سۋرەتتى تۇسىرگەن – ەرلان ومار, «EQ»
ۇلتىمىزدىڭ بولاشاقتاعى بولمىسىن ايعاقتاپ, قازىعىن قاعىپ بەرەتىن مەملەكەتتىك دەڭگەيدەگى دارەجەسى بيىك داستۇرگە اينالعان قۇرىلتايدىڭ ءوتۋى مەملەكەت پەن قوعام اراسىنداعى التىن كوپىر ىسپەتتەس. ولاي دەيتىنىمىز, قوعامنىڭ ىلگەرى دامۋىنا تىڭ سەرپىن بەرۋ ارقىلى جاڭا قادامدار جاساۋ, ۇلت كەلەشەگىنىڭ جارقىن جاڭا جوسپارىن قۇرۋ, ەل يگىلىگىنە باعىتتالعان ۇتىمدى شەشىم قابىلداۋ – مەملەكەت پەن ازاماتتىق قوعام ءۇشىن سالماقتى سارا جول, تاريحي ءمانى جوعارى ماڭىزدى ءسات.
بيىلعى قۇرىلتايدىڭ كۇن تارتىبىندە حالقىمىزدىڭ بەرەكە-بىرلىگىن ساقتاپ, ەلدىكتىڭ نىشانىن جاڭعىرتۋدا اسا ماڭىزدى ساليقالى وي, كەلەلى پىكىر, تەرەڭ تۇجىرىمدار تارازىلانىپ, جالپىۇلتتىق قۇندىلىقتاردى دامىتۋدىڭ ماڭىزدى ماسەلەلەرى تالقىلاندى. مەملەكەت باسشىسى قازاقستان – ۇلى دالاداعى كوشپەلىلەر وركەنيەتىنىڭ تىكەلەي مۇراگەرى ەكەنىن اتاپ ءوتىپ, دالا وركەنيەتىنىڭ ايناسى بولعان ۇلتتىق مادەنيەتىمىزدى ساقتاۋ, ءتول تاريحىمىزدى دارىپتەۋ, وعان قۇرمەتپەن قاراۋ – ۇلتىمىزدىڭ ماڭىزدى قادامى دەپ سانايدى.
پرەزيدەنت تاراپىنان ايتىلعان ۇلتتىق بىرەگەيلىكتى قالىپتاستىرىپ, ونى ساقتاۋدا ءتىل, ءدىن, رۋحانيات, سالت-ءداستۇر, ۇلتتىق بولمىس-ءبىتىم قالىپتاستىرۋ سىندى تىڭ ۇسىنىستار حالقىمىزدىڭ جاڭا كەلبەتىن, مادەنيەتى جوعارى قوعام قالىپتاستىرۋعا جول اشادى. اسىرەسە بابالار اماناتى بولعان سالت-داستۇرىمىزبەن استاسقان اتا ءدىنىمىزدى ۇستانۋ – ەلدىكتىڭ رۋحاني قازىعى. ۇلتتىق ويۋ-ورنەكپەن كومكەرىلگەن ۇلتتىق كيىم ۇلگىسىن قايتا جاڭعىرتۋ, ونى كۇندەلىكتى كيىپ ءجۇرۋ – ۇلت بولاشاعىنىڭ جارقىن كورىنىسى, داستۇرگە قۇرمەتتىڭ بەلگىسى. وسى تۇرعىدا پرەزيدەنت راديكالدى نەوفيتتەر حالقىمىزدىڭ سالتىندا جوق كيىم ۇلگىلەرى ارقىلى دا جات ءدىني يدەالداردى قوعامعا تاڭۋعا تىرىسىپ جۇرگەنى ءداستۇرلى ۇعىمدارىمىز بەن قۇندىلىقتارىمىزعا جاسالىپ جاتقان شابۋىل دەپ ناقتى اتاپ ءوتتى.
سونداي-اق قۇرىلتايدا ۇلتتىڭ ساۋلىعىنا اسا ءمان بەرىلدى. كەيىنگى جاس بۋىننىڭ ءومىرىن ناشاقورلىقتان, قۇمار ويىننان ۇلت ساۋلىعىنىڭ ساقتالۋىنا ءوز سەپتىگىن تيگىزەتىنى ايتىلدى. قۇرىلتايعا قاتىسۋشىلار تاراپىنان بىرقاتار ۇسىنىس بەرىلىپ, ناقتى تۇجىرىمدامالار بەكىتىلدى. ەل بولاشاعى بۇگىنگى جاس ورەندەردىڭ قولىندا بولاتىنى ەسكەرىلە وتىرىپ, كەلەشەك جاستارىمىزدىڭ بويىندا عىلىم مەن بىلىمگە دەگەن ماقسات-مۇراتىن ايشىقتايتىن كىتاپ وقۋ مادەنيەتىن قالىپتاستىرۋ, استانا جانە الماتى قالالارىندا تاۋلىك بويى جۇمىس ىستەيتىن كىتاپحانالار سالۋ, ۇلتتىق كىتاپ كۇنىن اتاپ ءوتۋ يدەياسى جاڭا بۋىندى جاڭا ءبىر بەلەسكە كوتەرەرى بەلگىلى. دانا حالقىمىز «كىتاپ – ءبىلىم بۇتاعى, ءبىلىم – ءومىر شىراعى» دەپ ىزگىلىكتىڭ جولى كىتاپتا ەكەنىن ۇرپاق جادىنا ءسىڭىرىپ كەتكەن. قوعامدا كىتاپقا دەگەن قۇرمەتتى جاڭعىرتۋ – جارقىن كەلەشەكتىڭ كەپىلى.
كيەلى ۇلىتاۋدان باستاۋ الىپ, قاسيەتتى تۇركىستاندا تاعدىرلى شەشىمدەرگە سەرپىن بەرىپ, تاريحي ولكە اتىراۋ تورىندە جالعاسىن تاپقان ۇلتتىق قۇرىلتايدا مەملەكەت باسشىسى قاسىم-جومارت توقاەۆ پەن زيالى قاۋىم وكىلدەرىنىڭ تۇشىمدى تۇجىرىمى مەن ۇتىمدى ويلارى ۇلتتى ءبىر ۇياعا ۇيىستىرىپ, حالقىمىزدىڭ سالت-ساناسىن ءبىر ارناعا توعىستىرعان ماڭىزدى قادام بولدى. ۇلتتى ۇيىستىرعان قۇرىلتاي ۇلتىمىزدىڭ جاڭا ءبىر كەلبەتىن قالىپتاستىرۋعا, ەل دامۋىنىڭ جاڭا ءبىر بەلەسىن باعىندىرۋعا جول اشادى دەپ سەنەمىز.
مەدەت قۋانىشەۆ,
قۇرمانعازى اتىنداعى قازاق ۇلتتىق حالىق اسپاپتار وركەسترىنىڭ ديرەكتورى
