اتىراۋدا وتكەن ۇلتتىق قۇرىلتايدا دا مەملەكەت باسشىسى «ادال ادام – ادال ەڭبەك – ادال تابىس» ۇشتۇعىرىنىڭ ءبىر نەگىزى رەتىندە وسى ىندەتپەن كۇرەس جولىن اتاپ ءوتتى. «قاعيدامىز – ادىلدىك, تىرەگىمىز – جاۋاپكەرشىلىك, ماقساتىمىز – ورلەۋ. ەلىمىز وسى قۇندىلىقتاردى بەرىك ۇستانا وتىرىپ, دامۋ كوكجيەگىن ءسوزسىز كەڭەيتە تۇسپەك. ال ءاربىر ادال ادام ادال ەڭبەگىمەن ادال تابىسقا جەتەدى» دەگەن پرەزيدەنت بۇكىل قوعام بولىپ جەمقورلىققا قارسى كۇرەستى جالعاستىرا بەرەتىنىمىزدى دە اتاپ ءوتتى. ال وتكەندە الماتىدا سىبايلاس جەمقورلىققا قارسى ءىس-قيمىل ماسەلەلەرى جونىندەگى كوميسسيانىڭ وتىرىسى وتكەن ەدى.
جەمقورلىققا قارسى كۇرەس ماسەلەسىن جۇيەلى جولعا قويۋ ماڭىزدى. الماتى قالاسىنىڭ اكىمى ەربولات دوساەۆتىڭ توراعالىعىمەن وتكەن كەڭەستە مەگاپوليستىڭ سىبايلاس جەمقورلىققا قارسى قىزمەتىنىڭ باسشىسى ارمان راحيموۆ دەنساۋلىق ساقتاۋ جانە قۇرىلىس سالاسىنداعى جەمقورلىق ىندەتىن بولدىرماۋدىڭ كەشەندى شارالارىنا توقتالدى.
قۇرىلىس جانە تۇرعىن ءۇي, ەكولوگيا, جەر قاتىناستارى, كاسىپكەرلىك, ەكونوميكا جانە قارجى, الەۋمەتتىك سالا, ينفراقۇرىلىم مەن جول – سىنعا ىلىككەن سالالار ساناتىندا. وتكەن جىلى كاسىپكەرلىك قىزمەتكە زاڭسىز ارالاسقانى ءۇشىن 3 لاۋازىمدى تۇلعا اكىمشىلىك جاۋاپكەرشىلىككە تارتىلعان. سونداي-اق رۇقسات بەرۋ ءتارتىبى مەن مەرزىمىن بۇزعان تاعى 4 تۇلعانىڭ ارەكەتى اشكەرەلەنگەن. وسىلايشا, جەمقورلار قولدى قىلعان 9,2 ملرد تەڭگە قايتارىلىپ, تاعى 5,4 ملرد تەڭگە كولەمىندەگى قارجى بۇعاتتالعان.
كەڭەستى اشقان ەربولات دوساەۆ مەملەكەت باسشىسىنىڭ تاپسىرماسىنا سايكەس سىبايلاس جەمقورلىقتىڭ الدىن الۋ جانە وعان قارسى ءىس-قيمىل شارالارىنا ەرەكشە كوڭىل بولىنەتىنىن اتادى. ارمان راحيموۆتىڭ مالىمەتىنشە, قابىلدانىپ جاتقان شارالار مەگاپوليستە سىبايلاس جەمقورلىق قىلمىسىن تومەندەتۋگە مۇمكىندىك بەردى. ماسەلەن, 2019-2021 جىلدار ارالىعىندا قالانىڭ دەنساۋلىق ساقتاۋ سالاسىنداعى سىبايلاس جەمقورلىققا قارسى قىزمەتى 36 قىلمىستىق ءىستى تىركەسە, كەيىنگى ەكى جىلدا بارلىعى 3 قىلمىستىق ءىس تىركەلگەن.
