فوتو: gov.kz
قىس ايلارىندا دا ينەرتتى ماتەريالداردى ۋچاسكە باسىنا جەتكىزۋ توقتاۋسىز جۇرگىزىلىپ, قازىر 5 لوت بويىنشا 24 پەن 216 شاقىرىم ارالىعىندا قۇرىلىس جۇمىستارى تولىق باستالىپ كەتىپتى.
«ونىڭ ىشىندە جەر جۇمىستارى, اينالما جولدار سالىنىپ, جاساندى قۇرىلعىلار ورناتىلدى. سونداي-اق سۋ وتكىزگىش قۇرالدار, مال وتكەلدەرى, جولدىڭ جيەگىن نىعايتۋ دا جاسالىپ جاتىر», دەيدى «قازاۆتوجول» ۇك» اق وبلىستىق فيليالى ديرەكتورىنىڭ ورىنباسارى ەرسايىن مۇزافار.
قۇرىلىستى «جول اكتيۆتەرى ساپاسىنىڭ ۇلتتىق ورتالىعى» رمك وبلىستىق فيليالى ماماندارى ۇدايى باقىلاپ وتىر. بىلتىر جىلجىمالى زەرتحانا ارقىلى 202 نىسانعا تەكسەرۋ جۇرگىزىلىپ, قۇرىلىس ماتەريالدارىنان 611 سىناما الىنعان. تاپسىرىس بەرۋشى مەن مەردىگەر مەكەمەلەرگە تەكسەرۋ بارىسىندا انىقتالعان ولقىلىقتاردى قالپىنا كەلتىرۋگە ۇسىنىس بەرىلگەن. بۇگىندە سول 35 اقاۋ مەن زەرتحانالىق سىناما قورىتىندىسىمەن انىقتالعان 9 كەمشىلىك تولىق قالپىنا كەلتىرىلدى.
«جالپى, كۇرە جولدى جاڭعىرتۋ جۇمىستارى سالا مينيسترلىگىنىڭ دە ۇدايى نازارىندا. قۇرىلىس ماتەريالدارى مەن اتقارىلعان جۇمىستاردىڭ نورماتيۆتىك تالاپتارعا ساي بولۋىن ورتالىق ماماندارى قاتاڭ باقىلاۋدا ۇستايتىن بولادى», دەدى «جول اكتيۆتەرى ساپاسىنىڭ ۇلتتىق ورتالىعى» رمك وبلىستىق فيليالىنىڭ ديرەكتورى ەربولات كوشتاەۆ.
بۇگىندە كۇرە جول قۇرىلىسىنا 750 ادام جۇمىلدىرىلىپ, تۇراقتى جۇمىسپەن قامتىلىپ وتىر. قىزىلوردا وبلىسى اۋماعىنداعى 216 شاقىرىم جول جوسپار بويىنشا كەلەر جىلى پايدالانۋعا بەرىلەدى.
قىزىلوردا وبلىسى
