2024 جىلعى 1 قاڭتاردان باستاپ بيزنەس ءۇشىن وتپەلى كەزەڭ جۇمىس ىستەيدى, وسى مەرزىم وتكەننەن كەيىن شىعارىندىلار ءۇشىن كوتەرىلگەن ەكولوگيالىق تولەمدەر ونەركاسىپتىڭ 6 سەكتورىنا اسەر ەتەدى. بۇل – قارا مەتالدار مەن اليۋميني, تسەمەنت, تىڭايتقىشتار, سۋتەگى جانە ەلەكتر ەنەرگياسىن ءوندىرۋ.
ەكولوگيا جانە تابيعي رەسۋرستار ۆيتسە-ءمينيسترى مانسۇر وشۋرباەۆتىڭ ايتۋىنشا, شەكارالىق كومىرتەگى مەحانيزمىن ەنگىزۋ جەتەكشىلىك ەتەتىن مينيسترلىكتەرمەن جانە ونەركاسىپشىلەرمەن بىرلەسىپ ۇلكەن جۇمىس كولەمىن قاراستىرادى.
«QazTrade» اق باس ديرەكتورىنىڭ ورىنباسارى نۇرلان قۇلباتىروۆتىڭ ايتۋىنشا, ەو-نىڭ «جاسىل باعىتى» جانە شەكارالىق تۇزەتۋشى كومىرتەگى سالىعىن ەنگىزۋ ءبىز ءۇشىن وزەكتى.
«وندىرۋشىلەردە جاڭا ترانسشەكارالىق سالىق باستاماسىنا قاتىستى سۇراقتار تۋىندايدى. ءبىز ەو-نىڭ تۇراقتى دامۋ جانە دەكاربونيزاتسيا ماقساتتارىن قولدايمىز, بىراق بۇل ماقساتتار حالىقارالىق ساۋداعا كەدەرگى كەلتىرمەۋگە ءتيىس», دەدى نۇرلان قۇلباتىروۆ.
بۇگىندە وتاندىق ەكسپورتتىڭ 39%-ى ەو ەلدەرىنە تيەسىلى. بۇعان مۇناي, مۇناي ونىمدەرى, فەرروقورىتپالار, كومىر, ۋران, بيداي جانە باسقا دا تاۋارلار كىرەدى. ەۋروپا ەلدەرىنىڭ ساۋدا كولەمى وڭ ديناميكانى كورسەتەدى. 2023 جىلى قازاقستان ەو-عا 41,4 ملرد دوللارعا ءونىم ەكسپورتتادى, ونىڭ 388,7 ملن دوللارى كومىرتەكتى كوپ قاجەت ەتەتىن تاۋارلارعا تيەسىلى.
ەلىمىزدىڭ الدىندا 2030 جىلعا قاراي تازا شىعارىندىلاردى 328,4 ملن تونناعا دەيىن تومەندەتۋ جانە حالىقارالىق قولداۋ شارتىمەن 1990 جىلعى كورسەتكىشتەرمەن سالىستىرعاندا شىعارىندىلاردى 25%-عا قىسقارتۋ مىندەتى تۇر. ەىدۇ ساراپشىلارى تۇسىندىرگەندەي, بۇل 2030 جىلعا قاراي قازاقستانعا كومىر گەنەراتسياسىنىڭ ۇلەسىن 65%-دان 40%-عا دەيىن قىسقارتۋ جانە جاڭارتىلاتىن ەنەرگيا كوزدەرىنىڭ ۇلەسىن 10%-دان 24%-عا دەيىن ۇلعايتۋ قاجەت دەگەندى بىلدىرەدى.
«QazTrade» اق حالىقارالىق ينتەگراتسيا دەپارتامەنتىنىڭ ديرەكتورى اينۇر امىربەكوۆا وتاندىق ونەركاسىپشىلەردىڭ الداعى جىلدارى كەزدەسەتىن سىن-قاتەرلەرى مەن تاۋەكەلدەرىن اتاپ ءوتتى.
«قازاقستاندىق ەكسپورتتا كومىرسۋتەك شيكىزاتىنىڭ قۇرامداس بولىگى نەعۇرلىم جوعارى بولسا, يمپورتتاۋشى ەلدەردە سالىقتار مەن الىمدار سوعۇرلىم جوعارى بولادى. سوندىقتان ءوندىرىستىڭ تەحنولوگيالىق ۇدەرىستەرىن جاڭعىرتۋ جونىندەگى ءىس-شارالار جوسپارىن ازىرلەۋ, ولاردى ىسكە اسىرۋعا بيۋدجەتتىك قاراجاتتى قاراستىرۋ قاجەت», دەدى اينۇر امىربەكوۆا.
