قازىرگى ۋاقىتتا سۋ تاسقىنىنا قارسى توتەنشە جاعداي دەپارتامەنتىنەن جانە جەرگىلىكتى باسقارۋ ورىندارىنان 953 ادام, 265 تەحنيكا, 146 موتوسورعى جۇمىس ىستەپ جاتىر.
«25 ناۋرىزدان باستاپ وبلىس بويىنشا 351 مىڭ تەكشە مەتر ەرىگەن قار سۋى سورىلىپ, 21440 دانا ينەرتتى ماتەريالدارمەن قاپتار توسەلدى», دەپ حابارلادى توتەنشەلىكتەردىڭ ءباسپاسوز قىزمەتى.
تابيعاتتىڭ توسىن مىنەزى 25 ناۋرىزدا باستالىپ, تاۋلىك بويى جاۋعان جىلى جاڭبىردان باستالعان. ءبىر تاۋلىكتە ءبىر ايلىق جاۋىن-شاشىن مولشەرى كوكتەن قۇيىلىپ, جەردەگى قاردى ەرىتىپ جىبەردى. وسىلايشا سۋعا سۋ قوسىلىپ, شاعىن وزەندەر تاسىپ, اينالاداعى اۋىلداردى جايپاپ كەتتى.
ناۋرىزدىڭ 28-ءى كۇنگى كەشكى مالىمەت بويىنشا وبلىستا 455 تۇرعىن ءۇيدى, كوپقاباتتى 5 تۇرعىن ءۇيدىڭ جەرتولەسىن جانە 17 الەۋمەتتىك نىساندى سۋ باسقان.
ءتىلسىز جاۋدان ەڭ كوپ زارداپ شەككەن ءوڭىردىڭ ءبىرى – قاراتوبە اۋدانى. مۇندا قاردىڭ ەرۋى مەن جاۋىن-شاشىننىڭ سالدارىنان جاقسىباي وزەنى تاسىپ, اققوزى اۋىلدىق وكرۋگىنە قاراستى قورجىن اۋىلىن سۋ الىپ كەتتى. ەلدى مەكەندەگى 130 ءۇي تۇگەلگە جۋىق سۋعا كەتتى. اۋىلدىڭ 400-گە جۋىق تۇرعىنى اۋەلى مەكتەپ عيماراتىنا ەۆاكۋاتسيالانسا, كەيىن قورعانىس مينيسترلىگىنە قاراستى ەكى تىكۇشاقپەن قاراتوبە اۋدانىنىڭ ورتالىعىندا ورنالاسقان ەۆاكۋاتسيا بەكەتىنە كوشىرىلدى.
سونداي-اق وڭىرگە توتەنشە جاعدايلار مينيسترلىگىنىڭ №28237 اسكەري بولىمىنەن 50 ادام كەلىپ, سىرىم اۋدانىنىڭ جىمپيتى اۋىلىنا قۇتقارۋ جۇمىستارىنا جىبەرىلدى. ول جەردە دە 295 ادام ەۆاكۋاتسيالاندى. ايتا كەتەيىك, سىرىم اۋدانىندا ولەڭتى وزەنى مىنەز كورسەتۋدە. ارناسىنان اسقان وزەن سۋى جولىنداعى ولەڭتى, جىمپيتى اۋىلدارىنىڭ كەيبىر كوشەلەرىن باسىپ كەتتى. بۇلدىرتى اۋىلى دا زارداپ شەكتى. 26-28 ناۋرىز كۇندەرى سىرىم اۋدانى بويىنشا 1327 ادام قاۋىپسىز جەرگە كوشىرىلگەن ەكەن. اۋدان ورتالىعىنداعى تۇرعىندار «جىبەك جولى» كەمپينگى مەن ج.دوسمۇحامەدوۆ اتىنداعى مەكتەپكە ورنالاسقان. سىرىم اۋداندىق اۋرۋحاناسىنىڭ ديرەكتورى سابىر مەڭدەشەۆتىڭ ايتۋىنشا, 116 ادامعا دارىگەرلىك كومەك كورسەتىلگەن.
شىڭعىرلاۋ وزەنى دەڭگەيى دە كۇرت كوتەرىلىپ, ماڭايداعى ەلدى مەكەندەردى سۋ باسۋ قاۋپى تۋىنداعان. ال ءبورلى اۋدانىنىڭ اقسۋ كەنتىن سۋ الىپ, 46 ۇيدەن 150 ادام اقسۋ مەكتەبىنە ەۆاكۋاتسيالاندى, ونىڭ ىشىندە 38 ادام ورال قالاسىنا جەتكىزىلمەك.
قازىرگى ۋاقىتتا ورال قالاسىندا, قاراتوبە, سىرىم, ءبورلى جانە تەرەكتى اۋداندارىندا جەرگىلىكتى جەردەگى تابيعي سيپاتتاعى توتەنشە جاعداي جاريالاندى.
وڭىردە تاسقىن سۋعا بايلانىستى جەدەل شتاب قۇرىلىپ, تاۋلىك بويى قىزمەت ەتىپ جاتقانىن حابارلاعان ەدىك. كەشە وبلىس اكىمى ناريمان تورەعاليەۆ توتەنشە جاعدايلار دەپارتامەنتىنىڭ ماماندارىمەن بىرگە تىكۇشاقپەن اتالعان قورجىن ەلدى مەكەنىنە بارىپ, تۇرعىنداردى قۇتقارۋ جۇمىستارىنا ءوزى جەتەكشىلىك ەتتى.
ءوڭىر باسشىسى اۋىل حالقىمەن كەزدەسىپ, ولارعا مەملەكەت تاراپىنان كومەك كورسەتىلەتىنىن ايتتى.
«بارشاڭىزدى سابىرعا شاقىرامىن. تابيعي اپات سالدارىنان وبلىستىڭ بىرنەشە اۋدانى زارداپ شەگىپ جاتىر. ارنايى كوميسسيا قۇرىلىپ, اپاتتان كەلگەن بارلىق زالال ەسەپتەلەدى. مەملەكەت تاراپىنان ءتيىستى كومەك بەرىلەدى. قازىر سىزدەردى توتەنشە جاعدايلار قىزمەتىنىڭ ماماندارىمەن بىرگە سۋ تاسقىنىنان قۇتقارۋعا كەلدىك. تىكۇشاقپەن بارشاڭىزدى اۋدان ورتالىعى قاراتوبەگە, قاۋىپسىز جەرگە جەتكىزەمىز», دەدى وبلىس اكىمى.
ارينە, ءبىرىنشى كەزەكتە بالالار مەن ايەلدەر, دەنساۋلىعى ناشار جانە مۇگەدەكتىگى بار جاندارعا كومەك كورسەتىلىپ جاتىر.
ايتا كەتەيىك, وڭىردە قيىن جاعدايعا دۋشار بولعان جەرلەستەرىنە قولداۋ ءبىلدىرۋشى قايىرىمدى ازاماتتار ءۇشىن «اقجايىق» قورى ارقىلى قاراجات جيناۋ باستالدى.
رەكۆيزيتتەر:
بقو, ورال ق. ج.مولداعاليەۆ كوشەسى 19, 101 كابينەت
بايلانىس تەلەفونى: 50-64-95,
بسن 030540003364
جسك KZ 1960101811000219258 (تەڭگە)
بسك HSBKKZKX
«حالىق بانكى» اق
كبە -18
باتىس قازاقستان وبلىسى
