ال ىزدەۋ جۇمىستارى توقتاپ تۇر. مارقۇمنىڭ جاقىندارى قۇتقارۋ جۇمىستارىن جالعاستىرۋدى تالاپ ەتىپ جاتىر. ولار پاۆلودار وبلىسىنىڭ اكىمدىگى مەن جەرگىلىكتى پروكۋراتۋرادان كۇدەر ءۇزىپ, ەندى ىسكە پرەزيدەنتتىڭ ارالاسۋىن سۇراپ وتىر.
كتك تەلەارناسىنىڭ مالىمەتىنشە, قۇتقارۋشى ايدوس شايمەردەننىڭ ايەلى استاناعا شيەتتەي بالا-شاعاسىن ەرتىپ كەلگەن. "اسىراۋشىمنان ايىرىلدىم, بەس بالامدى ەندى كىم اسىرايدى؟" دەپ وتىر. "جۇبايىمنىڭ ءمايىتىن تاۋىپ بەرسە, عۇرىپقا ساي جەرلەسەك" دەيدى.
نۇرسۇلۋ شايمەردەن پاۆلوداردا ىزدەۋ جۇمىستارىن جالعاستىرۋدى سۇراپ, اكىمدىك پەن پروكۋراتۋرانىڭ تابالدىرىعىن توزدىرعان. ەش شارا قالماعان سوڭ, ۇكىمەتتەن, باس پروكۋراتۋرادان كومەك سۇراپ وتىر.
- ءبىزدى ەستيتىن پەندە جوق. كىشكەنتاي بالالارىمدى الىپ, استانانىڭ تورىنە كەلىپ وتىرمىن, "الىپ بەرسە ەكەن, شىعارىپ بەرسە ەكەن" دەيمىن. ءتىرى ەمەس ەكەنىنە كوندىك قوي, ءتىرى دەيىن دەسەم – ۇيدە جوق, ءولى دەيىن دەسەم – بەيىت باسى جوق, - دەيدى قۇتقارۋشىنىڭ ايەلى نۇرسۇلۋ شايمەردەن.
توپىراق استىندا قالعان ەكى ادام ءالى كۇنگە دەيىن اپاتتان قۇتقارۋ قىزمەتىنىڭ جۇمىسشىلارى رەتىندە ەسەپتەلىپ, ولارعا اي سايىن جالاقى تولەنىپ وتىر ەكەن. ءمايىت تابىلماعاندىقتان, قايتىس بولعانى تۋرالى كۋالىك تە جوق. سول سەبەپتى ەكى وتباسىعا وتەماقى تولەنبەگەن, اسىراۋشىسىنان ايىرىلعانىن وتباسى رەتىندە جاردەماقى دا الا المايدى. اۆتوبۋس جۇرگىزۋشىسى ايىپ تىلەۋبەرگەنوۆتىڭ جاقىندارى ءىستىڭ سوزىلىپ كەتكەنىنە نارازى.
- ءتورت كىسىنىڭ ولىمىنە كومبينات جاۋاپ بەرگىسى كەلمەي, اعامىزدىڭ جۇمىس ورنى, قۇتقارۋشىلارمەن سوتتاسايىن دەپ جاتىر, سولاردى كىنالى قىلعىسى كەلىپ جاتىر. جەر سولاردىكى, ويىلىپ كەتكەن جەر سولاردىڭ قاتەلىكتەرىنەن, سالعىرتتىعىنان بولدى, ونى مويىنداعىسى كەلىپ تۇرعان جوق. ء"بىزدىڭ كىنامىز جوق" دەيدى, - دەيدى اۆتوبۋس جۇرگىزۋشىسىنىڭ تۋىسى امانگەلدى تىلەۋبەرگەنوۆ.
توتەنشە جاعدايلار مينيسترلىگى دە ىزدەۋ جۇمىستارى قاشان جالعاساتىنىن ايتا الماي وتىر. قازبا جۇمىسىنىڭ توقتاعانىنا ءبىر اي وتسە دە, ساراپتاما جاسالماعان.
- ەكى جاق ساراپتاما جۇرگىزىپ, قۇتقارۋشىلار ءۇشىن قازبا جۇمىستارى قانشالىقتى قاۋىپسىز ەكەنىن تۋرالى شەشىم قابىلداۋعا ءتيىس. ساراپشىلار قاۋىپ جوق دەپ شەشسە, ارينە, ىزدەۋ جۇمىستارى قايتا جاندانادى, - دەيدى توتەنشە جاعدايلار ۆيتسە-ءمينيسترى باۋىرجان سىزدىقوۆ.
يندۋستريا ءمينيسترى كەن ورنىندا وندىرىستىك قاۋىپسىزدىككە قارجى از بولىنەتىنىن مويىندادى. "بۇل جاعدايدى پاۆلودار اكىمىمەن تالقىلادىق, ينۆەستورعا قاتىستى ناقتى شەشىمدەر قابىلدايمىز" دەدى شارلاپاەۆ.
- بۇعان دەيىن ىستەگەنىمىزدەي, اكتسيونەرمەن تىكەلەي ديالوگ قۇرماقپىز. ول كەنىشتەگى وندىرىستىك قاۋىپسىزدىك پەن كەن ورنىن يگەرۋدى ءوز موينىنا الادى نەمەسە ناقتى وسى ينۆەستوردىڭ جەر قويناۋىن پايدالانۋ قۇقىعى ماسەلەسىن قايتا قارايتىن بولامىز. ءبىر شەشىمگە كەلەمىز, - دەدى يندۋستريا جانە ينفراقۇرىلىمدىق دامۋ ءمينيسترى قانات شارلاپاەۆ.
