«ەشكiمگە قور بولمايدى ازات باسىم,
جانىمدى جار ايمالاپ, جاز اپتاسىن!
تاستى ويۋ – تاڭداي قاققان تامشىعا سىن,
قاسقايۋ – قاسقىر قانداس قازاققا سىن!
باسىنىپ باسىمنان ءسوز اسىرماڭدار,
ەجەلدەن ەگiز ۇعىم – لاشىن, زاڭعار.
جەتەسi جەتi اتادان ءارi كەتكەن,
تالىستاي تامىرىمدا اسىل قان بار!..».
اقىن اسقاقتاتقان سويقان سالار جاسىن مىنەز بۇگىندە ەل قىزمەتىندەگى ەر-ازاماتتاردىڭ ءبارىنىڭ بىردەي بويىندا بولماي تۇر.
كەزىندە ءوزىمىز كۋا بولعان مىنا ءبىر وقيعا كەشەلى بەرى ەسكە تۇسە بەردى. مۇمكىن سۋ شارۋاشىلىعىمەن بايلانىستى بولعاندىقتان شىعار. وسىدان ونشاقتى جىل بۇرىن جامبىل وبلىسىنىڭ قورداي اۋدانىندا قازاقستان مەن قىرعىزستان تاراپىنىڭ ۇكىمەتارالىق كەزدەسۋى بولدى. سول جىلعى سۋ تاپشىلىعىنان ترانسشەكارالىق شۋ, تالاس وزەندەرىنەن ءنار الاتىن جامبىلدىق قورداي, شۋ, بايزاق اۋداندارىنداعى 45 مىڭ گەكتارعا جۋىق سۋارمالى القاپقا قۇرعاقشىلىق قاۋپى ءتونىپ تۇرعان.
قىرعىزستان تاراپى ورتالىق ازيا ەلدەرىنە ورتاق ەرەجەدەگى كەلىسىمدى بۇزىپ, شۋ مەن تالاس وزەنىمەن ءبىزدىڭ ەلگە كەتەتىن سۋ كولەمىن نورماتيۆتەن تومەن جىبەرىپ وتىر ەكەن. ياعني ولاردا دا سۋ تاپشىلىعى سەزىلىپ, ديقاندارى باس كوتەرگەن كورىنەدى. امال جوق, ولاردىڭ ورتوتوعوي جانە كيروۆ سۋقويمالارىنان بىزگە شىعاتىن ارنانى بوگەۋىنە تۋرا كەلگەن. سالدارىنان جامبىل وبلىسىنىڭ مىڭداعان گەكتار سۋارمالى القابى ديقانداردىڭ كوز الدىندا قۇرعاپ بارا جاتتى. الگى جينالىستا قىرعىز تاراپى ءتۇرلى سىلتاۋ ايتىپ, كونەتىن ءتۇرى جوق. سول ساتتە ەلىمىزدىڭ سۋ كوميتەتىنىڭ سول كەزدەگى توراعاسى يسلام ابىشەۆ ءسوز الىپ, قىرعىزستاندىق ارىپتەسىن تىعىرىققا تىرەپ, ابدەن قىزارتتى. ەكس-توراعانىڭ ايتۋىنشا, كەڭەس وكىمەتى تاراپ, بۇرىنعى وداقتاس ەلدەر ءوز-وزدەرىنە ەندى كەلىپ جاتقان تۇستا ورتاازيالىق ەلدەردىڭ سۋ شارۋاشىلىعىنىڭ باسشىلارى الماتىدا ۇلكەن داستارقاندا باس قوسىپ, باۋىرلاس ەلدەر رەتىندە قول الىسىپ, رەسمي دە, بەيرەسمي دە كەلىسىمگە كەلگەن ەكەن. ياعني ي.ابىشەۆ: «سۋ ءبولىسۋ توڭىرەگىندەگى ماسەلەلەر مەملەكەتتەر اراسىنداعى جانجالعا سەپ بولماۋى كەرەك, سۋ كوميتەتتەرىنىڭ باسشىلارى سونى ۇلكەن داۋعا اينالدىرماي, ءوزىمىز-اق رەتتەپ وتىرايىق دەپ كەلىسكەنىمىز قايدا قالدى؟ سول كەزدە ەكەۋىمىز دە قول الىسىپ ەدىك قوي», دەپ دالا زاڭىنا ءتان مىنەز تانىتىپ ەدى ارىپتەسى سوزگە توقتاپ, سول جەردە تەلەفون ارقىلى شۋ وزەنىنىڭ قۇلاعىن اشتىرتتى. كەيدە مۇنداي داۋلى ماسەلەدە دىتتەگەن ماقساتقا جەتۋ ءۇشىن ءبىزدىڭ قازىرگى شەنەۋنىكتەردىڭ دە مىنەز تانىتۋى قاجەت سياقتى. «ۇلتقا قىزمەت ەتۋ بىلىمنەن ەمەس, مىنەزدەن» دەگەن ەدى عوي الاش ارداقتىسى ءاليحان بوكەيحان.
