فوتو: اقوردا
قازاقستان پرەزيدەنتى اتالعان فورۋمدا قۇرمەتتى قوناق رەتىندە ءسوز سويلەدى.
مەملەكەت باسشىسى جيىن قاتىسۋشىلارىنا ءىلتيپات بىلدىرە وتىرىپ, قۇبىلمالى گەوساياسي احۋال مەن ەكونوميكالىق قيىنشىلىقتىڭ سالدارىنان تۋىنداعان جاھاندىق تۇراقسىزدىق جاعدايىندا بۇل پلاتفورما ديالوگ پەن حالىقارالىق ىنتىماقتاستىق ورتالىعى رەتىندە ماڭىزدى ءرول اتقاراتىنىن اتاپ ءوتتى.
«وسى ونجىلدىقتىڭ ورتاسىنا قاراي جاھاندىق جالپى ىشكى ءونىمنىڭ ءوسۋ قارقىنى سوڭعى 30 جىلدا ەڭ تومەنگى دەڭگەيگە تۇسەتىنى ايقىندالا باستادى. سونىمەن قاتار جەتەكشى ەلدەر اراسىنداعى ساۋدا قاتىناستارىنىڭ شيەلەنىسۋى – ءالى دە الەمدىك ەكونوميكانىڭ الدىندا تۇرعان نەگىزگى سىن-قاتەرلەردىڭ ءبىرى. پروتەكتسيونيزم ساياساتى مەن ساۋدا داۋلارىنىڭ ۋشىعۋى جاھاندىق جەتكىزۋ تىزبەگىن بۇزىپ, ەكونوميكالىق ءوسىمدى تەجەيدى, سونداي-اق ينۆەستورلاردىڭ سەنىمىنە سەلكەۋ تۇسىرەدى. جاھاندىق ەكونوميكاعا دامۋدىڭ جاڭا پاراديگماسى كەرەك ەكەنى انىق. بۇل ماسەلەنى شەشە الماساق, تاياۋ ونجىلدىقتاعى مۇمكىندىكتەر قولىمىزدان سۋسىپ كەتۋى ابدەن ىقتيمال», دەدى قاسىم-جومارت توقاەۆ.
مەملەكەت باسشىسى ورنىقتى دامۋدىڭ جاڭا داۋىرىنە قادام باسار تۇستا ازيا ەلدەرى كوش باستاپ تۇرعانىنا نازار اۋداردى.
«بيىل ازيا ەلدەرى الەمدىك جالپى ىشكى ءونىمنىڭ 60 پايىز وسىمىنە قول جەتكىزەدى دەگەن بولجام جاسالىپ وتىر. دۇنيەجۇزىلىك ساۋدانىڭ 53 پايىزى وسى قۇرلىقتىڭ ۇلەسىنە تيەسىلى. مۇندا الەمنىڭ ءىرى جانە قارقىندى دامىپ كەلە جاتقان ەكونوميكالارى ورنالاسقان. سوڭعى جىلدارى ازياعا تارتىلعان تىكەلەي شەتەلدىك ينۆەستيتسيا كولەمى ەداۋىر ۇلعايدى. سونداي-اق بۇل ايماقتا پاتەنتتىك ازىرلەمەلەردىڭ 70 پايىزىنا يەلىك ەتەتىن الەمنىڭ جەتەكشى تەحنولوگيالىق ورتالىقتارى بار. قۇرلىق ايتارلىقتاي ادامي رەسۋرسقا يە. الەمدەگى ءىرى 30 قالانىڭ 21-ءى ازيا قۇرلىعىندا ورنالاسقان. 2030 جىلعا قاراي ورتا تاپتىڭ تۇتىنۋ كولەمىنىڭ ءوسىمى 30 تريلليون دوللار بولماق. بولجام بويىنشا ونىڭ 1 تريلليون دوللارى عانا باتىس ەكونوميكاسىنا تيەسىلى. وسى فاكتورلاردىڭ بارلىعى مۇنىڭ «ازيا رەنەسسانسى» ەكەنىن كورسەتەدى», دەدى پرەزيدەنت.
مەملەكەت باسشىسى الداعى جىلدارى جاھاندىق ءوسىم مەن دامۋدى ىنتالاندىرۋ ءىسىن جالعاستىرۋ ءۇشىن ازيا ءوڭىرىنىڭ مول الەۋەتى بار ەكەنىن اتاپ ءوتتى.
«وسى رەتتە بواو فورۋمى جالپىعا ورتاق ەكونوميكالىق پروگرەسكە قول جەتكىزۋ جولىنداعى ازيالىق يننوۆاتسيالىق ءتاسىلدىڭ ىسكە اسقانىن انىق كورسەتەدى. سونداي-اق بۇل جيىن قىتايدىڭ جاھاندىق دامۋعا دەگەن ۇستانىمىنىڭ ايقىن سيمۆولى رەتىندە تانىلدى», دەدى قازاقستان پرەزيدەنتى.
