قازىر كوپ ۇيلەردىڭ اۋلالارىندا ءالى دە قار ۇيىندىلەرى, مۇزداقتار جاتىر. جىلىمىق جاڭبىر سونىڭ ءبارىن جىلدام ەرىتەدى, ال توپىراقتىڭ بويىندا ىلعالدىڭ كوپ بولۋىنان سۋ جەرگە سىڭە المايدى. سوندىقتان جەرتولەلەرگە سۋ تولىپ, ۇيلەرگە سۋ كىرۋى مۇمكىن. وسىعان بايلانىستى توتەنشە جاعدايلار دەپارتامەنتى تۇرعىنداردان اۋلالارىن قار مەن مۇزداقتاردان جەدەل تازارتۋدى تالاپ ەتىپ جاتىر. اۋلانىڭ ىشىندەگى, سىرتىنداعى سۋاعارلاردى, ارىقتاردى تازارتىپ, سۋدىڭ جولىن اشۋ كەرەك. قىزىلجار قالاسىنىڭ ىلديداعى اۋداندارىنداعى جەكەمەنشىك ۇيلەرگە الدەن سۋ كىرىپ جاتىر. قالالىق اكىمدىك پەن تج قىزمەتكەرلەرىنىڭ تەحنيكالارى شاقىرعان ۇيلەردىڭ بارىنە بارىپ, قارعىن سۋدى پومپالارمەن دالاعا ايداپ جاتىر. قالانىڭ 109 بەن 112 قۇتقارۋ قىزمەتى نومىرلەرىندە وسى كۇندەرى تىنىم جوق.
وبلىستىڭ وڭتۇستىك ايماقتارىندا دا بۇل كۇندەرى تىنىش ەمەس. تايىنشا اۋدانىنىڭ اۋماعىنان وتەتىن شاعالالى وزەنىنىڭ سۋى كوتەرىلىپ, تايىنشا قالاسىنىڭ شەتكەرگى اۋداندارىنا قاۋىپ ءتوندىرىپ تۇر. ەڭ شەتكى «كۇنشىعىس» كوشەسىنىڭ شامامەن 60 ءتۇتىن بولاتىن تۇرعىندارى مەن مالدارىن قالانىڭ ورتاسىنا ەۆاكۋاتسيالاۋ شارالارى ۇيىمداستىرىلىپ, №5 مەكتەپ پەن اگروبيزنەس كوللەدجىنىڭ جاتاقحانالارى بوساتىلىپ جاتىر. تۇرعىنداردى تاسۋعا 4 تەحنيكا ساپتا تۇر, ال مالداردى ورتالىققا قاراي ايداۋ ءۇشىن جاستار اتقا قونعان.
جالپى, شاعالالى وزەنىنىڭ وسى ماڭداعى 6 شاقىرىمدىق جاعالاۋىنا ينەرتتى ماتەريالداردان بيىكتىگى ءبىر مەتر سۋ بوگەن تۇرعىزىلعان. قوسىمشا 600 قاپ ينەرتتى ماتەريالدار دايىن تۇر.
وبلىس اكىمى عاۋەز نۇرمۇحامبەتوۆ تىكۇشاقپەن ع.مۇسىرەپوۆ, شال اقىن, ايىرتاۋ جانە تيميريازەۆ اۋداندارىنىڭ قاۋىپتى ايماقتارىن ارالاپ شىقتى. بۇل ايماقتاردا قاردىڭ ەرۋى ءالى كۇرت ەمەس, تەك كۇن قىزدىرعان ايماقتاردىڭ جۇقا قارلارى عانا كەتىپ جاتىر. الايدا وزەندەردىڭ قاۋپى زور.
