فوتو: bairaq.kz
وسىعان بايلانىستى جيىن وتكىزگەن وبلىس اكىمى سەرىك شاپكەنوۆ اۋانىڭ لاستانۋ سەبەبىن 10 كۇننىڭ ىشىندە انىقتاۋدى تاپسىردى. اكىمنىڭ ايتۋىنشا, جاۋاپتى ورگاندار 4 ساعاتتان سوڭ اۋا ساپاسىن زەرتتەۋگە كىرىسكەن. جاعىمسىز ءيىستى انىقتاۋ ءۇشىن قاجەتتى شارالاردى قولعا الماعان جاۋاپتى ورگانداردىڭ جۇمىسىن سىنادى.
اتىراۋ وبلىستىق ەكولوگيا دەپارتامەنتىنىڭ باسشىسى الىبەك بەكمۇحامەدوۆتىڭ ايتۋىنا قاراعاندا, «قازگيدرومەت» رمك-نىڭ وڭىرلىك فيليالى ۇسىنعان مالىمەتتە 36 جوعارى لاستانۋ جانە 2 ەكسترەمالدى جوعارى لاستانۋ دەرەگى تىركەلگەن.
«جاعىمسىز ءيىس اتىراۋ قالاسىنىڭ سول جاعىنداعى «ساسىقساي» بۋلانۋ الاڭىنان شىعۋى مۇمكىن دەپ پايىمداپ وتىرمىز. مۇندا اتموسفەرالىق اۋانى جوعارى لاستاۋشى ينگرەديەنت رۇقسات ەتىلگەن شەكتى كونتسەنتراتسيادان 10 ەسە اسقان. بۇعان قوسا 24 ناۋرىزدا تاڭعى ساعات 09.40-تا «پريۆوكزالنىي» اتموسفەرالىق اۋا ساپاسىن باقىلاۋ ستانساسىندا كۇكىرتتى سۋتەگىنىڭ رۇقسات ەتىلگەن شەكتى كونتسەنتراتسيادان 97 ەسەگە اسقانى تىركەلدى. بۇل – ەكسترەمالدى جوعارى لاستانۋ», دەپ مالىمدەدى ءا.بەكمۇحامەدوۆ.
ال «قازگيدرومەت» رمك وبلىستىق فيليالىنىڭ باسشىسى سالاۋات تولەنوۆتىڭ ايتۋىنشا, اتموسفەرالىق اۋانىڭ جوعارى جانە ەكسترەمالدى جوعارى لاستانۋى تۋرالى بارلىق مالىمەت اتىراۋ وبلىسى بويىنشا ەكولوگيا دەپارتامەنتىنە جانە جەرگىلىكتى ۋاكىلەتتى ورگاندارعا ۋاقىتىلى بەرىلىپ وتىرعان. الايدا اتىراۋ مۇناي وڭدەۋ زاۋىتى مەن NCOC N.V كومپانيالارىنىڭ اۋانىڭ لاستانۋىن تىركەيتىن ستانسالارى ناۋرىزدىڭ 24-ىنەن 25-ىنە قاراعان تۇندە لاستانۋ بويىنشا دەرەك بەرمەگەن.
«تاڭعى ساعات 03.00-دەن 07.00 ارالىعىنداعى جاعداي تۋرالى مالىمەت بەرىلگەن جوق. ءبىز اتىراۋ مۇناي وڭدەۋ زاۋىتى ماڭىنداعى تۇرعىن ۇيلەر ورنالاسقان اۋدانىنداعى اتموسفەرالىق اۋانىڭ ساپاسىنا ولشەۋلەر جۇرگىزدىك. جەل سولتۇستىك-شىعىستان سوقتى. ء«اموز» جشس-نىڭ وڭ جاعىنداعى قونىستانۋ ايماعىندا كۇكىرتتى سۋتەكتىڭ مولشەرى رۇقسات ەتىلگەن شەكتى كونتسەنتراتسيادان 21-25 ەسەگە دەيىن استى. بۇل – اۋانىڭ جوعارى لاستانۋ دەرەگى. ال زاۋىتتىڭ سول جاعىنداعى قونىستانۋ ايماعىندا بۇل دەرەك 17,5 ەسەگە اسىپ, جوعارى لاستانۋ جاعدايى تىركەلىپ وتىر», دەيدى س.تولەنوۆ.
