فوتو: akorda.kz
پرەزيدەنت قاسىم-جومارت توقاەۆ ەلىمىزدىڭ بىرقاتار وڭىرىندە بولعان سۋ تاسقىنى سالدارىنان تۋىنداعان توتەنشە جاعدايعا بايلانىستى شۇعىل كەڭەس وتكىزدى.
جيىنعا پرەمەر-مينيستر ولجاس بەكتەنوۆ, ۇكىمەت مۇشەلەرى, پرەزيدەنت اكىمشىلىگىنىڭ باسشىلىعى جانە باسقا دا لاۋازىمدى تۇلعالار قاتىستى.
مەملەكەت باسشىسىنا ايماقتارداعى قازىرگى قالىپتاسقان احۋال تۋرالى, اتاپ ايتقاندا, ادامداردى قۇتقارۋ جانە سۋ تاسقىنىنىڭ سالدارىن جويۋ ءۇشىن قابىلدانىپ جاتقان شارالار جونىندە باياندالدى.
پرەزيدەنت ۇكىمەت پەن اكىمدەردىڭ جۇمىسىن نەمقۇرايلى جانە كاسىبي مىندەتىنە سايكەس كەلمەيدى دەپ سىنعا الدى. ونىڭ ايتۋىنشا, ۇكىمەت پەن جەرگىلىكتى اتقارۋشى ورگانداردىڭ اراسىندا جۇيەلى بايلانىس بولماعان. قاسىم-جومارت توقاەۆ زارداپ شەككەن وڭىرلەر تۇرعىندارىنا ۇلكەن كولەمدە شىعىن كەلۋىنە بايلانىستى وكىنىش ءبىلدىردى. مەملەكەت باسشىسى قالىپتاسقان جاعدايعا بايلانىستى كەشىرىم سۇراپ, بارلىق ازاماتقا كومەك كورسەتىلەتىنىن ايتتى.
جيىن بارىسىندا پرەزيدەنت سۋ تاسقىنىنا قارسى ۋاقىتىلى شارا قابىلداماعانى ءۇشىن پرەمەر-ءمينيستردىڭ ءبىرىنشى ورىنباسارى رومان سكليارعا, سۋ رەسۋرستارى جانە يرريگاتسيا ءمينيسترى نۇرجان نۇرجىگىتوۆكە قاتاڭ سوگىس, اقتوبە, قوستاناي, باتىس قازاقستان وبلىستارىنىڭ اكىمدەرىنە قاتاڭ سوگىس جانە قىزمەتتىك مىندەتتەرىنە تولىق ساي كەلمەۋىنە بايلانىستى ەسكەرتۋ بەردى. ال اتىراۋ, اقمولا, الماتى, پاۆلودار جانە اباي وبلىستارىنىڭ اكىمدەرىنە قاتاڭ سوگىس جاريالاندى.
پرەزيدەنت جاعدايدى قالىپقا كەلتىرۋ ءۇشىن شۇعىل شارالار قابىلداۋمەن قاتار جۇيەلى جۇمىس قاجەت ەكەنىن اتاپ ءوتتى.
پرەمەر-ءمينيستردىڭ توراعالىعىمەن رەسپۋبليكالىق شتاب قۇرۋ, سونداي-اق بارلىق وڭىردە سۋ تاسقىنىنا قارسى جۇمىستاردى كۇشەيتۋ, ەڭ باستىسى, ازاماتتاردىڭ قاۋىپسىزدىگىن قامتاماسىز ەتۋ جونىندە تاپسىرما بەرىلدى.
مەملەكەتتىك قۇرىلىمدارعا تابيعات اپاتى سالدارىنان بولعان شىعىن كولەمىن انىقتاۋ جانە الداعى ۋاقىتتا وسىنداي اپاتتاردىڭ الدىن الۋ ءۇشىن كەشەندى شارالار قابىلداۋ مىندەتى جۇكتەلدى.
