەكتەبى قۇرىلىپ وتىر. مۇنداي قادام اۋداننىڭ ىشىندە سپورتتىق باسەكەنى ارتتىرۋمەن قاتار, شىن مىقتىلاردىڭ ىرىكتەلۋىنە مۇمكىندىك تۋعىزادى دەپ ويلايمىن, – دەدى الماتى وبلىسىنىڭ اكىمى مارات سۇلتانعازيەۆ.
سونىمەن قاتار ءوڭىر باسشىسى كەشەنگە قازاقستاننىڭ ەڭبەك ەرى جاقسىلىق ۇشكەمپىروۆتىڭ ەسىمىنىڭ بەرىلۋى ەرەكشە جاۋاپكەرشىلىك جۇكتەيتىنىن اتاپ ءوتتى.
– جاڭا سپورت عيماراتىن قولدانىسقا بەرۋ ارقىلى جاس بۋىننىڭ, اسىرەسە اۋىل جاستارىنىڭ سپورتپەن شۇعىلدانۋىنا ءتيىستى جاعداي جاسالىپ جاتىر. بۇل باعىتتا باستى كوڭىل اۋىلدىق جەرلەرگە بولىنەدى, – دەدى م.سۇلتانعازيەۆ.
وسى ورايدا وڭىردە بوي كوتەرىپ, پايدالانۋعا بەرىلگەن 1 800-دەن اسا سپورتتىق عيماراتتىڭ جارتىسىنان كوبى اۋىلدارعا تيەسىلى ەكەنىن اتاپ وتكەن ءجون. ەلىمىزدىڭ داڭقىن اسپانداتار جاس جەتكىنشەكتەرگە ەسىگىن ايقارا اشقان سپورت كەشەنىندە ءالى تالاي رەسپۋبليكالىق, وبلىستىق بايراقتى باسەكەلەردىڭ جالاۋى جەلبىرەيدى.
سونداي-اق وسى كۇنى ءوڭىر باسشىسى اۋداننىڭ «تۇلپار» جشس-نىڭ جۇرگىزۋشىلەرىنە 10 جاڭا اۆتوبۋستىڭ كىلتىن سالتاناتتى تۇردە تابىستادى. ەندىگى كەزەكتە شەلەك اۋلى مەن ماڭايداعى ەلدى مەكەندەرگە سۋ جاڭا قوعامدىق كولىكتەر قاتىنايدى. اۆتوبۋستاردا جولاۋشىلارمەن بىرگە, مۇمكىندىگى شەكتەۋلى ازاماتتارعا دا قولايلى جاعداي قاراستىرىلعان. اكىمنىڭ ايتۋىنشا, بۇل قوعامدىق كولىكتەردەگى جولاۋشىلار مەن تاسىمالداۋشىلاردىڭ مادەنيەتتىن قالىپتاستىرۋعا ىقپال ەتپەك. سالونى كەڭ ءارى جايلى اۆتوبۋستار ءبىر مەزەتتە 30 ادامدى تاسىمالداي الادى. جاڭا اۆتوبۋستار جىلدامدىق شەكتەۋ, قوزعالىس ينتەرۆالىن باقىلاۋعا ارنالعان GPS جۇيەسىمەن جابدىقتالادى.
الماتى وبلىسى