«بۇل اۋدانداردا شاعىن وزەندەردەگى سەڭنىڭ تىرەسىپ, تۇرىپ قالۋىنان سۋ تاسۋى مۇمكىن. اسىرەسە اقجار, تايىنشا جانە ءۋاليحانوۆ اۋداندارىنداعى قاۋىپ زور. استانا مەن اقمولا سۋ قويمالارىنان بۇل ايماقتارعا تاسقىن سۋ كەلەدى. قازىر بۇل اۋدانداردا بارلىق قۇتقارۋ كۇشتەرى ساپقا قويىلدى. تەحنيكالار دايىن. اعىستى تەجەمەۋ ءۇشىن وزەندەردەگى قالىڭ مۇزدار جارىلدى. ەۆاكۋاتسيالىق بەكەتتەر ىسكە قوسىلدى. ينەرتتى ماتەريالدار تولتىرىلعان قاپتار مەن ججم جانە جۇزەتىن قۇرالداردى دايىنداپ قويدىق. بارلىق جاعدايدى جەكە ءوزىمنىڭ باقىلاۋىما الدىم», دەپ وبلىس اكىمى تەlegram-داعى پاراقشاسىندا جازدى.
دايىندىق قانشا جاقسى بولعانىمەن اۆتوجولداردىڭ ۇستىنە سۋ شىعىپ كەتكەن ايماقتار بار. بۇل جاعداي, اسىرەسە, ءۋاليحانوۆ اۋدانىندا كوبىرەك بولىپ تۇر. تايىنشا اۋدانىندا دا رەسپۋبليكالىق جولداردىڭ ەكى جەرىنەن سۋ ءوتىپ كەتتى. «كوكشەتاۋ-ومبى» رەسپۋبليكالىق تراسساسىنىڭ 85-213 شاقىرىم ارالىعى سۋ ءجۇرىپ كەتكەندىكتەن جابىلدى. ءۋاليحانوۆ جانە اقجار اۋداندارىندا دا ەكى وبلىستىق ماڭىزداعى جولدار سۋ قاۋپىنەن ۋاقىتشا جابىلدى.
تجد باسپاسوزبەن بايلانىس قىزمەتىنىڭ وكىلى ەۆگەني جۋراۆلەۆتىڭ ايتۋىنا قاراعاندا, قارعىن سۋعا قارسى شارالار كۇندىز-ءتۇنى جۇرگىزىلىپ جاتىر. بۇگىنگە دەيىن بارلىق ەلدى مەكەندەردەن 1,9 ملن تەكشە مەتر قار دالاعا تاسىلدى. 2 460 سۋاعار قۇبىرلارى مەن 242 ارىقتار تازالانعان. سۋ ءسىڭۋ ءۇشىن 1 064 گەكتار جەردىڭ قارى سىرىلىپ, جەر قارايتىلعان. جىل باسىنان بەرى ينەرتتى ماتەريالدار تولتىرىلعان 28 مىڭ قاپ دايىندالعان. بۇل جۇمىستار ع.مۇسىرەپوۆ اۋدانىنداعى نوۆويشيم, رۋزاەۆ, چيستوپول, بىرلىك, تاحتابرود اۋىلدارىندا ءجىتى جۇرگىزىلگەن, ويتكەنى بۇل جاقتاردا سۋ باسۋ قاۋپى زور.
اقجار اۋدانىنداعى قاراسۋ وزەنىنىڭ قۋلىكول اۋىلىنىڭ تۇبىندە كەپتەلىس بولماس ءۇشىن مۇزدار ارناۋلى جارىلعىش زاتتارمەن جارىلعان. جارىلعان مۇزدىڭ جالپى كولەمى – 800 شارشى مەتر. بۇعان 100 كگ جارىلعىش زاتتار پايدالانىلعان. وسىنداي جۇمىستار شارىق, اقان بۇرلىق جانە ەسىل وزەندەرىندە دە جۇرگىزىلگەن ەدى. سونىمەن قاتار بۇگىنگە دەيىن ەلدى مەكەندەردىڭ اۋلالارىنان 25 مىڭ تەكشە مەتر سۋ ايدالعان.
سولتۇستىك قازاقستان وبلىسى