الماتىنىڭ سىبايلاس جەمقورلىققا قارسى قىزمەتىنىڭ باسشىسى 2023 جىلى قالانىڭ قوعامدىق دەنساۋلىق ساقتاۋ باسقارماسىنىڭ قىزمەتىن سىرتقى تالداۋ ناتيجەسىندە 18 سىبايلاس جەمقورلىق تاۋەكەلى انىقتالعانىن, 20 ۇسىنىس ەنگىزىلگەنىن حابارلادى. بۇعان قوسا, جەكە مەديتسينالىق ۇيىمدارعا مەديتسينالىق قىزمەتكە ليتسەنزيا الۋ كەزىندەگى ىقتيمال بۇزۋشىلىقتار تۋرالى شاعىمدارعا بايلانىستى ولاردىڭ قىزمەتىنىڭ زاڭدىلىعىنا مونيتورينگ جۇرگىزۋ ۇسىنىلعان.
الماتى قالاسى قوعامدىق دەنساۋلىق ساقتاۋ باسقارماسىنىڭ باسشىسى يران شامەتەكوۆ بايانداعانداي, مەديتسينالىق قىزمەت كورسەتۋ ساپاسىن ارتتىرۋ ءۇشىن ءمامس جۇيەسىندە جۇمىس ىستەيتىن 147 مەديتسينالىق ۇيىم, ونىڭ ىشىندە 123 جەكە ۇيىم پرواكتيۆتى مونيتورينگپەن قامتىلعان.
قالا اكىمى قوعامدىق دەنساۋلىق ساقتاۋ باسقارماسىنا مەديتسينالىق جانە فارماتسەۆتيكالىق باقىلاۋ كوميتەتىنىڭ الماتى بويىنشا دەپارتامەنتىمەن بىرلەسىپ, دەنساۋلىق ساقتاۋ مينيسترلىگىنە جەكە مەديتسينالىق ۇيىمدار بويىنشا ۇسىنىستار ەنگىزۋدى تاپسىردى. ەربولات دوساەۆ اتاپ وتكەندەي, بۇل جۇمىستىڭ باستى ماقساتى – مەديتسينالىق قىزمەتتىڭ ساپاسىن ارتتىرۋ جانە قالا تۇرعىندارىنىڭ وتىنىشىنە ۋاقتىلى دەن قويۋ.
قۇرىلىس سالاسىنداعى سىبايلاس جەمقورلىق تاۋەكەلدەرىن جويۋ جونىندەگى شارالار تۋرالى الماتى اكىمدىگى اپپاراتىنىڭ باسشىسى بەيبىت شاحانوۆ مالىمدەدى. ونىڭ ايتۋىنشا, ساۋلەت ورگاندارى جۇمىسىنىڭ اشىقتىعىن قامتاماسىز ەتۋ جانە قازىرگى زامانعى IT شەشىمدەردى پايدالانۋ مەن لاۋازىمدى تۇلعالاردىڭ جۇمىسىن رەگلامەنتتەۋ ارقىلى وسى سالاداعى باقىلاۋدى كۇشەيتۋگە ماڭىز بەرىلگەن. سونداي-اق اۋىل شارۋاشىلىعى مينيسترلىگىنە جەر قاتىناستارىن جەتىلدىرۋ جانە تەرىس ماقساتتا پايدالانۋ مۇمكىندىكتەرىن جويۋ بويىنشا بىرقاتار ۇسىنىس جولدانىپتى.
«اكىمدىكتىڭ جاۋاپتى بولىمشەلەرىنە ءار سالاداعى سىرتقى تالداۋ ناتيجەسى بويىنشا انىقتالعان سىبايلاس جەمقورلىق جاساۋعا ىقپال ەتەتىن سەبەپتەر مەن جاعدايلاردى جويۋ بويىنشا ۇسىنىمداردىڭ ساپالى ورىندالۋىن قامتاماسىز ەتۋدى تاپسىرامىن. سىبايلاس جەمقورلىق تاۋەكەلدەرىن انىقتاۋ جانە جويۋ, سىبايلاس جەمقورلىققا قارسى مادەنيەتتى نىعايتۋ جانە سىبايلاس جەمقورلىقتىڭ الدىن الۋ ءاربىر باسشىنىڭ كۇندەلىكتى جۇمىسى بولۋعا ءتيىس. رەسمي جۇمىس ادىستەرىنەن باس تارتىپ, حالىقتىڭ نارازىلىعىن تۋدىراتىن جۇيەلى پروبلەمالىق ماسەلەلەردى شەشۋ جونىندە شارالار قابىلداۋ قاجەت», دەدى ەربولات دوساەۆ.
الماتى
