ماسەلەن, كوكشەتاۋلىق ۆولونتەرلەر مەكتەپ جەرتولەلەرىن سۋدان ارىلتۋ, سورۋ شارالارىنا جۇمىلدىرىلدى. وسىنداي جۇمىستار وبلىستىڭ تاسقىن سۋدان زارداپ شەككەن اۋدانداردىڭ بارلىعىندا اتقارىلىپ جاتىر. سونداي-اق ەرىكتىلەر ايماقتاردى قاردان تازارتۋ جۇمىستارىنا دا تارتىلدى. اسىرەسە جالعىزباستى قارتتاردىڭ ۇيلەرىن سۋ تاسقىنىنان الدىن الۋ ءۇشىن اۋلا ماڭىن مۇز بەن قاردان تازارتىپ جاتىر.
ال اباي وبلىسىندا كوپىردىڭ قۇلاۋىنا بايلانىستى بوزاي ەلدى مەكەنىنە كىرىپ شىعۋ مۇمكىن بولماعاندىقتان, ارنايى تەحنيكا ارقىلى ازىق-ت ۇلىك پەن باسقا دا كەرەكتى جابدىقتار جەتكىزىلىپ جاتىر. سونىمەن قاتار ەرىكتىلەر تۇرعىن ۇيلەرگە سۋدىڭ كىرىپ كەتپەۋى ءۇشىن قۇم تولتىرىلعان قاپشىقتاردان بوگەتتەردى ورنالاستىرۋعا كومەك كورسەتىپ جاتىر. وقيعا ورنىندا 30-عا جۋىقەرىكتى قول ۇشىن سوزىپ ءجۇر. 
«جاستار رۋحى» جاستار قاناتىنىڭ توراعاسى اقەركە يسكاندەروۆا اپات باستالعالى بەرى ايماقتاردا ۆولونتەرلەر ءتۇرلى باعىتتا كومەك كورسەتىپ جاتقانىن ايتتى.
«جاستار قاناتىنىڭ ايماقتىق فيليالدارى سۋ باسقان ورىنداردا قالپىنا كەلتىرۋ جۇمىستارىنا جۇمىلدىرىلسا, ەكىنشى وڭىردە قالا ماڭىنداعى وزەندەردىڭ تاسىپ كەتپەۋىن الدىن الىپ, بوگەتتەر جاساپ جاتىر. ودان بولەك رۋحتاستار گۋمانيتارلىق كومەكتى شالعاي اۋىلدارعا جەتكىزۋدى قولعا الدى. كۇنى-ءتۇنى جۇمىس جاساپ, حالىقتى ەۆاكۋاتسيالاۋعا اتسالىسىپ جاتقان ۆولونتەرلەردىڭ دە ەڭبەگىن ەرەكشە اتاپ ءوتۋ كەرەك», دەدى ول.
جاستار قاناتىنىڭ اقتوبەلىك ۆولونتەرلەرى بۇگىن تۇندە 1584 تۇرعىندى ەۆاكۋاتسيالادى. ال باتىس قازاقستان وبلىسىندا شالعاي ورنالاسقان ەلدى مەكەندەرگە 3 توننا كولەمىندە گۋمانيتارلىق كومەك جەتكىزىلىپ, تۇرعىندارعا تابىستالدى.
تاسقىن سۋ جۇرگەن 5 ايماققا – اباي, اقتوبە, قوستاناي, باتىس قازاقستان, اقمولا وبلىستارىنىڭ ەرىكتىلەرىنە ارنايى كيىم جابدىقتارى جولداندى. ۇيىمداستىرۋشىلاردىڭ ايتۋى بويىنشا, ەرىكتىلەردىڭ دەنساۋلىعى باستى ورىندا تۇر.
اقمولا وبلىسىنىڭ ۆولونتەرى سەرىك تاناتباەۆتىڭ ايتۋىنشا, زارداپ شەككەن وتانداستارىمىزعا قولدان كەلگەن بار كومەك كورسەتىلىپ جاتىر.
«اپات بولعان ۋاقىتتان بەرى وسىندامىز. توتەنشە جاعداي قىزمەتكەرلەرىنىڭ نۇسقاۋىمەن سۋ باسقان ۇيلەردى سۋدان تازارتۋ, تاسقىن سۋدىڭ الدىن الۋ جۇمىستارىن جۇرگىزىپ جاتىرمىز. ء«بىر جاعادان باس, ءبىر جەڭنەن قول شىعارىپ» سۋ تاسقىنىنىڭ العاشقى ساعاتىنان-اق جەرگىلىكتى تۇرعىندارعا كومەك بەرىپ جاتىرمىز. جاستار قاناتىنىڭ ۆولونتەرلەرى ەل باسىنا كۇن تۋعان جاعدايدا ءاردايىم حالىققا كومەك بەرۋگە دايىن», دەدى ول.
سونداي-اق تاۋلىك بويى كەزەكشىلىكتە جۇرگەن اقمولا جانە اباي وبلىسىنىڭ توتەنشە جاعداي دەپارتامەنتى قىزمەتكەرلەرىنە جاستار قاناتى «Biz Birgemiz» قوعامدىق قورىنىڭ قولداۋىمەن اۋىزاشار ۋاقىتىندا ىستىق تاماق ۇلەستىرىلدى. اباي وبلىسى اياگوز اۋدانىندا سۋ دەڭگەيىنىڭ جوعارى بولۋىنا بايلانىستى تاماقتار ارنايى قايىقتار ارقىلى جەتكىزىلدى.
«Biz Birgemiz» قق جەتەكشىسى قايرات پەريزات وسىناۋ قاسيەتتى ايدا تىڭباي ەڭبەك ەتىپ جاتقان باتىرلامىزعا ەرەكشە العىس ءبىلدىردى.
«اپات ايتىپ كەلمەيدى. سۋ تاسقىنى حالىقتى ابىگەرگە ءتۇسىرىپ, توتەنشە جاعدايلار قىزمەتكەرلەرى قانشا كۇننەن بەرى تىنىمسىز ەڭبەك ەتىپ جاتىر. مىنە, ءبىز دە بەلسەندىلەرمەن بىرگە سول ازاماتتارىمىزعا اۋىزاشار ۇيىمداستىردىق. ەلىمىزدىڭ وڭىرلەرىندەگى جاعداي تەز ارادا رەتتەلىپ, زارداپ شەككەن حالىق ءوز شاڭىراقتارىمەن قايتا قاۋىشسا ەكەن دەيمىز», دەدى ق. پەريزات.
بۇگىنگى كۇنى قىزىل سۋ جايلاعان ايماقتارعا «جاستار رۋحىنىڭ» 350-دەن اسا ەرىكتىلەرى قول ۇشىن سوزىپ جاتىر.
