سەنبى كۇنى پرەمەر-ءمينيستردىڭ ءبىرىنشى ورىنباسارى رومان سكليار باتىس قازاقستان وبلىسىنا ىسساپارمەن كەلىپ, وبلىس اكىمى ناريمان تورەعاليەۆپەن بىرگە سۋ تاسقىنى بولعان اۋماقتاردى تىكۇشاقپەن ارالاپ, جاعدايدى ءوز كوزىمەن كوردى.
ۇكىمەت باسشىسىنىڭ ورىنباسارى كولەمى جاعىنان اۋقىمدى سۋ تاسقىنى بولعان تەرەكتى, سىرىم, قاراتوبە اۋداندارىنىڭ اۋماعىن كوردى. وبلىس اكىمى ناريمان تورەعاليەۆ تاسقىننىڭ الدىن الۋعا, حالىقتى قاۋىپسىز جەرگە كوشىرۋ باعىتىندا اتقارىلىپ جاتقان جۇمىستار تۋرالى ايتتى.
وبلىستىڭ تەرەكتى, سىرىم, قاراتوبە, ءبورلى اۋداندارىندا, سونداي-اق, ورال قالاسىندا تاسقىنعا بايلانىستى تابيعي سيپاتتا توتەنشە جاعداي جاريالانعان. سۋ باسقان اۋماقتار كوپ مولشەردەگى جاۋىن-شاشىننىڭ سالدارىنان ۇلعايا تۇسكەن.
قازىرگى ۋاقىتتا تۇرعىندار قاۋىپسىز جەرگە كوشىرىلىپ جاتىر. سوڭعى دەرەكتەرگە قاراعاندا جالپى سانى 1122 ادام ەۆاكۋاتسيالىق پۋنكتكە جەتكىزىلگەن, ءۇي جانۋارلارى قاۋىپسىز اۋماقتارعا ايدالعان.
باتىس قازاقستان وبلىسىندا سۋ تاسقىنى سالدارىمەن توتەنشە جاعدايلار دەپارتامەنتىنىڭ جەكە قۇرامى, جەرگىلىكتى اتقارۋشى ورگاندار, قورعانىس مينيسترلىگى مەن ىشكى ىستەر مينيسترلىگىنىڭ ماماندارى كۇرەسىپ جاتىر. 306 تەحنيكا مەن 146 موتوسورعى وسى ىسكە جەگىلگەن.
سونداي-اق ماڭعىستاۋ وبلىسىنىڭ جانە توتەنشە جاعداي مينيسترلىگى اسكەري بولىمدەرىنىڭ كۇشتەرى تارتىلدى. قوسىمشا ۇقك شەكارا قىزمەتىنىڭ «مي-8» ەكى تىكۇشاعى كومەكتە ءجۇر.
وڭىردە ارنايى كوميسسيا قۇرىلىپ, كەلتىرىلگەن زالالدى ەسەپتەۋ باستالدى. رومان سكليار بارلىق باعىت بويىنشا سۋ تاسقىنىنا قارسى جۇمىستى كۇشەيتۋدى تاپسىردى. «ۇكىمەت تاراپىنان بارلىق قاجەتتى كومەك كورسەتىلەتىن بولادى», دەدى پرەمەر-ءمينيستردىڭ ءبىرىنشى ورىنباسارى.
شىڭعىرلاۋ وزەنىنىڭ دەڭگەيىنىڭ كوتەرىلۋىنە بايلانىستى ەلدى مەكەندەردى سۋ باسۋ قاۋپى تۋىندادى, قازىرگى ۋاقىتتا ءبورلى اۋدانىنىڭ اقسۋ جانە كەڭتۇبەك اۋىلدارىندا 251 ادام ەۆاكۋاتسيالاندى.
باتىس قازاقستان وبلىسىنا جاعدايمەن جەكە تانىسۋ ءۇشىن ۆيتسە-مينيستر ەرلان نۇرپەيىسوۆ كەلدى. قازاقستان رەسپۋبليكاسى پارلامەنتى ءماجىلىسىنىڭ دەپۋتاتى نارتاي سارسەنعاليەۆ تە اپات ايماعىندا ءجۇر.