مۇنايلى شاھار تۇرعىندارى الەۋمەتتىك جەلىدە كۇكىرتتى سۋتەكتىڭ ءيسى NCOC N.V كومپانياسىنىڭ قاراباتان ەلدى مەكەنىندەگى زاۋىتى ورنالاسقان جاقتان شىققانى تۋرالى شاعىم ايتتى. الايدا كونسورتسيۋمنىڭ ەڭبەكتى قورعاۋ جانە قاۋىپسىزدىك جونىندەگى ديرەكتورى ءۋاليحان جانايسوۆتىڭ ايتۋىنشا, بۇعان كومپانيانىڭ ەش قاتىسى جوق.
ء«بىز ارنايى سانيتارلىق قورعاۋ ايماعىنا تالداۋ جۇرگىزدىك. تۇنگى ساعات 01.00-دەن تاڭعى 09.00-گە دەيىن اۋا ساپاسىن تەكسەردىك. 24-25 ناۋرىزدا جۇرگىزىلگەن تەكسەرۋ ناتيجەسىندە جەلدىڭ باسىم باعىتى سولتۇستىك-باتىستان وڭتۇستىك-شىعىسقا, ياعني كومپانيانىڭ كەن ورنىنا قاراي سوققان. جەلدىڭ جىلدامدىعى سەكۋندىنا 2 مەتر بولعان. اۋا ساپاسىن باقىلايتىن بارلىق ستانسانىڭ دەرەگىن الىپ, جاعدايدى باقىلاۋدا ۇستاپ وتىرمىز», دەيدى ۋ.جانايسوۆ.
وبلىس اكىمى س.شاپكەنوۆتىڭ پىكىرىنشە, جاعىمسىز ءيىستىڭ شىعۋ سەبەبىن انىقتاۋ, ءتيىستى شارا قولدانۋ ءۇشىن كوميسسيا قۇرىلادى. بىراق اتقارىلىپ جاتقان جۇمىستار جونىندە تۇرعىندارعا جەدەل ءارى ۋاقىتىلى اقپارات بەرىلۋى قاجەت.
«تۇرعىندار تاراپىنان اۋانىڭ لاستانعانى تۋرالى الەۋمەتتىك جەلىدە ارىز-شاعىمدار كوپ ايتىلادى. اۋادا جاعىمسىز ءيىستىڭ شىققانى مەملەكەتتىك ورگانداردىڭ جۇمىسىن ءتيىستى دەڭگەيدە اتقارمايتىنىن كورسەتتى. ماماندار بۇل جاعدايعا بايلانىستى دەرەۋ شارا قابىلداۋدىڭ ورنىنا ءتورت ساعاتتا ارەڭ جينالدى. بىزگە تۇرعىنداردىڭ تازا اۋامەن دەمالىپ, دەنى ساۋ بولعانى قاجەت. اۋاداعى جاعىمسىز ءيىس «ساسىقساي» بۋلانۋ الاڭىنان تارادى دەيمىز. بىراق ونىڭ سۋىن تازالادىق. ءتىپتى سول جەرگە فلامينگو ۇشىپ كەلدى دەگەن اقپارات تارادى. ال «كۆادرات» الاڭىندا دا تازارتۋ جۇمىستارى ءجۇرىپ جاتىر. ونداعى ءيىس قالانى تولىق باسۋى مۇمكىن ەمەس», دەيدى س.شاپكەنوۆ.
اكىمنىڭ ايتۋىنشا, اۋانىڭ لاستانۋ دەرەگىن زەردەلەيتىن كوميسسياعا ءتيىستى ماماندار توبى تارتىلادى. ال «قازگيدرومەت» رمك فيليالى اتموسفەرالىق اۋا ساپاسىن باقىلايتىن ستانسالاردان مالىمەت جيناپ, تالداۋ جاساۋعا ءتيىس. سول جۇمىستاردىڭ نەگىزىندە اۋانى لاستاعان كىنالىلەرگە ءتيىستى شارا قولدانىلۋى مۇمكىن.
بىراق بۇل ماسەلە بىرنەشە جىلدان بەرى شەشىمىن تابار ەمەس. ءتىپتى جىل وتكەن سايىن ۋشىعىپ بارادى. ەندى ارنايى كوميسسيانىڭ زەردەلەۋىنەن كەيىن اتىراۋدىڭ اتموسفەرالىق اۋاسى تازارا ما, الدە... مۇنىڭ بارىنە تورەشى – ۋاقىت.
اتىراۋ وبلىسى
