فوتو: senate.parlam.kz
س.ارۋباەۆتىڭ ايتۋىنشا, بابالارىمىزدان قالعان ۇلتتىق قۇندىلىقتارىمىز نامىسپەن, تانىممەن, تاربيەمەن ۇرپاققا دارىعان.
«وكىنىشكە قاراي, قوعامدىق ساناعا تىرەك بولار وسىنداي قاستەرلى قاسيەتتەر باتىستىڭ با, جوق الدە باسقانىڭ با جەتەگىنە ەرىپ, ۇلتتىق بولمىستى السىرەتۋ اشىق كورىنىسكە اينالعان. وكىنىشتىسى, بۇگىنگى ۇرپاق ۇلتتىق تاريحىمىزدىڭ دىڭگەگىنە اينالعان باتىرلار مەن ارىستاردىڭ ەسىمدەرىن ماقتانىشپەن ايتپايدى, ءومىر جولدارىن بىلە بەرمەيدى. «قازاقتىڭ قارا دومبىراسى – حارام» دەگەن ءسوزدى دە ەستىدىك. «قابانباي كىم؟», «اقان كىم؟», «قانىش كىم؟» دەگەن ساۋالدارعا جاستار تاراپىنان «اكىم, مينيستر, اتاقتى سپورتشى» دەگەن وزەك ورتەر جاۋاپتار دا بەرىلدى», دەدى سەناتور.
وسىلاي دەي كەلە, سەناتور بىرقاتار ۇسىنىسىن ورتاعا سالدى.
«قر پرەزيدەنتى اكىمشىلىگىمەن بىرلەسە وتىرىپ, مەملەكەت باسشىسى جانىنان ۇلتتىق قۇندىلىقتار بويىنشا جۇمىستاردى جۇيەلەيتىن ارنايى مەملەكەتتىك كوميسسيا قۇرۋ قاجەت. ۇكىمەت بۇل باعىتتا جاڭا تۇجىرىمداما ازىرلەپ, «رەسپۋبليكالىق ۇلتتىق قۇندىلىقتاردى ناسيحاتتاۋ ورتالىعىن» اشا وتىرىپ, ونىڭ قۇرامىنا ۇكىمەت مۇشەلەرىمەن قاتار, عالىمدار مەن تاريحشىلاردى جانە زيالى قاۋىم مەن ازاماتتىق قوعام بەلسەندىلەرىن تارتۋ كەرەك. شەتەلدەن كەلەتىن تۋريستەرگە قازاق حالقىنىڭ ۇلتتىق قۇندىلىقتارى جايلى ءۇش تىلدەگى تۇسىندىرمە جانە ناسيحات ماتەريالدارىن شىعارۋدى قولعا الۋ كەرەك. الەۋمەتتىك جەلىلەر الەۋەتىن ءتيىمدى پايدالانۋ جولدارىن قاراستىرۋ كەرەك», دەدى سەناتور ساكەن ارۋباەۆ.
