ما ءشيتۋدىڭ ازان شاقىرىلىپ قويعان اتى – ما تسيانمۋ. ول زيالى وتباسىندا تاربيەلەنگەن. بالا كەزىنەن كونە جازبالاردا بەدەرلەنگەن قىتاي ادەبي مۇراسىنا ەرەكشە قىزىققان. تاريح, ەرتەگى, ءاپسانالار قيالىنا قانات ءبىتىرىپ, بالانىڭ بولاشاعىنا قاتتى اسەر ەتتى. سونىڭ ارقاسىندا ما تسيانمۋ مەملەكەتى قۋاتتى, اسكەرى الەۋەتتى قوعام قۇرۋعا قۇلشىنعان. ول ورتا مەكتەپتى بىتىرە سالا ساياسي قوزعالىسقا بەلسەنە ارالاسقان.
ما ءتسيانمۋدىڭ جاستىق شاعى قىتايدىڭ اۋمالى-توكپەلى زامانىمەن تۇسپا-تۇس كەلدى. جاپونداردىڭ سوعىسى, اعىلشىنداردىڭ ىشكى ساياساتقا ارالاسۋى, گوميندان جانە كوممۋنيستىك پارتيانىڭ بيلىككە تالاسى سەكىلدى وقيعالار قالامگەردىڭ ۇلت بىرلىگى مەن ىنتىماعىن ورناتسام دەگەن ارمانىنا ۇمتىلدىرا ءتۇستى.
قالامگەر جالپاق جۇرتقا ما شيتۋ ەسىمىمەن تانىلدى. ونىڭ ءمانى «كارى جىلقى جولدان اداسپايدى» دەگەن ءسوز ەكەن. ول بۇل ەسىمگە پارتياعا وتكەننەن كەيىن اۋىسقان كورىنەدى. ال ونىڭ بۇرىنعى تسيانمۋ ەسىمى «ماڭگىلىك ءومىر اعاشى» دەگەن ماعىنانى بىلدىرەدى. بايقاساڭىز, ەكى بىردەي ەسىم ءبىر-بىرىمەن مازمۇنداس. بەينەبىر جازۋشىنىڭ ۇزاق جاساۋىنا وسى ەكى ەسىمنىڭ اسەرى بارداي.
ما شيتۋ ءبىر سۇحباتىندا ۇزاق جاساۋدىڭ قۇپياسىن ايتادى. «عاسىر جاساۋدىڭ سىرى مىنا بەس ۇستىنعا جاسىرىنعان. ولار – جاقسى تاماقتانۋ, ۋاقتىلى ۇيىقتاۋ, ۇزاق جاياۋ ءجۇرۋ, كۇندەلىكتى جازۋ جانە بارلىق جاعدايعا اسقان سابىرلىقپەن قاراۋ», دەيدى ول.
