تابيعاتتىڭ تاسىر مىنەزىن كىم ءتۇسىنىپ بولعانداي؟ قازىرگى كەزدە قىزىل سۋ ءال بەرمەي بارادى. وبلىستىڭ ىرگەسىندەگى جەزدى كەنتىندەگى سۋ تاسقىنىنىڭ كۇشەيگەنى سونشالىق, مۇندا توتەنشە جاعداي جاريالاۋعا تۋرا كەلدى. ويتكەنى كەنتتەگى ون شاقتى ءۇيدى سۋ باسىپ قالعان. بۇلارعا باسقا دا قاۋىپتى ۇيلەردىڭ تۇرعىندارىن قوسا وتىرىپ, بارلىعى 30-عا تارتا وتباسى كوشىرىلىپ, ۋاقىتشا جاتاقحاناعا ورنالاستىرىلدى. قازىر كەلتىرىلگەن زالال, شىعىن ەسەپتەلىپ جاتىر.
– جەزدى وزەنىنىڭ دەڭگەيى 3,5 مەترگە دەيىن كوتەرىلىپ كەتتى. دەس بەرگەندە, الدىن الا اتقارىلعان ءىس-شارالار ارقىلى عانا كۇللى كەنتتى تاسقىن استىندا قالۋعا جول بەرىلمەدى. قازىرگى ۋاقىتتا جەرگىلىكتى اتقارۋشى ورگاننان – 15, توتەنشە جاعدايلار دەپارتامەنتىنەن – 50-گە جۋىق, پوليتسيا دەپارتامەنتىنەن 30-دان اسا قىزمەتكەر, جالپى سانى 13 تەحنيكا مەن 3 سورعى جۇمىس ىستەپ جاتىر. جەزدىدەگى جاعدايدى وبلىس اكىمى بەرىك ابدىعالي ۇلى ءوزى بارىپ كوردى, حالىقپەن كەزدەسىپ, جەرگىلىكتى باسشىلىققا ءتيىستى تاپسىرمالار بەردى, – دەيدى وبلىس اكىمىنىڭ ءباسپاسوز حاتشىسى ەركەناز وسپانبەكوۆا.
رەسمي مالىمەتكە سۇيەنسەك, سۋ باسۋ قاۋپى جوعارى بولىپ تۇرعان تالدىساي اۋىلىنىڭ تۇرعىندارى دا تۇگەلدەي جەزدى كەنتىنە قونىستاندىرىلدى. وبلىس باسشىلىعى ولاردىڭ ءۇي-جايلارىنا بارىپ, حابار الىپ تۇرۋى ءۇشىن كۇنىنە ەكى اراعا كولىك قاتىناسىن ۇيىمداستىرۋدى قولعا الدى. 28 ناۋرىزدا قوستاناي وبلىسىنىڭ ۇلىتاۋعا جاقىن ماڭىنداعى «سارىتورعاي اۋىلىن تولىقتاي سۋ باسىپ قالدى» دەگەن حابار جەتىسىمەن, حالىقتى جەتكىزۋ قاجەتتىلىگى تۋىنداپ قالۋ مۇمكىندىگى ەسكەرىلىپ, جەزقازعان قالاسىنا 300-گە جۋىق ادامدى ورنالاستىرۋ, اس-سۋىن بەرۋ ماسەلەسى دە شەشىمىن تاپقان ەدى. بۇل قيىن كەزدە كورشىلەس ەلدىڭ ءبىر-بىرىنە كومەك كورسەتۋگە ءازىر ەكەنىن كورسەتتى.
قار ءالى دە تولىق ەرىپ بىتكەن جوق. سوندىقتان كەيبىر جەرلەردە سۋ دەڭگەيى تومەندەگەنى بايقالا باستاعانىمەن, قاۋىپ سەيىلدى دەپ ايتۋعا بولمايدى.
ۇلىتاۋ وبلىسى