«باتىس قازاقستان وبلىسىنا تابانىم تيىسىمەن تىكۇشاقپەن وبلىستىڭ سۋ باسقان اۋداندارىنا, شالعاي ورتالىقتارىنا بارىپ كەلدىك. 692000 ادام تۇراتىن باتىس قازاقستاننىڭ سۋ باسقان ايماقتارىنداعى قاتىستى احۋال قيىن. كۇن ساناپ جاعداي كۇردەلەنىپ بارادى. قازىردىڭ وزىندە وبلىستا 455 ءۇيدى سۋ باسقان, 22 عيمارات سۋ استىندا قالعان. قاردىڭ ەرۋى جانە جاۋىن-شاشىننىڭ سالدارىنان 17 الەۋمەتتىك جانە مەملەكەتتىك ماڭىزى بار نىساننىڭ جانە 5 كوپ قاباتتى تۇرعىن ءۇيدىڭ جەرتولەسىن, سونداي-اق 460 جەكە تۇرعىن ءۇيدى جانە 99 تۇرعىن ءۇيدىڭ اۋلاسىن سۋ باسقان. حالىق قاتتى ۇرەيلەنىپ قالعان», دەيدى دەپۋتات.
بۇدان بۇرىن حابارلاعانىمىزداي, باتىس قازاقستان وبلىسىنىڭ اقجايىق, جانىبەك, تەرەكتى, سىرىم, قاراتوبە, شىڭعىرلاۋ, ءبورلى, كازتالوۆ اۋداندارىندا 17 اۆتوجولدىڭ 37 بولىگىن سۋ باسىپ, قازىر 4 اۋداننىڭ 17 ەلدى مەكەنىمەن جول قاتىناسى ءۇزىلىپ وتىر.
باتىس قازاقستان وبلىسىنداعى سۋ تاسقىنى جاعدايىنا بايلانىستى تجد پسيحولوگتەرى ەۆاكۋاتسيالىق پۋنكتتەردەگى زارداپ شەككەن حالىققا شۇعىل پسيحولوگيالىق كومەك كورسەتىپ جاتىر.
توتەنشە جاعداي باسقارماسىنىڭ مالىمەتىنە سايكەس, شاعان, دەركول وزەندەرى سۋىنىڭ ەڭ جوعارى دەڭگەيگە كوتەرىلۋىنە بايلانىستى ساياجاي ۇيلەرىنىڭ اۋماعىن سۋ باسۋى مۇمكىن. وسىعان وراي وزەن جايىلمالارىنداعى ساياجاي تۇرعىندارىنا الدىن الا قاۋىپسىز جەرگە كوشۋ تۋرالى ەسكەرتىلدى. ۋاقىتشا تۇراتىن ءۇي-جايى جوق تۇرعىندارعا ەۆاكۋاتسيالىق پۋنكتتەر دايىندالدى.
ماماندار ەندىگى قاۋىپ رەسەي اۋماعىنان كەلەتىن وزەندەردەن كەلۋى مۇمكىن ەكەنىن ايتىپ جاتىر. ساراتوۆمەليوۆودحوز باسقارماسىنىڭ مالىمەتى بويىنشا قاراوزەن مەن سارىوزەن دەڭگەيى كۇرت كوتەرىلگەن. باتىس قازاقستان وبلىسىنا ەڭ جاقىن رەسەيدىڭ پريۋزەن سۋ قويماسىنان قاراوزەنگە سەكۋندىنا 372 تەكشەمەتر سۋ, ال ۆارفولومەەۆ سۋ قويماسىنان سارىوزەنگە سەكۋندىنا 100 تەكشە مەتر سۋ جىبەرىلىپ جاتىر ەكەن.
وسىعان بايلانىستى, وبلىس اكىمى ناريمان تورەعاليەۆتىڭ تاپسىرماسى بويىنشا جەدەل قاۋىپسىزدىك شارالارى قابىلداندى.
سۋ باسۋ قاۋپى بار ايماق تۇرعىندارىنا قاجەت ۋاقىتتا قاۋىپسىز جەرگە كوشۋگە دايىن بولۋى ەسكەرتىلدى.
