وبلىستىق تجد باستىعى نۇرعالي ءجۇنىسوۆتىڭ حابارلاۋىنشا, ەۆاكۋاتسيا شارالارىنا 547 ادام تارتىلعان. ازاماتتاردى قاۋىپسىز جەرگە كوشىرۋگە وبلىستىق اكىمدىك قىزمەتكەرلەرى, قۇتقارۋشىلار, پوليتسەيلەر, اسكەريلەر, ۆولونتەرلەر جانە ءوز باستاماسىمەن كەلگەن قالا تۇرعىندارى تارتىلدى. تۇرعىندار تاستاپ كەتكەن ۇيلەرىن قازىر پوليتسيا قىزمەتكەرلەرى كۇزەتىپ تۇر.
بەيسەنبى كۇنى كەشكىلىك قالا اكىمى ازامات بەكەت وبلىس ورتالىعىندا توتەنشە جاعداي جاريالاۋعا اقتوبە سۋ قويماسىنداعى سۋ كولەمىنىڭ شەكتىك مولشەرگە جەتۋى سەبەپ بولعانىن مالىمدەدى. تولاسسىز جاۋعان جاڭبىر مەن قار سۋىنان اقتوبە سۋ قويماسىنا ءبىر تاۋلىكتە 150 ملن تەكشەمەتر سۋ جينالىپ, پلوتينانىڭ شەگىنە جەتىپ قالدى. ەگەر ارتىق سۋدى ەلەك وزەنىنە جىبەرمەسە, پلوتينا جارىلىپ, قالا تۇتاس سۋ استىندا قالۋى مۇمكىن. ءتۇنى بويى اقتوبە سۋ قويماسىنان جىبەرىلگەن سۋ ەلەك وزەنىنە جاقىن اۋماقتار مەن كىرپىشتى ەلدى مەكەنىن باسىپ قالدى.
اقتوبە قالاسىنىڭ تۇبىندە ءۇش سۋ قويماسى بار: ەڭ ۇلكەنى – سىيىمدىلىعى 280 ملن تەكشە مەتر بولاتىن قارعالى سۋ قويماسى. وعان قارعالى وزەنى قۇيادى. بىلتىر ءدال وسى ۋاقىتتا وسى سۋ قويماسىنىڭ 185 ملن تەكشە مەترى بوس تۇردى. وعان قۇياتىن قارعالى وزەنىندەگى سۋ دەڭگەيى دە جوعارىلاپ, جانىنداعى ەلدى مەكەندەرگە قاۋىپ ءتوندىرىپ تۇر. ەكىنشىسى – سىيىمدىلىعى 245 ملن تەكشە مەتر بولاتىن اقتوبە سۋ قويماسى. سوڭعى كۇندەرى مۇنداعى سۋ كولەمى 68 %-دان اسقان. ەڭ كىشىسى – 7,5 ملن تەكشە مەتر سۋ جينالاتىن سازدى سۋ قويماسى. قازىر ول دا تولدى, ارتىق سۋ سازدى, كىشى سازدى وزەندەرىنە جىبەرىلدى.
وبلىس اكىمى اسحات شاحاروۆ سۋ تاسقىنىنان زارداپ شەككەن تۇرعىندارعا ماتەريالدىق كومەك بەرىلەتىنى تۋرالى مالىمدەدى. قازىرگى ۋاقىتتا مۇعالجار اۋدانىنىڭ بىرلىك, شەڭگەلدى, ەمبى ەلدى مەكەندەرىن, قوبدا اۋدانىنىڭ بىرنەشە اۋىلىن, ايتەكە بي اۋدانىنىڭ ۇلعايسىن, تاسوتكەل, قوپا ەلدى مەكەندەرىن, ىرعىز اۋدانىنىڭ اقشي, جانىس بي, شەڭبەرتال اۋىلدارىن سۋ باستى. سونداي-اق ويىل اۋدانىنىڭ ەكپەتال, جاڭاباز, قاراسۋ اۋىلدارىنىڭ تۇرعىندارى دا كوشىرىلىپ, ويىل ەلدى مەكەنىندەگى مەكتەپكە ۋاقىتشا ورنالاستىرىلدى.
اقتوبە وبلىسى