جالپى, ۇلتىمىزدىڭ مىنەزى تۋرالى مىسال قاي ورتادا, قوعامنىڭ قاي سالاسىندا بولسىن جەتەرلىك. 86-نىڭ جەلتوقسانىندا ادىلدىكتىڭ جالاۋىن الاڭعا ۇستاپ شىققان جاستار تاعدىردىڭ تەپكىسىنەن مىڭ ءولىپ, مىڭ تىرىلگەن ۇلتىمىزدىڭ رۋحىنىڭ ءالى وشپەگەنىن ايگىلەدى. سيدنەي وليمپياداسىنداعى مۇحتارحان مەن بەكزاتتىڭ جەڭىسى كەزدەيسوق ەمەس, نامىستان تۋعان ءور مىنەزدەن ەكەنىن بۇگىنگى ۇرپاق جاتتاپ وسۋگە ءتيىس. مۇحتارحانعا باپكەرلەر ايگىلى الىپ بوكسشى رۋبالكابامەن رينگكە شىقپاي-اق قويۋ جونىندە كەڭەس بەرىپ, كوندىرە الماپتى, ال بەكزاتتان وتاندىق وليمپيادا كوميتەتى ايتارلىقتاي ءۇمىت كۇتپەپتى. نامىستان قايرالعان جىگىتتەردىڭ ءبىرى – مۇحتارحان ءومىرى جەڭىلمەگەن كۋبالىقتى الىپ ۇرسا, بەكزات بارلىق قارسىلاسىن باسىم ۇپايمەن ۇتىپ شىقتى...
ال بۇگىن شە؟ بۇگىن جارتى قازاقستاندى سۋ باسىپ, قابىرعامىز قايىسىپ وتىر. جاۋاپتىلاردىڭ ءتۇرلى سىلتاۋىن, اقتالۋىن ەستىپ بولدىق. بىراق الدىن الا قامدانعان ناقتى ءىس-ارەكەتتەرىن كورمەدىك.
كەشەلى بەرى الەۋمەتتىك جەلىدە اتىراۋ وبلىسىنىڭ ميالى اۋىلىنداعى جاعداي قىزۋ تالقىلانىپ جاتىر. راس بولسا, اۋىلدىڭ باسكوتەرەر ازاماتتارى جەرگىلىكتى اتقارۋشى بيلىكتىڭ قىر سوڭىنان قالماي الدا قيىندىق تۋعىزۋى مۇمكىن قارعىن سۋدىڭ قاۋپىن سەيىلتۋگە ەرتە قامدانعان ەكەن. ميالىنىڭ توبەسىندەگى قۇس ۇشار بيىكتەن تۇسىرىلگەن بەينەتاسپادان بۇل اۋىل قۇددى ءبىر تەڭىزدىڭ ورتاسىندا ورنالاسقان با دەرسىڭ. اۋىلدى قورشاي, انتالاپ تۇرعان تاسقىن سۋدىڭ دامبادان سىزات تاپپاي تۇرعانى اۋىلدىڭ ىنتىماق-بىرلىگىنىڭ, ازاماتتارىنىڭ تابيعاتتىڭ توسىن مىنەزىنە قارسى تۇرعان جاسىن مىنەزىن ايگىلەپ تۇرعانداي ەكەن.
الدا كوكتەمنىڭ جەر قىزدىرىپ, تىرشىلىككە جان بىتىرەر جىلى كۇندەرى كەلە جاتىر. ال التى اي بويى قىس قۇرساۋىندا جاتاتىن التاي جاقتا توڭ ءالى جىبىگەن جوق...
